استانا. 29 ءساۋىر. ەلباسى پارلامەنت ماجىلىسىندەگى فراكتسيا باسشىلارىمەن كەزدەستى. كەزدەسۋدە مەملەكەت باسشىسى قازاقستان پرەزيدەنتى پرەمەر-مينيستر لاۋازىمىنا كارىم ءماسىموۆتىڭ كانديداتۋراسىن ۇسىندى. بۇل تۋرالى akorda.kz حابارلادى.
قازاقستان پرەزيدەنتىنىڭ لاۋازىمىنا كىرىسۋىنە بايلانىستى ەل ۇكىمەتى ءوز وكىلەتتىگىن دوعاردى, سونداي-اق, پرەزيدەنتكە تىكەلەي باعىنىستاعى جانە وعان ەسەپ بەرەتىن مەملەكەتتىك ورگاندار باسشىلارى, استانا مەن الماتى قالالارىنىڭ جانە وبلىستاردىڭ اكىمدەرى وكىلەتتىگىن توقتاتتى.
مەملەكەت باسشىسى ەل الدىنا قويىلعان مىندەتتەردى جۇزەگە اسىرۋ قاجەتتىلىگىن ەسكەرە وتىرىپ, ۇكىمەتتىڭ باستالعان جۇمىستى جالعاستىرعانى ءجون ەكەنىن اتاپ ءوتتى. وسىعان بايلانىستى قازاقستان پرەزيدەنتى پرەمەر-مينيستر لاۋازىمىنا كارىم ءماسىموۆتىڭ كانديداتۋراسىن ۇسىنا وتىرىپ, ۇكىمەت پەن پارلامەنتتىڭ ۇيلەسىمدى جۇمىسىنىڭ ماڭىزدى ەكەنىن ايتتى.
«حالىق كوممۋنيستەرى» دەپۋتاتتىق فراكتسياسىنىڭ جەتەكشىسى ۆلاديسلاۆ كوسارەۆ بۇل شەشىم جان-جاقتى سالماقتالعانىن اتاي كەلە, قولداۋ ءبىلدىردى.
قازاقستاننىڭ «اق جول» دەموكراتيالىق پارتياسى فراكتسياسىنىڭ باسشىسى ازات پەرۋاشەۆ ۇسىنىستى قولداپ, كارىم ءماسىموۆتىڭ داعدارىسقا قارسى باسقارۋ تاجىريبەسىنە نازار اۋداردى.
«نۇر وتان» فراكتسياسىنىڭ باسشىسى داريعا نازارباەۆا دا ۇسىنىستى قولدادى جانە دەپۋتاتتار مەن ۇكىمەت اراسىندا قالىپتاسقان سىندارلى قارىم-قاتىناس ولاردىڭ ءوزارا ءىس-قيمىلىنا وڭ ىقپال ەتەتىنىن اتاپ ءوتتى.
ەلامان قوڭىر.
دەرەك: akorda.kz.
سۋرەت: inform.kz.