استانا قالاسىنىڭ ساۋلەت, قالا قۇرىلىسى جانە جەر قاتىناستارى باسقارماسى وزدەرىن اكىمدىك قىزمەتكەرى رەتىندە تانىستىرىپ, الاياقتىق جاساۋى مۇمكىن قوڭىراۋ شالۋشىلار تۋرالى ەسكەرتتى, دەپ حابارلايدى Egemen.kz.
«اكىمدىك قىزمەتكەرلەرى اتىنان جەر ۋچاسكەسىن بەرۋ تۋرالى حابارلايتىن قوڭىراۋلارعا نازار اۋدارماۋىڭىزدى سۇرايمىز. كۇماندى قوڭىراۋلار نەمەسە حابارلامالار العان جاعدايدا, الاياقتىق تۋرالى ارىزبەن پوليتسيا دەپارتامەنتىنە جۇگىنە الاسىز», دەلىنگەن مەكەمەنىڭ Telegram-ارناسىندا.
سونداي-اق 2006 جىلدىڭ مامىر ايىنان باستاپ استانا قالاسىنىڭ اۋماعىندا جەكە تۇرعىن ءۇي قۇرىلىسى ءۇشىن جەر ۋچاسكەلەرىن بەرۋ توقتاتىلعانى, بۇل قالانىڭ بوس جەرلەرىنىڭ جوقتىعىمەن بايلانىستى ەكەنى ايتىلدى.
اكىمدىكتىڭ حابارلاۋىنشا, 2022 جىلدىڭ 1 ناۋرىزىنان باستاپ كەزەكتى قاراۋ ەلەكتروندى ۇكىمەتتىڭ egov.kz پورتالىندا ەلەكتروندىق تسيفرلىق قولتاڭبا (ەتسق) ارقىلى جۇزەگە اسىرىلادى.
«جەكە تۇرعىن ءۇي قۇرىلىسى ءۇشىن جەر ۋچاسكەسىن الۋ (10 سوتىق) كەزەگىن قاراۋ نەمەسە كەزەككە قويۋ» قىزمەتى تولىعىمەن اۆتوماتتاندىرىلعان جانە ەل ازاماتتارى بۇل قىزمەتتى وزدەرى پايدالانا الادى.