استانا. 30 قاڭتار. تاتارستاندا بۇگىن مىڭداعان مۇسىلمان جاماعاتى فرانتسۋزدىڭ Charlie Hebdo ساتيرالىق اپتالىعىندا جاريالانعان مۇحاممەد پايعامبارعا سالىنعان كاريكاتۋرالارعا قارسىلىق بەلگىسى رەتىندە جاپپاي شەرۋگە شىعادى. بۇل تۋرالى تاسس حابارلادى.
تاتارستان مۇسىلمان ءدىني باسقارماسىنىڭ ءباسپاسوز حاتشىسى احماد حاليكوۆ اگەنتتىك تىلشىسىنە بەرگەن مالىمەتىندە «مەن پايعامباردى جاقسى كورەمىن» دەگەن ۇرانمەن وتەتىن اكتسيانىڭ الەمدەگى يسلاموفوبياعا, كاريكاتۋرالارعا قارسى جاسالاتىن بەيبىت قوزعالىس بولاتىنىن ايتتى. «ءبىز مۇحاممەد عالايس-سالامعا قۇرمەتىمىز بەن سۇيىسپەنشىلىگىمىزدى بىلىدرە وتىرىپ, جۇرتتى قانداي ءدىندى ۇستاناتىندىعىنا قاراماستان, وزگەلەردىڭ ءدىني سەنىمدەرىن سىيلاۋعا شاقىرامىز», - دەدى ول.
حاليكوۆتىڭ ايتۋىنشا, 30 قاڭتار كۇنى تاتارستانداعى بارلىق مەشىتتەردە وتەتىن جۇما نامازىنان كەيىن مۇسىلماندارعا پايعامباردىڭ ءومىرى مەن ءىسى جونىندە ۋاعىز ايتىلادى. مەشىتتەردىڭ الدىندا «مەن پايعامباردى جاقسى كورەمىن» دەگەن ۇران تاتار, ورىس جانە اراب تىلدەرىندە جازىلىپ تۇرادى. بۇلاردىڭ جاندارىندا شاعىن جالاۋلار بولادى.
«تاتارستاندا قازىر 1,5 مىڭ مەشىت بار. ءبىز وسىلاردىڭ كەم دەگەندە ۇشتەن ءبىرىن قامتيمىز. ولار قالالار مەن اۋداندار ورتالىقتىندا ورىن تەپكەن. بۇل حرامدارعا مىڭداعان ادامدار بارادى», - دەدى حاليكوۆ.
بۇدان بۇرىن مۇنداي اكتسيالار داعىستاندا, ينگۋشەتيادا جانە گروزنىيدا ءوتىپ ەدى. شەشەنستان استاناسىندا شاراعا 1,5 ملن.-عا جۋىق ادام قاتىستى.
مۇرات ايتقوجا.
دەرەك, فوتو: تاسس.