تۇركىستان قالالىق ەمحاناسىندا ايماقتىق قىزمەتكەرلەردىڭ جۇمىس جۇكتەمەسىن ازايتۋ, حالىقپەن حابارلاسۋدىڭ تيىمدىلىگىن ارتتىرۋ ماقساتىندا جاساندى ينتەللەكت كومەگى ەنگىزىلگەن. بۇل ءوز كەزەگىندە مەيىرگەرلەردىڭ ۋاقىتىن, جۇمىس كۇشىن ۇنەمدەۋگە كومەكتەسەدى. جاساندى ينتەللەكت پاتسيەنتتەردى دارىگەردىڭ قابىلداۋىنا, سكرينينگتىك تەكسەرۋدەن وتۋگە, فليۋوروگرافيا-رەنتگەنگە تۇسۋگە, بالالاردى ەكپە الۋعا شاقىرادى.
سكرينينگتىك تەكسەرۋلەردەن ءوتۋ, پروفيلاكتيكالىق ەكپەلەر الۋ, تاعى باسقا دا سەبەپتەرمەن ەمحاناعا كەلۋى قاجەت ازاماتتاردىڭ اتى-ءجونى, بايلانىس نومىرلەرى روبوتقا ەنگىزىلەدى. جاساندى ينتەللەكت ءار پاتسيەنتكە حابارلاسىپ, ايقىنداۋىش سۇراقتار قويۋ ارقىلى تەكسەرۋلەرگە شاقىرادى. بۇل جاعداي وپەراتورلارمەن باقىلاۋدا بولىپ, كۇندەلىكتى وزەكتەندىرىلىپ وتىرادى. قابىلداۋعا كەلگەندەر تىزىمنەن ءوشىرىلىپ, ەكپىن باسقا ازاماتتارعا بەرىلەدى.
«مەملەكەت باسشىسى قاسىم-جومارت توقاەۆ قازاقستان حالقىنا ارناعان جولداۋىندا ۇلت ساۋلىعىن نىعايتۋ ءۇشىن كەشەندى جۇمىستاردى جۇزەگە اسىرۋ, دەنساۋلىق ساقتاۋ سالاسىنداعى دارىگەرلىك كومەكتىڭ قولجەتىمدىلىگى مەن ساپاسىن جاقسارتۋ, دامىتۋ قاجەتتىگىن اتاپ ءوتتى. سونداي-اق پرەزيدەنت تسيفرلاندىرۋ سالاسىندا قول جەتكىزگەن جەتىستىكتەردى ەسەلەي ءتۇسۋ, ەلىمىز جاساندى ينتەللەكتىنى كەڭىنەن قولداناتىن, تسيفرلىق تەحنولوگيالاردى دامىتىپ جاتقان ەلگە اينالۋى قاجەتتىگىن ايتتى. بۇل باعىتتا قالالىق ەمحانادا جۇزەگە اسىرىلىپ جاتقان يننوۆاتسيالىق جۇمىستار از ەمەس. الداعى ۋاقىتتا جاساندى ينتەللەكتىنى اقپاراتتىق جۇيەمەن بايلانىستىرۋ جوسپارلانعان. ول جۇزەگە اسقان جاعدايدا, تىكەلەي پاتسيەنتپەن سويلەسۋ ارقىلى وعان ىڭعايلى ۋاقىتقا – كۇنىن, ساعات, مينۋتىنا دەيىن كورسەتىپ جازۋعا مۇمكىندىك تۋادى. ەگەر پاتسيەنت قابىلداۋعا كەلە الماي قالعان بولسا, جاساندى ينتەللەكت اۆتوماتتى تۇردە قايتا بايلانىسقا شىعادى. «نەگە كەلە المادىڭىز؟», ء«سىزدى قايتا قاي كۇنگە, قاي ۋاقىتقا جازايىق؟» دەپ سۇراپ, دارىگەر قابىلداۋىنا قايتا جازادى. بۇل ەندى الداعى ۋاقىتتىڭ ەنشىسىندەگى جۇمىستار. قازىر ءبىز ءبىرىنشى كەزەڭگە قاتىستى جۇمىس جۇرگىزىپ جاتىرمىز», دەيدى تۇركىستان قالالىق ەمحاناسىنىڭ باسشىسى رايىمبەك تاسىرباەۆ.
