ەرجۇرەك ۇلىن ەسكە الدى

جينالعاندار الدىمەن ءبىر مينۋت ۇنسىزدىكپەن قازا تاپقان ساربازدار ايبات اما­نوۆ پەن ماديار قايساروۆتى ەسكە الدى. بۇدان كەيىن گۇلناز الكەنقىزىنا ءسوز بەرىلدى.

«وسىنداي ءىس-شارانى ۇيىم­داستىرىپ وتىرعان ۇلتتىق ۇلان باسشىلىعىنا, 5571 اسكەري ءبو­لىمنىڭ باسشىلىق قۇرامىنا العىس ايتامىن. ۇلىم قىزمەت اتقارعان تالدىقورعان قالاسىنا ارنايى بارعان ەدىم. الماتىداعى 5571 اسكەري ءبولىم – ۇلىمدى وسىندا العاش قارسى العان جەر. اسكەردەگى ءار سارباز ۇلىمداي بولىپ كەتكەن, ارقايسىسى ماعان قىمبات. سىزدەردىڭ كوزدەرىڭىزگە قاراپ, دۇنيەدەن وتكەن ۇلىمدى كورگەندەي بولامىن. قايعىلى وقيعالار قايتالانباسىن, ءار سارباز ۇيىنە امان-ەسەن ورالسىن. ەل امان, جۇرت تىنىش بولسىن», دەدى باتىردىڭ اناسى.

سونداي-اق ساپتاعى قارۋلاس دوسىنا دەگەن ساعىنىشىن جەت­كىزگەن ا.امانوۆتىڭ قىزمەت­تەس دوسى ەرجان باتىر ۇلدىڭ ەلىنە دەگەن ادالدىعى, دوسقا جانا­شىرلىعى جايىندا سىر شەرتتى.

«ايبات وتە جاقسى جىگىت ەدى. ونىمەن ءبىر روتادا قىزمەت ەتكەنىمدى ماقتان تۇتامىن. كەي­بىر كەزدە قىزىعى مەن شى­جىعى مول اسكەري ومىردەن شار­شاعان ساتتە سوزىمەن ەمدەپ, رۋحىمدى جانىپ وتىراتىن. ءبىر تۇ­سىنگەنىم, بارلىعىمىز ءبىر جا­ۋىنگەرلىك جانۇيامىز, قيىن­دىق تۇسكەندە ءبىر-بىرىمىزدەن جا­قىن ادام بولمايدى. سوندىقتان, جىگىت­تەر, بىرلىك كەرەك. ەشتەڭەگە الاڭ­داماي قىزمەتتەرىڭدى ادال اتقارىندار», دەدى ول.

ءىس-شارا سوڭىندا ايبات تۋرالى دەرەكتى فيلم كورسەتىلىپ, ەل مەن جەر, حالىقتىڭ اماندىعى جولىندا قىزمەت ەتىپ, وتان الدىندا مىندەت العان ۇلاندىقتاردىڭ بويىنداعى جىگەر وتىن جانىپ وتكەندەي بولدى. ءوز كەزەگىندە ءسوز العان 5571 اسكەري ءبولىم كومانديرىنىڭ ورىنباسارى, پودپولكوۆنيك ۇلىقبەك قاراەۆ «باتىردىڭ اناسى – بارشا وتانىمىزدىڭ اناسى. ءبىز اسكەري ءبولىم باسشىلىعى اتىنان ءسىزدىڭ الدىڭىزدا باس يەمىز, ءبىزدىڭ اسكەري ءبولىمنىڭ ەسىگى سىزدەر ءۇشىن ءاردايىم اشىق», دەپ اعىنان جارىلا سويلەدى.

ءىس-شارا سوڭىندا اسكەري ءبو­لىم باسشىلىعى كەلگەن قوناقتارعا ەستەلىك سىيلىقتار تابىستاپ, العىسىن ءبىلدىردى.

جادىرا ءمۇسىلىم,

جۋرناليست