ماڭعىستاۋ وبلىسىندا كۇن, جەل جانە گاز ەنەرگياسىمەن جۇمىس ىستەيتىن 247 مۆت گيبريدتى ەلەكتر ستانتسياسى سالىنىپ جاتىر. بۇگىن ءماجىلىس دەپۋتاتتارى ەدىل جاڭبىرشين جانە سامات مۇساباەۆ وسى ستانتسيانىڭ قۇرىلىسىمەن تانىستى, دەپ حابارلايدى Egemen.kz.
نىسان قۇرىلىسى 2024 جىلى باستالعان. ول – «قازمۇنايگاز» ۇق جانە يتاليالىق «ENI» كومپانياسىنىڭ بىرلەسكەن جوباسى. باس مەردىگەر – «Hi-Teck «Qazaqstan» سەرىكتەستىگى.
ءماجىلىس دەپۋتاتى ەدىل جاڭبىرشين مەملەكەت باسشىسىنىڭ تاپسىرماسى بويىنشا ەلىمىزدە كومىرتەكتىك بەيتاراپتىق ستراتەگياسىن جۇزەگە اسىرۋ باستالعاندىعىن اتاپ ءوتتى.
«كۇن ەلەكتر ستانتسياسى 50 مۆت, جەل ستانتسياسى 77 مۆت جانە گاز ستانتسياسى – 120 مۆت قۋاتپەن جۇمىس ىستەيدى. گيبريدتى ستانتسيا جاڭاوزەن قالاسىنداعى كاسىپورىنداردى, مۇناي ءوندىرۋشى كومپانيالار مەن «قازمۇنايگاز» گاز وڭدەۋ زاۋىتىن ەلەكتر ەنەرگياسىمەن تۇراقتى تۇردە قامتاماسىز ەتەدى», دەدى ە.جاڭبىرشين.
قۇرىلىسشىلارمەن اڭگىمەلەسۋ بارىسىندا دەپۋتاتتار پارلامەنتتە قابىلدانعان زاڭداردىڭ جۇزەگە اسىرىلۋى جونىندە پىكىر الماستى. اسىرەسە, «جەر قويناۋى جانە جەر قويناۋىن پايدالانۋ» تۋرالى زاڭنىڭ ارتىقشىلىقتارىن ورتاعا سالىپ, بۇل قۇجاتتى پرەزيدەنتتىڭ قوعامدا ادىلدىك ورناتۋعا باعىتتاعانىنا نازار اۋداردى.
ايتا كەتۋ كەرەك, ماڭعىستاۋدا سالىنىپ جاتقان گيبريدتى ەلەكتر ستانتسياسى يننوۆاتسيالىق جوبا. ەلىمىزدە العاش رەت جۇزەگە اسىرىلىپ وتىر. ستانتسيا ىسكە قوسىلعان سوڭ 70 ادام جۇمىسپەن قامتىلادى. ايماقتى ەنەرگيامەن قامتاماسىز ەتۋدىڭ جاڭا كوزدەرى كومىرقىشقىل گازىنىڭ قالدىقتارىن ازايتادى. ستانتسيا قۇرىلىسىن 2025 جىلدىڭ ناۋرىز ايىندا اياقتاۋ جوسپارلانعان.