قازىر قوعامدى الاڭداتقان ماسەلەنىڭ ءبىرى – الاياقتىقتىڭ ەتەك الۋى. تەحنولوگيا دامىعان سايىن بۇل كەسەل تۇرلەنىپ, جاڭا سيپاتقا يە بولدى. اقپاراتتىق جۇيەنى مەڭگەرگەن ينتەرنەتتەگى الاياقتاردىڭ ارباۋىنا تۇسكەندەر كوبەيىپ بارادى. وسى ورايدا «Egemen Qazaqstan» گازەتى قارجى نارىعىن رەتتەۋ جانە دامىتۋ اگەنتتىگىمەن بىرلەسىپ, «قارجىلىق ساۋات» ايدارىن اشىپ وتىر. مۇندا ينتەرنەتتەگى الاياقتاردان ساقتانۋ جايى ايتىلادى. ەگەر وسى ماسەلەگە قاتىستى سۇراقتارىڭىز بولسا, info@egemen.kz پوشتاسىنا («قارجىلىق ساۋات» ايدارىنا» سىلتەمەسىمەن) جولداۋلارىڭىزعا بولادى.
كەيىنگى جىلدارى ەلىمىزدە ازاماتتاردىڭ جەكە دەرەگىن پايدالانىپ, ولاردىڭ اتىنا زاڭسىز نەسيە رەسىمدەۋى جيىلەپ كەتتى. مۇنداي جاعدايعا تاپ بولعاندا نە ىستەۋ كەرەك؟ وسى سۇراققا قارجى نارىعىن رەتتەۋ جانە دامىتۋ اگەنتتىگى تومەندەگىدەي جاۋاپ بەرەدى.
اتىڭىزعا نەسيە رەسىمدەلگەنىن قالاي بىلە الاسىز؟
كرەديتتىك تاريحىڭىزدى جۇيەلى تۇردە تەكسەرىڭىز. ەلىمىزدە ءاربىر ازامات جىلىنا ءبىر رەت كرەديتتىك تاريحىن تەگىن سۇراتا الادى. مۇنى بىرنەشە جولمەن جاساۋعا بولادى:
eGov.kz پورتالى ارقىلى. پورتالدا اۆتوريزاتسيادان ءوتىپ, «جەكە كرەديتتىك ەسەپتى الۋ» قىزمەتىن تابىڭىز. ءوتىنىشتى تولتىرىپ, ونى ەلەكتروندىق تسيفرلىق قولتاڭبا (ەتسق) كومەگىمەن راستاڭىز. ءبىرىنشى كرەديتتىك بيۋرو ارقىلى. 1cb.kz سايتىنا كىرىڭىز نەمەسە 1CB.kz ءموبيلدى قوسىمشاسىن پايدالانىڭىز. ەتسق ارقىلى ءوتىنىم بەرىپ, كرەديتتىك تاريحىڭىزدى تەكسەرىڭىز. حقكو-عا جۇگىنۋ. حالىققا قىزمەت كورسەتۋ ورتالىعىنا (حقكو) بارىپ, كرەديتتىك تاريحىڭىزدى تەكسەرۋگە بولادى.كرەديتتىك تاريحىڭىزدى ايىنا كەمىندە ءبىر رەت تەكسەرىپ وتىرعان ءجون.
قايدا جۇگىنگەن ءجون؟
نەسيە رەسىمدەلگەن بانككە نەمەسە قارجى ۇيىمىنا جۇگىنىڭىز. نەسيەنىڭ قاي بانكتەن نەمەسە ميكروقارجى ۇيىمىنان الىنعانىن انىقتاڭىز. سول ۇيىمعا جازباشا ارىز بەرىپ, بۇل نەسيەنى ءسىز الماعانىڭىزدى جەتكىزىڭىز. نەسيە كەلىسىمشارتىنىڭ كوشىرمەسىن جانە نەسيە رەسىمدەۋ كەزىندە پايدالانىلعان قۇجاتتاردى تالاپ ەتىڭىز. ەگەر جەكە كۋالىگىڭىزدى جوعالتقان بولساڭىز نەمەسە ۇرلاتىپ الساڭىز, بۇل تۋرالى انىقتامانى بانككە ۇسىنىڭىز.
پوليتسياعا ارىز جازىڭىز. ىشكى ىستەر ورگاندارىنا بارىپ, الاياقتىق فاكتىسى بويىنشا ءوتىنىش بەرىڭىز. بارلىق جينالعان قۇجاتتى (بانك جاۋاپتارى, كرەديتتىك ەسەپ, جەكە كۋالىك كوشىرمەسى, ت.ب.) قوسا تىركەڭىز. ءوتىنىشىڭىزدىڭ تىركەلگەنىن راستايتىن تالون الىڭىز.
قارجى نارىعىن رەتتەۋ جانە دامىتۋ اگەنتتىگىنە شاعىمدانىڭىز. ەگەر بانك نەسيە رەسىمدەۋ دەرەگىن بەرۋدەن باس تارتسا نەمەسە جاعدايدى شەشپەسە, قارجى نارىعىن رەتتەۋ جانە دامىتۋ اگەنتتىگىنە شاعىم جازىڭىز. اگەنتتىك قارجى ۇيىمدارىنىڭ زاڭسىز ارەكەتىن تەكسەرۋگە قۇقىلى.
سوتقا جۇگىنىڭىز. ەگەر بانك نەسيەنى ەسەپتەن شىعارۋدان باس تارتسا, سوتقا ارىز بەرىپ, كەلىسىمدى جارامسىز دەپ تانۋ تۋرالى تالاپ قويا الاسىز. سوت شەشىمى شىققاننان كەيىن نەسيە بيۋروسىنا نەسيە تۋرالى جالعان اقپاراتتى الىپ تاستاۋ جونىندە ءوتىنىش جىبەرىڭىز.
ەگەر ءسىزدىڭ اتىڭىزعا الاياقتار نەسيە رەسىمدەسە, دەر كەزىندە ارەكەت ەتۋ ماڭىزدى. بانككە, پوليتسياعا جانە قارجى رەتتەۋشى ورگاندارعا جۇگىنىپ, قۇقىڭىزدى قورعاڭىز. ەرتەرەك قامدانساڭىز, ماسەلەنى وڭتايلى شەشۋگە بولادى.