پرەزيدەنت قاسىم-جومارت توقاەۆ جىل باسىندا قازاقتىلدى رەسپۋبليكالىق باسىلىمداردىڭ بىرىنە كولەمدى سۇحبات بەرىپ, وتكەن جىلى اتقارىلعان ىستەردى قورىتىندىلاپ, الداعى جۇمىستىڭ باعىت-باعدارىن ايقىنداۋدى, مەملەكەتتىڭ ىشكى جانە سىرتقى ساياساتىنىڭ ماڭىزدى ماسەلەلەرى جايلى كەڭىنەن ءسوز قوزعاۋدى يگى داستۇرگە اينالدىردى. مەملەكەت باسشىسىنىڭ بيىلعى 3 قاڭتاردا «Ana tili» گازەتىندە «ماقساتىم – ەكونوميكانى جانە ەگەمەندىكتى نىعايتۋ» تاقىرىبىمەن جاريالانعان سۇحباتىندا دا كوپشىلىكتىڭ كوكەيىندە جۇرگەن سان الۋان ساۋالعا اشىق تا ايقىن جاۋاپ بەرىلدى.
پرەزيدەنت ايتقانداي, وتكەن جىل ەلىمىز ءۇشىن ايرىقشا ماڭىزدى جىل بولدى. بارلىق وڭىردە ابدەن توزىعى جەتكەن ينجەنەرلىك-كوممۋنالدىق ينفراقۇرىلىمدى جاڭعىرتۋعا باعىتتالعان اۋقىمدى جۇمىستار جۇرگىزىلگەنىنە كۋاگەرمىز. 18 ميلليون شارشى مەتر تۇرعىنجاي پايدالانۋعا بەرىلىپ, 7 مىڭ شاقىرىم اۆتوكولىك جولى سالىنىپ, جوندەلگەنى – سونىڭ ايعاعى. شالعايداعى تالاي ەلدى مەكەننىڭ دە جولى تۇزەلىپ, اۋىلداعى اعايىننىڭ ەڭسەسى كوتەرىلە ءتۇستى. ەكونوميكادا مەملەكەت باسشىسى العا قويعان ماڭىزدى مىندەت – قايتا وڭدەۋ سەكتورىن قارقىندى دامىتۋعا كۇش سالىنىپ, ونىڭ ونەركاسىپتەگى ۇلەسى ءوندىرۋ سالاسىنىڭ دەڭگەيىنە جۋىقتاعانى كوڭىل سۇيىنتەدى. كەيبىر «ساۋەگەيلەردىڭ» بىلتىر قۇرعاقشىلىقتىڭ سالدارىنان ەگىن شىقپايدى دەگەن بولجامى جالعان بولىپ شىقتى. 27 ملن تونناعا جۋىق, ياعني كەيىنگى ون جىل ىشىندەگى رەكوردتىق كولەمدە استىق جينالدى. پرەزيدەنتتىڭ الەۋمەتتىك باستامالارى دا تابىستى ىسكە اسىرىلىپ جاتىر. «ۇلتتىق قور – بالالارعا» باعدارلاماسى اياسىندا العاشقى تولەم جاسالدى. جىلداعىداي زەينەتاقى مەن جاردەماقى يندەكستەلىپ, ستۋدەنتتەردىڭ شاكىرتاقىسى مەن ازاماتتىق سالا قىزمەتكەرلەرىنىڭ جالاقىسى كوبەيتىلدى. «جايلى مەكتەپ» جوباسى بويىنشا بوي كوتەرگەن جاڭا مەكتەپتەر كوز قۋانتادى. جۇرت نارازىلىعىن تۋدىرىپ كەلگەن «لەگيونەرلەرگە» بيۋدجەت قارجىسىن شاشۋدى تىيۋ جونىندە ۇكىمەتكە ءتيىستى تاپسىرما بەرىلىپ, بۇقارالىق سپورتتى, اسىرەسە بالالار سپورتىن دامىتۋعا باسا ءمان بەرىلىپ وتىر.