ەمحاناداعى جاساندى ينتەللەكتىنىڭ مينۋتىنا 5 مىڭ, ال كۇنىنە 100 مىڭ ازاماتقا حابارلاسۋعا قۋاتى جەتەدى ەكەن. بۇگىنگە دەيىن 3 اي كولەمىندە 27 769 ازاماتقا قوڭىراۋ شالعان. ونىڭ ىشىندە 7500 ازامات كەلىسىم بەرىپ, تەكسەرۋدەن وتكەن. ال 2929-ى قابىلداۋعا كەلۋدەن باس تارتقان. ازاماتتارمەن حابارلاسۋدىڭ ورتاشا ۇزاقتىعى ءبىر مينۋت كولەمىندە. سونداي-اق ەمحانا باسشىسى مەديتسينا سالاسىنداعى اقپاراتتىق جۇيەلەردى عانا ەمەس, كەڭ تاراعان «Google» پلاتفورماسىنداعى Excel كەستەسى تەتىكتەرىن پايدالانىپ جاتقانىن ايتادى.
«دەنى ساۋ انا – دەنى ساۋ ۇرپاق!» ۇستانىمىن ەسكەرەتىن بولساق, ەڭ الدىمەن انانىڭ جۇكتىلىككە دەيىنگى حال-جاعدايى وتە ماڭىزدى بولىپ كەلەدى. وسى تۇرعىدا ايەلدەردىڭ اقپاراتتارى كونفيدەنتسيالدى تۇردە جۇرگىزىلىپ, مەديتسينا سالاسىنداعى اقپاراتتىق جۇيەلەردى ءوزارا ۇشتاستىردىق. «Google Docs» باعدارلاماسى ارقىلى ونلاين رەجىمدە ايەلدەردىڭ, ونىڭ ىشىندە تۋ جاسىنداعى ايەلدەر مەن جۇكتى ايەلدەردىڭ دەنساۋلىقتارىن باقىلاۋ مۇمكىنشىلىگىمىز بار. ياعني بارلىق ايەلدىڭ دەرەكتەرىن سول «Google Docs» باعدارلاماسىنا ەنگىزگەنبىز. زەرتحانالىق, اسپاپتىق تەكسەرۋلەر, بەيىندى مامانداردىڭ كونسۋلتاتسيالارى, ايەلدەردىڭ دەربەس ەرەكشەلىكتەرى تۋرالى دا اقپارات ەنگىزىلەدى. ءار دارىگەر, ءار مەيىرگەر قاراۋىنداعى ايەلدىڭ مالىمەتىن بازاعا ەنگىزە الادى. مالىمەتتىڭ تولىققاندىلىعى, دايەكتىلىگى ءبىرىنشى ورىندا بولادى. ءبىز ونى كورىپ وتىرامىز. بۇگىنگە دەيىن قاي ايەل قارالدى, قايسىسى قارالمادى دەگەن سۇراقتارعا تەز ءارى وڭاي جاۋاپ الا الامىز. سول ونلاين رەجىمدەگى كەستە ارقىلى باقىلاۋ جۇرگىزەمىز. بۇل ءوز كەزەگىندە مونيتورينگ جاساۋعا, سىني جاعدايداعى ايەلدەردىڭ, اۋىر جاعدايدا اۋرۋحاناعا جەتكىزىلەتىن جۇكتى ايەلدەردىڭ سانىن ازايتۋعا كومەكتەسەدى. انا مەن بالا ءولىمىنىڭ الدىن الۋعا مۇمكىندىك بەرەدى. وسىلايشا, جۇكتى ايەلدەردىڭ جاعدايىن باقىلاۋ ەڭ ءبىرىنشى ورىنعا قويىلعان», دەيدى ەمحانا باسشىسى.
تسيفرلاندىرۋداعى مۇنداي جۇمىس ازىرگە قالالىق ەمحانادان باسقا ەشبىر مەديتسينالىق مەكەمەدە جوق ەكەن. بۇل جاڭاشىلدىق ايەلدەردىڭ اۋىر جاعدايدا پەريناتالدىق ورتالىقتارعا ءتۇسۋى, ەرتە بوسانۋدىڭ ازايۋىنا الىپ كەلىپ وتىر.
