پاۆلودار وبلىسىندا مەكتەپ كىتاپحاناشىلارى تاجىريبە الماستى

بۇل سەمينار 2022 جىلدان بەرى باستاۋ الىپ, داستۇرگە اينالعان. ءىس-شارانىڭ ماقساتى – كىتاپحاناشىلاردىڭ كاسىبي قارىم-قاتىناسىن نىعايتۋ, ۇزدىك جۇمىس ادىستەرىمەن ءبولىسۋ جانە مەكتەپ كىتاپحانالارىنا تسيفرلىق تەحنولوگيالاردى ەنگىزۋ.

سەمينار بارىسىندا پاۆلودار وبلىسىنىڭ ءبىلىم بەرۋ باسقارماسىنىڭ باسشىسى سامال ايتكازينا كىتاپحاناشىلارمەن پىكىر الماسىپ, ولاردىڭ جوبالارى وقۋشىلاردىڭ بىلىمگە دەگەن قىزىعۋشىلىعىن ارتتىرۋداعى ماڭىزدى ءرولىن اتاپ ءوتتى. كىتاپحانا ىسىندە جوبالاردىڭ جۇزەگە اسۋىنا باعىت-باعدار بەردى. سەمينار بەس تاقىرىپتىق الاڭدا ۇيىمداستىرىلدى, ولاردىڭ ارقايسىسى وقۋشىلاردىڭ قىزىعۋشىلىعىن ارتتىرۋ, زەرتتەۋشىلىك داعدىلارىن دامىتۋ جانە زياتكەرلىك قابىلەتتەرىن قالىپتاستىرۋعا باعىتتالدى. «كىتاپ الەمىندە مۇمكىن ەمەس نارسە جوق...» دەپ اتالعان الاڭدا  №3 دارىندى بالالار گيمنازياسىندا كوپتىلدى جاعدايداعى وقۋشىلاردىڭ وقۋ داعدىلارىن دامىتۋ ادىستەرى ۇسىنىلدى.

قاتىسۋشىلار قازاق ادەبيەتى جانە الەم ادەبيەتىنە ارنالعان بيبليوپەرفومانسقا, «مەن كىتاپتى بەينەلەيمىن» ارت-گالەرەياسىنا ەكسكۋرسيا جاساپ, ء«داۋىردىڭ ادەبي كۋاگەرى» اتتى كرەاتيۆتى جوبا ۇسىندى.اباي اتىنداعى دارىندى بالالار گيمنازياسىندا  «كىتاپحانا – ءبىلىم مەن عىلىم ورتالىعى» اتتى الاڭدا «كەيىپكەرلەر قوناعىندا» كورمەسىن جانە «كىتاپ اتاۋىن تاپ» ينتەراكتيۆتى لوگيكالىق الاڭىن ۇيىمداستىرىپ, كىتاپحانانى ءبىلىم بەرۋ پروتسەسىنىڭ ورتالىعى رەتىندە كورسەتتى. 

باۋىرجان مومىش ۇلى اتىنداعى ورتا مەكتەپتە «كىتاپحانا جۇمىسىنداعى جاڭا فورماتتى ادىستەر» الاڭىندا  وقۋشىلاردىڭ زەرتتەۋ جانە قولدانبالى داعدىلارىن دامىتۋعا ارنالعان تاسىلدەر ۇسىنىلدى. قوناقتار «Gamma App» پلاتفورماسىمەن, جاساندى ينتەللەكت ەلەمەنتتەرىمەن جانە كوركەم ادەبيەت شىعارمالارى بويىنشا «Q Talks» جوباسىمەن تانىستى.

ا.بايتۇرسىن ۇلى اتىنداعى مەكتەپتە ء«بىلىم سينەرگياسى: كىتاپحانا جانە بەلسەندىلىك» اتتى جوباسى تالقىلانىپ, وقىرمانداردى قولداۋ ماسەلەلەرى قارالدى. «قۋانا وقيتىن مەكتەپ» جوباسى جانە «READx» ۆوركشوپى سياقتى يدەيالار ۇسىنىلدى. 

«زاماناۋي وقىرمانعا ارنالعان زاماناۋي كىتاپحانا» اتتى الاڭ №7 مەكتەپتە ءوتتى. بۇل جەردە اعىلشىن ادەبي كەيىپكەرلەرى بويىنشا ۆيكتورينا جانە «كىتاپتار سويلەيدى» كەزدەسۋى ۇيىمداستىرىلدى. بۇل وقىرمانداردىڭ قىزىعۋشىلىقتارىن وياتۋعا باعىتتالعان الاڭ بولدى.

«سەمينار بارىسىندا BOOK SLAM جوباسى ۇسىنىلدى. بۇل جوبا وقۋشىلار اراسىندا كىتاپ وقۋدى ناسيحاتتاۋعا باعىتتالعان. جەلتوقسان ايىنان باستاپ BOOK SLAM قالانىڭ جانە وبلىس اۋداندارىنىڭ مەكتەپتەرىندە وتكىزىلمەك. 2025 جىلدىڭ مامىر ايىندا بايقاۋ قورتىندىسى بولادى», دەيدى پاۆلودار وبلىسىنىڭ ءبىلىم بەرۋ باسقارماسىنىڭ مەكتەپكە دەيىنگى جانە جالپى ورتا ءبىلىم بەرۋ ءبولىمىنىڭ باسشىسى نۇرگۇل ازانباەۆا. 

ايتا كەتسەك, BOOK SLAM (بۋكسلەم) – بۇل كىتاپتى كوپشىلىككە ناسيحاتتاۋ ماقساتىنداعى ەڭ ۇزدىك پرەزەنتاتسياعا ارنالعان شىعارماشىلىق بايقاۋ. قاتىسۋشىلار كىتاپقا دەگەن قىزىعۋشىلىقتى ارتتىراتىن جارنامالاردى دايىنداپ, تۋىندىنى ەرەكشە فورماتتا تانىستىرۋدا باق سىناسادى. 

«بۇل سەمينار مەكتەپ كىتاپحانالارىنىڭ دامۋىنا ۇلەس قوسىپ, وقۋ پروتسەسىنە ىقپالىن ارتتىرادى جانە جاڭا بۋىن وقىرمانداردى شابىتتاندىرۋعا كومەكتەسەدى», دەيدى شارباقتى اۋدانىنىڭ اباي قۇنانباەۆ اتىنداعى مەكتەپ كىتاپحاناشىسى سامال سادۋاقاسوۆا.

فورسايت-سەسسيامەن اياقتالعان سەميناردا مەكتەپ كىتاپحاناسىنىڭ  كەلەشەگى تۋرالى ءسوز قوزعالدى. سەمينار سونىڭدا ءوز تاجىريبەلەرىمەن بولىسكەن كىتاپحاناشىلارعا جانە بارلىق قاتىسۋشىلارعا سەرتيفيكاتتار تابىستالدى.