قاراعاندى وبلىسىنىڭ دەنە شىنىقتىرۋ جانە سپورت باسقارماسى باسشىسىنىڭ مىندەتتەرىن ورىنداۋعا اتاقتى بوكسشى, وليمپيادا چەمپيونى جانە ۆەل باركەر كۋبوگىنىڭ يەگەرى سەرىك ساپيەۆ كىرىستى, دەپ حابارلايدى Egemen.kz وبلىس اكىمدىگىنىڭ ءباسپاسوز قىزمەتىنە سىلتەمە جاساپ.
ونىڭ كانديداتۋراسىن قر تۋريزم جانە سپورت مينيسترلىگىندە ارنايى كوميسسيا كەلىسكەننەن كەيىن تاعايىنداۋ تۋرالى وكىمگە ايماق باسشىسى ەرماعانبەت بولەكپاەۆ قول قويدى.
جاڭا باسشىنى سپورت قوعامداستىعىنا وبلىس اكىمىنىڭ ورىنباسارى وراز تاۋىربەكوۆ تانىستىردى.
«مەملەكەتتىك قىزمەت ىستەرى اگەنتتىگىنىڭ جانە تۋريزم جانە سپورت مينيسترلىگىنىڭ كەلىسىمى بويىنشا سەرىك جۇمانعالي ۇلى ساپيەۆ قاراعاندى وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى بولىپ كونكۋرستان تىس تاعايىندالدى. ونىڭ پراكتيكالىق داعدىلارى مەن ءبىلىمى ونىڭ جاڭا لاۋازىمداعى الەۋەتىن اشۋعا كومەكتەسەدى دەپ سەنەمىز», دەدى وراز تاۋىربەكوۆ.
وبلىس اكىمىنىڭ ورىنباسارى باسقارمانىڭ بۇرىڭعى جەتەكشىسى تەمىرحان ابىلاەۆقا اتقارعان قىزمەتى ءۇشىن العىسىن ءبىلدىردى.
سەرىك ساپيەۆ وعان سەنىم ارتقانى ءۇشىن العىسىن ءبىلدىرىپ, وبلىستا سپورتتى دامىتۋ ءۇشىن بار كۇش-جىگەرىن سالاتىنىن ايتتى.
«مەملەكەت باسشىسى ايتقانداي, بيلىكتىڭ ۆەرتيكالى قۇرىلۋى ءتيىس. الدا نازار اۋدارۋدى قاجەت ەتەتىن سپورت تۇرلەرى ەسكەرىلەتىن جاڭا زاڭ قابىلدانادى. قاراعاندى سپورتىنىڭ تاريحى زور ءارى داڭقتى. جەتەكشىلىك پوزيتسيانى قايتارۋ كەرەك. مەنىڭ ءوز جوسپارلارىم, يدەيالارىم بار. تۋعان جەرىمدى سپورتقا بەيىم ەتكىم كەلەدى. الدىمەن مەن بارلىق ۆەدومستۆولىق باعىنىستى ۇيىمداردى تىڭداپ, ولارمەن كەزدەسپەكشىمىن, ايماقتاردى ارالايمىن. ساپارلار قورىتىندىسى بويىنشا شەشىم قابىلدايمىز», دەپ سۇحباتىندا سەرىك ساپيەۆ جوسپارلارىمەن ءبولىستى.
سەرىك ساپيەۆ بىرنەشە بىلىكتىلىك بويىنشا جوعارى ءبىلىمى بار: «دەنە شىنىقتىرۋ پەداگوگى», «قۇقىقتانۋ», «مەملەكەتتىك جانە جەرگىلىكتى باسقارۋ», «سپورت مەنەدجمەنتى» ماماندىعى بويىنشا «بولاشاق» حالىقارالىق باعدارلاماسىنىڭ ستيپەندياتى.
ەڭبەك جولىن قازاقستان بوكس فەدەراتسياسىندا باستادى. «Astana Arlans» كاسىبي سپورت كلۋبىن باسقاردى. 2017 جىلى قر پارلامەنتى ءماجىلىسىنىڭ دەپۋتاتى بولىپ سايلاندى. 2019 جىلدىڭ قاڭتارىندا مەملەكەتتىك قىزمەتكە اۋىستى – ءۇش جىلعا جۋىق قر مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتىن باسقاردى. سودان كەيىن قر ۇلتتىق وليمپيادا كوميتەتى باس حاتشىسىنىڭ ورىنباسارى قىزمەتىن اتقاردى. 2022 جىلدىڭ ساۋىرىنەن باستاپ وسى تاعايىنداۋعا دەيىن «MTEX management» جشس سپورتتى دامىتۋ جونىندەگى باسقارۋشى ديرەكتورى بولىپ جۇمىس ىستەدى, قر ۇلتتىق وليمپيادا كوميتەتىنىڭ ۆيتسە-پرەزيدەنتى بولىپ تابىلادى.