بۇگىن سەناتتا پرەزيدەنت تاپسىرماسىنا سايكەس ازىرلەنگەن جاڭا بيۋدجەت كودەكسىنىڭ جوباسى تانىستىرىلدى, دەپ جازادى Egemen.kz.
جيىندا جاڭا كودەكس بيۋدجەتتىڭ حالىقارالىق ستاندارتتار مەن قازىرگى زاماننىڭ سىن-قاتەرىنە ساي كەلەتىن اشىق, ءتيىمدى جانە يكەمدى جۇيەسىن قۇرۋ ماقساتىن كوزدەيتىنى تۋرالى ايتىلدى.
ۇلتتىق ەكونوميكا ۆيتسە-ءمينيسترى ازامات ءامريننىڭ ايتۋىنشا, جاڭا كودەكستىڭ باستى سيپاتى فيسكالدىق, سالىقتىق جانە اقشا-كرەديتتىك ساياساتتاردىڭ ۇيلەسىمدىلىگى بولىپ وتىر. وسى ماقساتتا رەسپۋبليكالىق جانە جەرگىلىكتى بيۋدجەتتەر, ۇلتتىق قور جانە كۆازيمەملەكەتتىك سەكتور سۋبەكتىلەرى اراسىنداعى قاتىناستاردى رەتتەيتىن جاڭا ءبولىم ەنگىزىلگەن. مەملەكەتتىڭ اكتيۆتەرى مەن مىندەتتەمەلەرىن بىرىكتىرۋ, ماقساتتى ترانسفەرتتەردى پايدالانۋ بويىنشا قاتاڭ ەرەجەلەر ەنگىزۋ جانە ولاردىڭ تيىمدىلىگىن باعالاۋ ولشەم-شارتتارىن بەلگىلەۋ ماڭىزدى شارالار رەتىندە اتاپ ءوتىلدى.
«جاڭا بيۋدجەت كودەكسى اشىقتىقتى ارتتىرۋ مەن ەسەپ بەرۋ ءىسىن جاپپاي ەنگىزۋگە باعىتتالعان. بۇل ماقساتتا بيۋدجەت دەرەكتەرىن جاريالاۋ, سالىقتىق شىعىندار تۋرالى ەسەپتەر ەنگىزۋ جانە ولاردىڭ تيىمدىلىگىن باقىلاۋ جوسپارلانىپ وتىر. جوسپارلاۋ راسىمدەرى وڭتايلاندىرىلىپ, مەرزىمدەر قىسقارتىلدى, ارتىق كەزەڭدەر الىنىپ تاستالدى. «بيۋدجەتتىك سۇرانىس» قۇرالى دامۋ جوسپارى مەن قارجىلىق ەسەپتەۋدى بىرىكتىرۋگە مۇمكىندىك بەرەدى», دەلىنگەن سەنات حابارالاماسىندا.
ال جەرگىلىكتى بيۋدجەتتەردىڭ قوسىمشا كىرىستەرى جولدار, تۇرعىن ءۇي-كوممۋنالدىق شارۋاشىلىق جانە باسقا دا ماڭىزدى جوبالارعا باعىتتالادى, سونداي-اق وڭىرلەردىڭ ينفراقۇرىلىمدىق دامۋى باسىمدىققا يە بولادى. رەفورما سوڭعى 14 جىلداعى وزگەرىستەردى ەسكەرە وتىرىپ, رەسۋرستاردى ءتيىمدى پايدالانۋ مەن قازاقستان ەكونوميكاسىن ورنىقتى دامىتۋعا باعىتتالعان.