قالالىق ەمحاناعا كەلۋشى ازاماتتارعا مەديتسينالىق قىزمەتتى پايدالانۋ ىڭعايلى ءارى ساپالى بولۋى ءۇشىن پاتسيەنت مارشرۋتى بارىنشا جەڭىلدەتىلگەن. وعان قوسا كولل-ورتالىعى جۇمىس ىستەيدى. ناتيجەسىندە, ەمحانادا كەلۋشىلەر دارىگەر قابىلداۋىن كۇتىپ, ۇزىن-سونار كەزەكتە وتىرمايدى. سونداي-اق ايماقتىق دارىگەردىڭ جۇكتەمەسىن ازايتۋ ماقساتىندا كەڭەيتىلگەن پراكتيكاداعى مەيىرگەرلەر جۇمىسى ىسكە قوسىلعان. ناتيجەسىندە, ازاماتتار بارلىق قاعازباستى جۇمىستارىن مەيىرگەر كومەگىمەن تىندىرادى. وعان قوسا زەرتحانالىق, اسپاپتىق تەكسەرۋلەرگە جولداما سىندى قىزمەتتەر دە ايماقتىق مەيىرگەر كومەگىمەن ورىندالادى, دارىگەردىڭ جۇكتەمەسى ازايادى. وسىلايشا, ايماقتىق دارىگەردىڭ قابىلداۋىن قاجەت ەتەتىندەر, ياعني اۋىرىپ كەلگەندەر, سوزىلمالى اۋرۋدىڭ ءورشۋ ساتىسىندا ەمىنە كوررەكتسيا تالاپ ەتەتىن ازاماتتار كەدەرگىسىز كومەك الا الادى.
«ەمحانادا ەنگىزىلگەن جاڭاشىلدىقتاردىڭ, جۇيەلى جۇمىستاردىڭ قانشالىقتى ناتيجەلى بولعاندىعىن وتكەن جىلدىڭ جانە بيىلعى جىلدىڭ 9 ايىنداعى جالپى تاجىريبەلىك دارىگەرلەر مەن مەيىربيكەلەردىڭ قابىلداۋ سانىن سالىستىرىپ قاراعاندا اڭعارۋ قيىن ەمەس. وتكەن جىلدىڭ 9 ايىندا ايماقتىق دارىگەرلەر – 155647, مەيىرگەرلەر 5647 قىزمەت كورسەتكەن. بۇل جالپى قىزمەتتىڭ 3 پايىزىن قۇرايدى. بيىل 9 ايدىڭ قورىتىندىسىندا ايماقتىق دارىگەرلەردىڭ ەنشىسىندە 159557 قىزمەت بولسا, مەيىرگەرلەر تاراپىنان كورسەتىلگەن قىزمەت سانى 32271-گە جەتتى, بۇل جالپى قىزمەتتىڭ 20 پايىزىن قۇرايدى. كەيىنگى ءۇش جىلدىڭ 9 ايلىق كورسەتكىشتەرىن سالىستىرا وتىرىپ, جىلدان-جىلعا اۋرۋ كورسەتكىشتەرىنىڭ تومەندەگەنىن انىقتاي الامىز. مىسالى, ءبىرىنشى ينسۋلت جاعدايلارى 2022 جىلى – 85, 2023 جىلى – 73, 2024 جىلى – 70. ال قايتالاما ينسۋلت الۋشىلار 2022 جىلى – 51, 2023 جىلى – 40, 2024 جىلى 38 جاعدايعا دەيىن ازايعان. ميوكارد ينفاركتىسى 2022 جىلى – 40, 2023 جىلى – 38, 2024 جىلى – 39 جاعداي. ال قايتالاما ميوكارد ينفاركتىسى 2022 جىلى – 8, 2023 جىلى – 6, 2024 جىلى 5 جاعدايعا دەيىن تومەندەگەن», دەيدى ر.تاسىرباەۆ.
ەمحانادا ازاماتتارمەن كەرى بايلانىستىڭ قولجەتىمدىلىگى ءۇشىن تەلەگرام-بوت (@turkistanpoliklinicabot) ەنگىزىلگەن. وندا ەمحانا تۋرالى بارلىق اقپاراتتى الۋعا بولادى. حالىق اراسىندا ءجيى قويىلاتىن سۇراقتاردىڭ جاۋابىن الۋ وڭايلاتىلعان. بوتقا وڭاي قوسىلۋ ءۇشىن QR-كودتار قالالىق ەمحانانىڭ بارلىق بولىمشەلەرىندە قولجەتىمدى جەرلەرگە ىلىنگەن. ياعني كەرى بايلانىس جىلدام جۇرگىزىلەدى. وسى ارقىلى بيىل 51 ءوتىنىم كەلىپتى. ونىڭ باسىم كوپشىلىگى اقپاراتتىق سۇراقتار. جالپى, وتكەن جىلى 9 ايدا – 2, بيىل 9 ايدا 2 ارىز-شاعىم تۇسكەن. ەمحانا باسشىسىنىڭ مالىمدەۋىنشە, زەردەلەۋدىڭ قورىتىندىسىندا بيىلعى ارىزدىڭ ەكەۋى دە نەگىزسىز دەپ تانىلعان.
تۇركىستان