«عۇمىرداريا» كىتابى جارىق كوردى

 جاڭا تۋىندى استاناداعى «دوستىق» ۇيىندە تانىستىرىلدى.   

«فوليانت» باسپاسىنان شىققان, ەستەلىك-ەسسە تۇرىندە جازعان بۇل كىتاپتا اۆتور بالالىق شاعىنان قازىرگە دەيىنگى عۇمىر جولىنداعى ەلەۋلى وقيعالاردى بايانداپ, ومىرلىك تاجىريبەسىن بولىسەدى.

سونداي-اق ادام بويىنداعى باستى قاسيەتتەر – ادالدىقتى, ەڭبەكسۇيگىشتىك پەن كىشىپەيىلدىلىكتى باستى قۇندىلىق رەتىندە كورسەتىپ, وقىرمانداردى كەزدەسكەن قيىندىقتاردى جەڭىپ, قاشاندا جاقسىلىق جاساۋعا شاقىرادى.

- ەرسۇلتان بەكتۇرعانوۆتىڭ جاڭا كىتابىن ەكى كۇن باس الماي وقىپ شىقتىم. وقىپ وتىرىپ, ەلدە جۇرگەن كەزدەگى ءوزىم دە بىلمەيتىن نارسەلەرىمە قانىقتىم. بۇكىل بەكتۇرعانوۆتار اۋلەتىنىڭ جاقسى ىستەرىن, جاقسى قاسيەتتەرىن, ونەگەلى ىستەرىنە كۋا بولدىم. تۇيىندەپ ايتقاندا, بۇل كىتاپ ادالدىقتى, ادامگەرشىلىكتى تۋ ەتە وتىرىپ, ۇرپاقتاردى وتانشىلدىققا, ەڭبەكسۇيگىشتىككە شاقىرادى, - دەدى جيىندا ءسوز العان اۋدارماشى-جۋرناليست ەسەنقۇل سافۋاني. 

ال اۆتور جاڭا كىتابىندا ءومىردىڭ ءمانىن دە, قۇنىن دا, باقىتىن دا ەڭبەكتەن تاپقانىن ايتقىسى كەلگەنىن اتاپ ءوتتى.

- ادال ەڭبەك ابىرويعا جەتەلەيتىنى انىق. تاعىلىمدى ويلار مەن قىزىقتى وقيعالاردى ارقاۋ ەتكەن بۇل كىتابىم وسكەلەڭ ۇرپاققا تاربيە بەرىپ, جول كورسەتۋدە پايداسى تيەدى دەگەن ويدامىن, - دەيدى ول.

ەرسۇلتان بەكتۇرعانوۆ جامبىل جەڭىل جانە تاماق ونەركاسىبى تەحنولوگياسى ينستيتۋتىن (قازىرگى م.ح.دۋلاتي اتىنداعى وڭىرلىك ۋنيۆەرسيتەتى), ديپلوماتيالىق اكادەميانى بىتىرگەن. 1-سىنىپتى كەڭەسشى دەگەن ديپلوماتيالىق دارەجەسى بار.

ەڭبەك جولىن قاراپايىم جۇمىستان باستاعان ول كەيىن قر سىرتقى ىستەر مينيسترلىگىنىڭ حاتشىسى, قازاقستاننىڭ گەرمانياداعى ەلشىلىگىنىڭ كونسۋلى, قر پرەزيدەنتى اكىمشىلىگىنىڭ كادر ساياساتى ءبولىمىنىڭ مەڭگەرۋشىسى بولدى.

2012 جىلى قاڭتار ايىندا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى بولىپ سايلانىپ, V-VI شاقىرىلىمداردا ابىرويلى قىزمەت اتقاردى.

قاجىرلى ەڭبەگى مەملەكەت پەن قوعام تاراپىنان جوعارى باعالانىپ, «ەرەن ەڭبەگى ءۇشىن» مەدالىمەن, «قۇرمەت», «پاراسات» وردەندەرىمەن ماراپاتتالدى.

ەكى رەت پرەزيدەنتتىڭ العىسىن الىپ, كەۋدەسىنە «التىن بارىس» بەلگىسىن تاقتى.