ءماجىلىس دەپۋتاتى ماقسات تولىقباي قازاقستان رەسپۋبليكاسىنىڭ ىشكى ىستەر ءمينيسترى ەرجان ساپاربەك ۇلى سادەنوۆكە دەپۋتاتتىق ساۋال جولداپ, اۋىل حالقىنىڭ مال ۇرلىعىنان شىرقى بۇزىلعانىن ايتتى, دەپ حابارلايدى Egemen.kz.
ماقسات تولىقبايدىڭ ايتۋىنشا, اۋىلداعى جۇرت وسى ازىن-اۋلاق مالىنىڭ ارقاسىندا كۇن كورىپ, جان باعىپ ءجۇر. بىراق, ەلدەگى بۇقارا باۋكەسپە ۇرىلاردان ابدەن زارە-ءزاپ بولعان.
«اقىرى پرەزيدەنتتەن كومەك سۇراۋعا ءماجبۇر بولعان شىعىس قازاقستان وبلىسى, قاتونقاراعاي اۋدانى تۇرعىندارىنىڭ الەۋمەتتىك جەلىگە شىققان ۆيدەوۇندەۋلەرىن كورگەن شىعارسىزدار؟! ماعان دا ونداعان ادام حابارلاستى. ىشكى ىستەر مينيسترلىگى مالىمدەمە جاسار دەپ بەس كۇن كۇتتىك. الايدا ەشقانداي رەاكتسيا جوق. كاتونقاراعايعا قاراستى شىڭعىستايدىڭ شىرقىن وسى ۇرىلار بۇزىپ ءبىتىردى. الاقانداي اۋىل حالقىنا ۇرى-قارىنىڭ قورلىعى ابدەن وتكەن. توزىمدەرى تاۋسىلىپ, سەنىمدەرى سەتىنەگەن ەل ەندى بار ۇمىتتەرىن ەل باسشىلىعىنا ارتىپ, ياعني پرەزيدەنتتەن كومەك سۇراپ وتىر», دەدى ول.
دەپۋتاتتىڭ پىكىرىنشە, اۋىلداعى جۇرت قويى قورالاپ, ءىرى-قارا تابىنداپ, جىلقىسى ءۇيىر-ۇيىرىمەن جوعالىپ جاتقان سوڭ پوليتسيادان ابدەن كۇدەر ۇزگەن. وسى كۇنگە دەيىن حالىقتىڭ قانشاما مالى قولدى بولىپ, ۇرلانسا دا, ءتارتىپ ساقشىلارى بىردە-ءبىر «تىشقاق لاقتىڭ» سايدان سانىن, قۇمنان ءىزىن تاپپاعان. بۇل پوليتسيانىڭ نە ىزدەۋگە ق ۇلىقسىزدىعىن نەمەسە ۇرىمەن اۋىز جالاسىپ, ىمىرالاسىپ, ىنتىماقتا جۇمىس ىستەۋى مۇمكىن ەكەندىگىن بىلدىرەدى.
«اۋرە سارساڭعا تۇسكەن حالىق اۋداندىق, وبلىستىق ىشكى ىستەر ورگاندارىنىڭ تابالدىرىعىن توزدىرىپ, باستارىن تاۋعا دا, تاسقا دا سوعىپ ابدەن قاجىعان. سوندا دا پوليتسياعا ءبارى-ءبىر. جانى اشىماستىڭ, باسى اۋىرماس. مال ۇرلىعىنان شىرقى بۇزىلىپ, شىدامدارى تاۋسىلعان جالعىز شىڭعىستاي ەمەس. باۋكەسپەلەر شىڭعىستايعا ىرگەلەس جاتقان ورنەك, جاڭا ۇلگى, اققاينار, جامبىل, ەڭبەك سەكىلدى ەلدى مەكەندەردە دە ەمەن-ەركىن شايقاپ, جۇرتتىڭ دىمىن قالدىرماي, ەرىك-جىگەرلەرىن ابدەن قۇم ەتكەن. اۋىلدان اۋدانعا ارىز ارقالاپ باراتىن اعايىننىڭ كۇدەرى ءۇزىلىپ وتىر. ۇرى مەن پوليتسيا سىبايلاس بولماسا جىل ون ەكى ايدا ءبىر جوق تابىلار ەدى عوي. داندايسىعان ۇرىلار ءتىپتى, ايىلىن جيار ەمەس», دەدى ماقسات تولىقباي.
ونىڭ ايتۋىنشا, ىشكى ىستەر ورگاندارى «مال ۇرلىعى بويىنشا زاڭ قاتاڭ. قىلمىستىق كودەكس بويىنشا بۇل ورتاشا اۋىر قىلمىس. اسا iرi مولشەردە مال ۇرلاعاندار 7 جىلدان 12 جىلعا دەيiن سوتتالادى», دەپ حالىقتى سەندىرگىسى كەلەدى. ال ءىس جۇزىندە ءبارى كەرىسىنشە.
«قۇرمەتتى ىشكى ىستەر ءمينيسترى جانە ونىڭ ەلدەگى بارلىق جەكە قۇرامى! سىزدەردىڭ نازارلارىڭىزعا!
قازاق «مال اشۋى – جان اشۋى» دەيدى. جۇرتتىڭ جان اشۋىن قوزدىرىپ, جاراسىنا تۇز سەبە بەرمەڭىزدەر! اشىنعان حالىق بارىمتاعا قارىمتا قايتارامىز دەسە, ونى مىنا ءبىز تۇگىلى ءسىز جانە ءسىز باسقارىپ وتىرعان مينيسترلىكتىڭ جەكە قۇرامى توقتاتا المايتىنىڭىزدى تاعى دا ەسىڭىزگە سالعىم كەلەدى. حالىقپەن ويناماڭىزدار! ويلانىڭىزدار! قايتا جوعارىدا اتى اتالعان اۋىلداردىڭ ماسەلەسىن ءجىتى قاداعالاپ, شىعىس قازاقستان وبلىسى قاتونقاراعاي اۋدانىندا ارنايى رەيد جۇرگىزىپ, مال ۇرلىعىنىڭ الدىن-الۋ مەن ۇرىلاردى ۇستاۋ بويىنشا كەشەندى شارالاردى قولعا الۋدى سۇرايمىن», دەپ ساۋالىن قورىتىندىلادى ماقسات تولىقباي.