جازۋشى ءشاربانۋ بەيسەنوۆانىڭ «سۇزگەنىڭ سوڭعى كۇندەرى» جانە «بوزوق ارۋى» اتتى شىعارمالارى تۇرىك وقىرماندارىنا جول تارتتى. كىتاپ تانىستىرىلىمىن تۇركيا رەسپۋبليكاسىنىڭ قازاقستانداعى ەلشىلىگى جانە يۋنۋس ەمرە تۇرىك مادەنيەت ورتالىعى بىرىگىپ ۇيىمداستىردى.
ءىس-شاراعا تۇركيانىڭ قازاقستانداعى توتەنشە جانە وكىلەتتى ەلشىسى مۇستافا كاپۋدجۋ, جازۋشى ءشاربانۋ بەيسەنوۆا, شەتەلدىك ديپلوماتتار, جازۋشىلار, قازاق جانە تۇرىك عالىمدارى مەن ادەبيەتسۇيەر قاۋىم قاتىسىپ, تۋىندىنىڭ تۇپكى ويى تۋرالى پىكىرلەرىن ورتاعا سالدى.
تۇركيانىڭ قازاقستانداعى توتەنشە جانە وكىلەتتى ەلشىسى مۇستافا كاپۋدجۋ قۇتتىقتاۋ سوزىندە تۇركى الەمىنىڭ بىرلىگى مەن ورتاق ءىس-ارەكەتتەرىنىڭ ىلگەرى دەڭگەيگە جەتۋى ورتاق باسىلىمدار مەن ءتىل بىرلىگىن ورناتۋ ارقىلى عانا مۇمكىن بولاتىنىن جەتكىزدى. وسى ورايدا ەلشى قازان ايىندا ورتاق تۇركى ءالفاۆيتى قابىلدانۋى ماڭىزدى قادام ەكەنىن ايتىپ, ءدال وسى تۇستا جازۋشىلاردىڭ تۋىس حالىققا ورتاق شىعارمالارى كوبەيگەنى قۇپتارلىق ءىس ەكەنىن العا تارتتى. «اۆتوردىڭ «سۇزگەنىڭ سوڭعى كۇندەرى» جانە «بوزوق ارۋى» كىتابىنداعى حيكاياتتار دا قازاق مادەنيەتى مەن تاريحىنان ءنار العان ايەل كەيىپكەرلەردى وقىرمانعا تەرەڭ ماعىنادا تانىتا بىلگەن. بۇل شىعارمالار قازاق قوعامىنىڭ قايسارلىق ءرامىزى – ايەلدەرگە دەگەن قۇرمەتىن كورسەتەدى», دەدى ول.
سۇزگە حانىم وقىرمانىن كۇرەسكەرلىگىمەن, كىشىپەيىلدىلىگىمەن, جارىنا جانە ءوز ۇلتىنىڭ قۇندىلىقتارىنا دەگەن ادالدىعىمەن باۋرايدى. تۇرىكشەگە اۋدارىلعان شىعارما تۋرالى جاساعان بايانداماسىندا تۇركيانىڭ قازاقستانداعى ەلشىلىگىنىڭ مادەنيەت جونىندەگى كەڭەسشىسى ءزۇلفۇ تومان وسىلاي دەيدى. ونىڭ سوزىنشە, گروزانىڭ باسقىنشىلىعىنا تويتارىس بەرگەن سۇزگەنىڭ كۇيەۋى كوشىم حاننىڭ ءومىرى سوڭىنا دەيىن ارپالىسپەن وتكەن ازاپتى كۇرەسى, سۇزگەنىڭ قورشاۋدا قالعان شاعىن قامالىندا كورسەتكەن قارسىلىعى وقىرماننىڭ جان-دۇنيەسىندە ۇلكەن داۋىل تۋدىرادى.
ال قازاق ۇلتتىق ونەر ۋنيۆەرسيتەتىنىڭ پروفەسسورى روزا مۇقانوۆا «سۇزگەنىڭ سوڭعى كۇندەرى» حيكاياتىنداعى سۇزگەنىڭ قايراتكەرلىگىن ايرىقشا اتاپ ءوتتى. «سۇزگەنىڭ ەل باسىنا كۇن تۋعانداعى ءساتى, الاپات جان-دۇنيەسى, تۇڭعيىققا باتىپ بارا جاتىپ جان ۇشىرعان تراگەديالىق تاعدىرى. سوڭعى دەمىنە دەيىن حان بۇيرىعىن, حان شەشىمىن كۇتۋى شىعارمانى شيرىقتىرا, شيەلەنىستىرە تۇسەدى. تۇركى حالقىنا ورتاق مادەنيەت, ورتاق سالت-ءداستۇر, بەكزادالىق, جارىنا ادالدىق, جاۋاپكەرشىلىك قاشاندا سالتانات قۇرعان. ول سۇزگە حانىمنىڭ بەينەسىن اسقاقتاتىپ, كۇرەسكەرلىگىن, باتىل شەشىم قابىلدايتىن قايراتكەرلىگىن ايگىلەيدى. شىعارما وسى تۇسىمەن ىرگەلى, سۇبەلى ادەمى كوركەم بەينە جاساعان», دەپ توبىقتاي ءتۇيىنىن جەتكىزدى.
ەۋرازيا ۇلتتىق ۋنيۆەرسيتەتىنىڭ تۇرىك ءتىلى وقىتۋشىسى حايرۋننيسا توپچۋ سۇزگە حانىمدى كەيىپكەر رەتىندە دارالاپ, حيكاياداعى باسقا ايەل كەيىپكەرلەرىنەن وزگەشە قىلاتىن قىرىنا توقتالدى. ول تۇركى قىزدارىنا ءتان باتىلدىق, ىزگىلىك, دانالىق جانە ەركىندىككە دەگەن قۇلشىنىستى كورگەنىن, سۇزگەنىڭ بويىنداعى وسى ءبىر دارالىق تۇركى قىزدارىنىڭ تاريحي ءرامىزى ەكەنىنە توقتالدى.
تانىستىرىلىم كەشىنە كەلگەن قاتىسۋشىلار اراسىندا دا سوناۋ كوك تۇرىكتەر قاعاناتى تاريحىنداعى ايەلدەردىڭ ساياسي ورنى مەن اسكەري ارەكەتتەردى يگەرىپ, بيلىككە ىقپال ەتكەنى تۋرالى پىكىر ۇزاققا جالعاستى. ءتىپتى ءىس-شارانىڭ سوڭىندا اۆتوردان قولتاڭبا العان وقىرماندار سۇزگەنىڭ دانالىعى مەن قايراتكەرلىك قاسيەتىن تامسانا تىڭدادى. تاريح قويناۋىندا قالعان كۇرەسكەر ايەلدىڭ تاباندىلىعى بۇگىنگى ۇرپاقتىڭ بويىندا جالعاسىن تاپسا, اۆتوردىڭ ايتارى وقىرمان جۇرەگىنەن ويىپ ورىن العانى.