ەلىمىز ءۇشىن وتكەن جىلدىڭ ەڭ قيىن سىناعى الاپات سۋ تاسقىنى بولدى. سول سىننان مەملەكەت تاراپىنان قابىلدانعان جەدەل دە پارمەندى شارالاردىڭ جانە حالقىمىزدىڭ ىنتىماق-بىرلىگىنىڭ ارقاسىندا ابىرويمەن وتتىك. زارداپ شەككەن بارلىق وتباسىعا قوماقتى الەۋمەتتىك كومەك كورسەتىلىپ, جاڭا باسپانا بەرىلدى. تۇرعىندار عانا ەمەس, قارعىن سۋدان بيزنەسىنە نۇقسان كەلگەن كاسىپكەرلەردىڭ شىعىنى دا وتەلدى. مەملەكەت باسشىسىنىڭ ارنايى ۇندەۋىنە ءۇن قوسقان ءىرى بيزنەس وكىلدەرى تاسقىن سالدارىن جويۋعا ايتارلىقتاي ۇلەس قوسقانى دا – جادىمىزدا ساقتالعان جاقسىلىق بەلگىسى.
سۇحبات ەل ىشىندە ايتىلىپ, الەۋمەتتىك جەلىلەر مەن مەسسەندجەرلەر ارقىلى تاراتىلىپ, حالقىمىزدى ەلەڭدەتىپ قانا قويماي, الاڭداتىپ تا وتىرعان ءارتۇرلى اڭگىمەلەر مەن جورامالدارعا شىنايى جاۋاپ بەرىلگەنىمەن دە ماڭىزدى بولدى.
وتكەن جىلدىڭ قاراشا ايىنان باستاپ تەڭگەنىڭ دوللارعا شاققانداعى باعامى 500-دەن اسىپ كەتكەنى جۇرتشىلىقتى الاڭداتىپ وتىر. وسى جونىندەگى ساۋالعا وراي مەملەكەت باسشىسى: ء«بىزدىڭ ۆاليۋتا باعامىن قولدان ۇستاپ تۇرۋ تاجىريبەسىنەن باس تارتقانىمىزعا ءبىراز ۋاقىت بولدى. نارىق فاكتورلارىنا بايلانىستى ەركىن باعام قالىپتاستىرۋ جولىن تاڭدادىق. مەن تەڭگەنى كۇشەيتۋ ءۇشىن ەلىمىزدىڭ التىن-ۆاليۋتا قورىن بوسقا ىسىراپ ەتۋ ورىنسىز دەپ سانايمىن. نارىققا قاتىسى بار كەيبىر قۇرىلىمدار تەڭگە باعامىن باسقارۋعا قولايلى ەتۋ تۋرالى ۇسىنىستار ايتىپ ءجۇر. ۇلتتىق بانك پەن ۇكىمەت ونىڭ ءبارىن مۇقيات قاراستىرىپ جاتىر. ماسەلەنى زەردەلەگەن سوڭ بۇل باعىتتاعى ۇستانىمىمىزدى وزگەرتۋ قاجەت پە دەگەن ساۋالدىڭ جاۋابى بەلگىلى بولادى. باستى ماقسات – ەكونوميكانىڭ تۇراقتىلىعى مەن تيىمدىلىگىن قامتاماسىز ەتۋ, ناقتى سەكتوردى قارقىندى دامىتۋ, ەڭبەك ونىمدىلىگىن ارتتىرۋ جانە تۇراقتى جۇمىس ورىندارىن كوپتەپ اشۋ», دەدى.
بۇل رەتتە وتكەن جىلدىڭ سوڭىندا ۇلتتىق ەكونوميكا ءمينيسترى لاۋازىمىنا وڭىردە دە, ورتالىقتا دا جاۋاپتى قىزمەتتەر اتقارعان, ەۋرازيالىق ەكونوميكالىق كوميسسيانىڭ باسەكەلەستىكتى قورعاۋ جانە دامىتۋ ءمينيسترى بولعان تاجىريبەلى مامان سەرىك جۇمانعاريننىڭ تاعايىندالعاندىعى بەكەردەن-بەكەر ەمەس. كەيىنگى جىلدارى باسقا دا مينيسترلىكتەرگە وڭىردە جاۋاپتى قىزمەتتەر اتقارعان ازاماتتار كەلە باستاعانى ءمالىم. وسى وڭ ءۇردىس الداعى ۋاقىتتا جۇيەلى جالعاسىن تاۋىپ, ۇكىمەتتىڭ جۇمىسىنا تىڭ سەرپىن بەرەتىنى بەلگىلى بولىپ وتىر.
تۇيىندەي ايتقاندا, مەملەكەت باسشىسىنىڭ «Ana tili» گازەتىنە بەرگەن سۇحباتى كوڭىلىمىزدەگى كەي كۇماندى سەيىلتىپ, ەلىمىزدىڭ ەرتەڭىنە دەگەن سەنىمىمىزدى نىعايتا ءتۇستى.