تۇركىستان ءوڭىرى مەكتەپتەرىندە ۇلتتىق قۇندىلىقتاردى دارىپتەۋ ماقساتىندا قازاقى تاربيەگە نەگىزدەلگەن ويىندار ناسيحاتتالىپ كەلەدى. مىسالى, سارىاعاش اۋدانىنداعى №71 جالپى ءبىلىم بەرەتىن مەكتەپ ۇستازدارى وقۋشىلاردىڭ ساباق ارالىق ءۇزىلىس ۋاقىتىن پايدالى ءارى قىزىقتى وتكىزۋ ماقساتىندا يگى باستامانى قولعا الدى.
مەكتەپ ديرەكتورى ءۇزىلىس كەزىندە بالالارمەن اسىق ويناپ, ۇلتتىق ويىندى قايتا جاڭعىرتتى. ۇستازدار اسىق ويناۋ وقۋشىلاردىڭ ءداستۇر مەن مادەنيەتكە دەگەن قۇرمەتىن ارتتىرىپ قانا قويماي, ولاردى دالدىك پەن شيراق بولۋعا ماشىقتاندىراتىنىن ايتادى. ۇلتتىق ويىن مەكتەپتە ۇيىمداستىرىلعان اۋداندىق اكەلەر مەكتەبىنىڭ جيىنىندا قولداۋ تاپقان. ياعني اتا-انالار قارسى ەمەس. بۇل ويىنعا قىزىققان وقۋشىلار 1000-نان اسا اسىق جيناپتى. ء«بىز بالالاردىڭ ۇلتتىق قۇندىلىقتارعا جاقىن بولۋىن قالايمىز. اسىق ويناۋ – قىزىقتى ويىن عانا ەمەس, سونىمەن قاتار بۇل اتا-بابامىزدان ۇرپاقتان-ۇرپاققا ميراس بولعان مۇرا. وسى ءداستۇردى جاڭعىرتۋ ارقىلى وقۋشىلارىمىزدى ۇلتتىق قۇندىلىققا, مادەنيەتكە قۇرمەتپەن قاراۋعا تاربيەلەيمىز. اسىق ويىنى – تۇنىپ تۇرعان تاربيە كوزى. ال ءبىلىم مەن تاربيە قاشاندا ەگىز بولۋى كەرەك», دەيدى مەكتەپ ديرەكتورى ابىلاي بەردىحوجاەۆ.
الداعى ۋاقىتتا مەكتەپتە اسىق وينايتىن ارنايى بولمە جابدىقتالىپ, ۇيىرمە اشۋ كوزدەلىپ وتىر. دەنساۋلىققا تيگىزەر پايداسىنان بولەك, وقۋشىلار اراسىنداعى دوستىق قارىم-قاتىناستى نىعايتاتىنىن ايتقان مۇعالىمدەر ەندىگى كەزەكتە ۇلتتىق ويىن تەك ءبىلىم ورداسىنىڭ اۋماعىندا عانا ەمەس, بالالاردىڭ بوس ۋاقىتىندا دا جالعاسىپ, كەڭىنەن تارالاتىنىنا سەنىمدى.
تۇركىستان وبلىسى