ءماجىلىس دەپۋتاتى رينات زايتوۆ پرەمەر-مينيستر ولجاس بەكتەنوۆكە ەلىمىزدەگى اۋىلداردىڭ اۋىر جاعدايدا تۇرعانىن ايتىپ, دەپۋتاتتىق ساۋال جولدادى, دەپ حابارلايدى Egemen.kz
رينات زايتوۆ ءتيىستى ينفروقۇرىلىمنىڭ, ساپالى مەديتسينا مەن ءبىلىمنىڭ, تۇراقتى جۇمىس پەن تابىستىڭ جوقتىعىنان حالقىمىزدىڭ كوپ بولىگى «التىن بەسىگىن» امالسىزدان تاستاپ كەتكەنىن تىلگە تيەك ەتتى. سونىڭ سالدارىنان كەيىنگى 55 جىلدا شقو-دا 350 اۋىل, سقو-دا 635, پاۆلودار وبلىسى بويىنشا 352 اۋىل بوس قالسا, بيىل سقو-دا 141 اۋىل مارتەبەسىنەن ايىرىلعانىن اتاپ ءوتتى.
«بۇگىن دە اۋىل تۇرعىندارى ءوز كۇشىمەن قانداي دا ءبىر ءىس باستايىن دەسە دە كەدەرگىلەر وتە كوپ, مال باعىپ, ەگىن وسىرەيىن دەسە, جەرى, كاسىپ باستايىن دەسە, قارجىسى, قاجەتتى ينفروقۇرىلىمى دا جوق. تۇرعىندارىن بىلاي قويىپ, اۋىلدىڭ اكىمىندە دە قاراپايىم قاجەتتىلىكتەردى وتەيتىن بيۋدجەتتە تەحنيكا دا, پارمەن دە جوق. اۋىلداردى وسىنداي كۇيگە جەتكىزگەن سوڭ, اۋىل حالقىنا نەگە كوشتىڭ دەپ قاي بەتىمىزبەن ايتامىز؟ «ارقادا اياز بولماسا, ارقار اۋىپ نەسى بار» دەگەندى ءبارىمىز بىلەتىن شىعارمىز؟», دەدى ول.
وسىنى ايتا كەلە رينات زايتوۆ پرەمەر-مينيسترگە تومەندەگى ۇسىنىستاردى جەتكىزدى:
اۋىل اكىمدەرىنىڭ پارمەنىن كۇشەيتۋ; اۋىلداردى تەحنيكامەن قامتۋ; ۇكىمەت باسشىلىعى جانە وبلىس اكىمدەرى دەڭگەيىندە قونىس اۋدارۋ جونىندەگى مەملەكەتتىك كوميسسيا قۇرۋ; اۋىلدىق جەرلەرگە جاستاردى تۇراقتاندىرۋ جانە قونىستاندىرۋعا باعىتتالعان جۇمىس جوسپارىن قۇرۋ, ونى اۋىلدىق جاستارعا جەتكىزۋ.