كەشە ورتالىق كوممۋنيكاتسيالار قىزمەتىندە مەملەكەتتىك اۋەجايلار جەلىسىن دامىتۋ تاقىرىبىندا بريفينگ ءوتتى. وعان «Airport Management Group» كومپانياسىنىڭ باس ديرەكتورى كلود بانان مەن ونىڭ ورىنباسارى اسقار مۇراتباەۆ جانە قۇقىقتىق دەپارتامەنت ديرەكتورى داۋرەن شارىپباەۆ قاتىستى.
«قازاقستان تەمىر جولى» ۇك» اق قۇرىلىمىندا اۋەجايلاردى باسقارۋدىڭ ارنايى كومپانياسى رەتىندە قۇرىلعان «Airport Management Group» جشس حولدينگىنىڭ قاراماعىنا 11 اۋەجايدى شوعىرلاندىرۋ جوسپارلانىپتى. «بىلتىر استانا, كوكشەتاۋ, پەتروپاۆل, قوستاناي, شىمكەنت, قىزىلوردا اۋەجايلارى 7 جىلدىق مەرزىمگە «Airport Management Group» كومپانياسىنىڭ سەنىمدى باسقارۋىنا بەرىلدى. ءبىزدىڭ نەگىزگى مىندەتىمىز – اۋەجايلاردا حالىقارالىق تالاپتارعا ساي قاۋىپسىزدىك جۇيەلەرىن ەنگىزۋ, حالىققا قىزمەت كورسەتۋ ساپاسىن ارتتىرا وتىرىپ, اۋەجايلاردىڭ ينفراقۇرىلىمىن دامىتۋ بويىنشا ۇزاق مەرزىمدى جوسپار قۇرۋ. ايتقانداي, جالپى باسقارۋشى كومپانيانىڭ قاراماعىنا 11 اۋەجايدى شوعىرلاندىرۋ جوسپارلانعان. جوعارىدا ايتىلعان اۋەجايلار قاتارىنا تاعى اتىراۋ, اقتوبە, پاۆلودار, وسكەمەن جانە سەمەي اۋەجايلارىنىڭ اكتيۆتەرىن سەنىمدى باسقارۋعا الۋ كوزدەلگەن», دەدى ك.بانان.
ەل اۋەجايلارىنىڭ بىرقاتارىنا ءىرى كولەمدە ينۆەستيتسيالار تارتىلىپ, سالىنباق كورىنەدى. «مەملەكەت باسشىسىنىڭ «نۇرلى جول» جولداۋىندا اۋەجايلاردى دامىتۋعا زور كوڭىل بولىنگەن. وسىعان بايلانىستى, 2015-2017 جىلدار ارالىعىندا استانا, قىزىلوردا, پەتروپاۆل, قوستاناي اۋەجايلارىنىڭ ينفراقۇرىلىمىن دامىتىپ, ۇشىپ-قونۋ الاڭدارىن, جولاۋشىلار تەرمينالىن جاڭعىرتۋ بويىنشا ءىرى جوبالار جۇزەگە اسىرىلادى. استاناداعى حالىقارالىق اۋەجايدا جاڭا جولاۋشىلار تەرمينالى سالىنادى. ال ەسكىسى ىشكى رەيستەرگە ارنالاتىن بولادى. سونىمەن قاتار, شىمكەنت اۋەجايىنىڭ دا جاڭا جوباسى باستالدى. ال, پەتروپاۆل مەن قوستاناي اۋەجايلارىندا دا وسىنداي جۇمىستار جۇرگىزىلەدى. اتاپ ايتقاندا, جولاۋشىلار تەرمينالى جوندەۋدەن وتكىزىلىپ, ۇشۋ-قونۋ جولاقتارى جاڭعىرتىلادى. وسىندا اتالعان اۋەجايلاردىڭ ينفراقۇرىلىمىنا سالىناتىن ينۆەستيتسيالاردىڭ جالپى قۇنى 99 ملرد. تەڭگە بولادى», دەدى كومپانيانىڭ باس ديرەكتورى.
استانا اۋەجايىنداعى جولاۋشىلاردى تاماقتاندىرۋ ساپاسىن جاقسارتۋ ماسەلەسى دە نازارعا ىلىكتى. جاۋاپتى كومپانيا وسى سالانى الەمدىك دارەجەدەگى ماماندارعا تاپسىرىپ, جوعارى دارەجەدە قىزمەت كورسەتۋدى ءجون ساناپتى. «بيىل نەگىزگى باسىمدىق قىزمەت كورسەتۋدىڭ حالىقارالىق ستاندارتتارىنا وتۋگە باعىتتالادى. ياعني, قىزمەت كورسەتۋ سالاسى جوعارىلايدى دەگەن ءسوز. قازىر ءبىز استانا اۋەجايىنا جولاۋشىلارعا جەردە دە, اۋەدە دە ساپالى قىزمەت كورسەتە الاتىن حالىقارالىق كوشباسشى كومپانيالارمەن كەلىسسوزدەر جۇرگىزىپ جاتىرمىز. ناقتى ايتقاندا, بورتتا تاماقتاندىرۋ سالاسىنداعى الەمدىك كوشباسشى كومپانيالاردىڭ ءبىرىن استانا اۋەجايىندا قىزمەت كورسەتۋگە شاقىردىق. بيىل اۋەجاي ماڭىندا بورت تاعامدارىن ازىرلەيتىن تسەح ىسكە قوسىلادى. ال اۋەجاي ىشىندەگى قىزمەت كورسەتۋگە كەلەر بولساق, بۇل رەتتە دە ءبىراز وزگەرىستەر بولادى. ناقتىراق ايتساق, قىزمەت كورسەتۋ سالاسى كوممەرتسيالاندىرىلىپ, كەز كەلگەن ەكونوميكالىق قىزمەتتىڭ قاتىسۋشىسىنا, اسىرەسە, جولاۋشىلارعا قىزمەت كورسەتەتىندەرگە اۋەجايدىڭ قوياتىن تالاپتارى كۇشەيتىلەدى. بۇل تالاپتاردىڭ بارلىعى جولاۋشىلاردىڭ كوڭىلىن تابۋعا ارنالاتىن بولادى», دەدى ا.مۇراتباەۆ.
ونىڭ ايتۋىنشا, استانا اۋەجايىنداعى دۇكەندەر مەن ءدامحانالاردىڭ باعالارى ايتارلىقتاي تومەندەتىلەدى. «ءبىز بۇدان بىلاي اۋەجاي اۋماعىنداعى بارلىق قىزمەت كورسەتۋ نارىعىنىڭ قاتىسۋشىلارىنا بىردەي تالاپتار قويا الامىز. سوندىقتان باعا تۋرالى ماسەلە ءبىزدىڭ باستى نازارىمىزدا. بيىلعى جىلدىڭ ءبىرىنشى جارتىسىنا دەيىن استانا اۋەجايىنداعى باعالار تولىق رەتتەلەدى. بۇل شارالار جولاۋشىلارعا تىكەلەي قىزمەت كورسەتەتىن بارلىق قاتىسۋشىلارعا جاسالادى», دەدى ول.
نۇرباي ەلمۇراتوۆ,
«ەگەمەن قازاقستان».