سەمەيدەگى تاتار قوعامدىق ورتالىعىنىڭ مۇراجايىنا جەرگىلىكتى تۇرعىنداردىڭ ءبىرى ءوز اتاسىنان مۇراعا قالعان قۇران كىتابىن تاپسىردى. ونىڭ كولەمى سىرىڭكەنىڭ قورابىنداي عانا ەكەن. جادىگەردىڭ تاعى ءبىر باستى ەرەكشەلىگى رەتىندە ونىڭ كەلەسى بەتىندە ۇلعايتقىش اينەك ورنالاستىرىلعانىن ايتۋعا بولادى. وسى قۇرىلعى ارقىلى كىتاپ قيىندىقسىز وقىلادى. ال ۇلعايتقىش قۇرالسىز ونداعى جازۋلاردى وقۋ مۇمكىن ەمەس. ونىڭ سىرتقى مۇقاباسى تازا مىستان جاسالعاندىقتان, ارىپتەرى وتە جاقسى ساقتالعان.
بۇل كىتاپتى العاش كورگەندە تاڭعالعان مۇراجاي جەتەكشىسى شاۋقات فايزۋللين: «مەن ومىرىمدە ءبىرىنشى رەت وسىنداي كىپ-كىشكەنتاي قۇران كىتابىن كورىپ تۇرمىن. كىتاپتىڭ كولەمى شاعىن بولعاندىقتان, پايدالانعان ادامدار ونى قالتاعا سالىپ نەمەسە مويىنعا تۇمار رەتىندە ءىلىپ جۇرگەن بولار, بالكىم. ال ۇلعايتقىش ارقىلى ونداعى كەز كەلگەن سۇرەنى قيىندىقسىز وقي الامىز», – دەيدى.
قازىرگى تاڭدا مۇراجايعا كەلۋشىلەر وسى جادىگەرگە كوبىرەك نازار اۋدارادى ەكەن. كىتاپتى تابىس ەتكەن قالا تۇرعىنى دا كۇندە كەلىپ, وعان كوز سالىپ كەتەتىن كورىنەدى. وسىلايشا, 100 جىلعا جۋىق ۋاقىت ءبىر وتباسىنىڭ عانا قۇندى زاتى بولىپ كەلگەن جادىگەر جاماعاتقا ورتاق دۇنيەگە اينالدى.
ىرىسبيكە بۇركىتقىزى,
№57 مەكتەپ مۇعالىمى.
استانا.