بانگكوك قالاسىندا قازاقستان رەسپۋبليكاسىنىڭ تايلاند كورولدىگىندەگى ەلشىسى مارات ەسەنباەۆتىڭ تايلاند كورولدىگى تابيعي رەسۋرستار جانە قورشاعان ورتا ءمينيسترى داۋپونگ راتاناسۋۆانمەن كەزدەسۋى ءوتتى. كەزدەسۋ بارىسىندا ەكولوگيا مەن «جاسىل» ەكونوميكا سالاسىنداعى قازاقستان – تايلاند ىنتىماقتاستىعىنىڭ اعىمداعى احۋالى مەن كەلەشەگى تالقىلاندى.
قازاقستاندىق ديپلومات تايلاندتىڭ تابيعي رەسۋرستار جانە قورشاعان ورتا مينيسترىنە قازاقستاننىڭ قازىرگى الەۋمەتتىك-ەكونوميكالىق دامۋى, وتانىمىزدىڭ «جاسىل» ەكونوميكاعا كوشۋى بويىنشا تۇجىرىمداماسى, ەكسپو-2017 حالىقارالىق مامانداندىرىلعان كورمەسىنە دايىندىعى حاقىندا حاباردار ەتىپ, ەلباسىنىڭ «نۇرلى جول – بولاشاققا باستار جول» اتتى قازاقستان حالقىنا جولداۋىنىڭ نەگىزگى قاعيدالارى تۋرالى ايتىپ بەردى.
د.راتاناسۋۆان قازاقستاننىڭ بۇگىنگى جەتىستىكتەرى مەن پرەزيدەنت ن.ءا.نازارباەۆتىڭ قورشاعان ورتانى قورعاۋ بويىنشا كورەگەن ساياساتىنان ۇلكەن اسەر العانىن جانە ەكى ەل باسشىلارىنا ءتان ورتاق ءبىر ەرەكشەلىك – بولاشاق ۇرپاقتى, جاستاردىڭ قامىن جانە ولاردىڭ جارقىن بولاشاعىن ويلاۋ بولىپ تابىلاتىنىن اتاپ ءوتتى.
تاي ءمينيسترى قازاقستاننىڭ «جاسىل» ەكونوميكانى دامىتۋ بويىنشا كۇش سالۋىن, قازاقستان ۇكىمەتىنىڭ ەكولوگيالىق جۇيەلەردى قورعاۋ بويىنشا شارالارىن اتاپ ءوتتى. اتاپ ايتقاندا, د.راتاناسۋۆان قازاقستاننىڭ ورمانداردى قالپىنا كەلتىرۋ مەن قۇرعاق جەرلەردى كوگالداندىرۋ سالاسىنداعى تاجىريبەسىن زەرتتەۋگە قىزىعۋشىلىق تانىتتى. سونداي-اق, ەلىمىزدىڭ تۇراقتى دامۋ سالاسىنداعى حالىقارالىق باستامالارىن جوعارى باعالايتىنىن ءبىلدىردى. مينيستر تايلاندتىڭ قازاقستاندىق باستاما بولىپ تابىلاتىن «جاسىل كوپىر» سەرىكتەستىك باعدارلاماسى شەڭبەرىندەگى ىنتىماقتاستىق تۋرالى حارتياعا جەدەل قوسىلۋعا مۇددەلى ەكەنىن اتاپ كورسەتتى.
تاراپتار, سونىمەن قاتار, سۋ جانە ەنەرگيا كوزدەرىن ءتيىمدى پايدالانۋ, اتاپ ايتقاندا, سۋ باسقارۋ, ترانسشەكارالىق وزەندەر, سۋ تاسقىنىنىڭ الدىن الۋ جانە قالپىنا كەلتىرۋ شارالارى, جاڭارتىلمالى ەنەرگيا كوزدەرىن دامىتۋدا تاجىريبە الماسۋ تۋرالى ۋاعدالاستىقتارعا قول جەتكىزدى.
تايلاندتاعى بالامالى جانە جاڭارتىلمالى ەنەرگيا كوزدەرىنىڭ جالپى تۇتىنۋ مولشەرىندەگى ۇلەسى 6%-دى قۇرايدى. جەك دامۋىنىڭ نەگىزگى باعىتى بيوماسسا بولىپ تابىلادى.
كەزدەسۋ قورىتىندىسى بويىنشا تايلاندتىڭ تابيعي رەسۋرستار جانە قورشاعان ورتا ءمينيسترى ءتيىستى كەزدەسۋلەر وتكىزۋ, ەكولوگيا مەن تۇراقتى دامۋ سالاسىنداعى قازاقستان – تايلاند ىنتىماقتاستىعىنىڭ ءتاجىريبەلىك ماسەلەلەرىن تالقىلاۋ ماقساتىندا قازاقستانعا ساپارمەن بارۋ مۇمكىندىگىن قاراستىرۋعا نيەت ءبىلدىردى.
«ەگەمەن-اقپارات».