قوستاناي. 29 قاڭتار. قوستانايدىڭ رەسەيمەن شەگاراداعى قارابالىق كەنتىندە كەمپينگ اشىلدى. بۇل تۋرالى egemen.kz ءتىلشىسى حابارلادى.
ەلباسى نۇرسۇلتان نازارباەۆ قازاقستان حالقىنا جولداعان «نۇرلى جول – بولاشاققا باستار جول» جولداۋىندا «قازىردە قايناعان تىرشىلىك كۇرە جولداردىڭ بويىندا. جول — شىن مانىندە ءومىردىڭ وزەگى, باقۋاتتى تىرلىكتىڭ قاينار كوزى. بارلىق ايماقتار تەمىر جولمەن, تاس جولمەن, اۋە جولىمەن ءوز ارا تىعىز بايلانىسۋى كەرەك» دەي كەلىپ, «كولىك-لوگيستيكالىق ينفراقۇرىلىمداردى دامىتۋدى» الدىمەن تاپسىرعان بولاتىن. رەسەيگە شىعاتىن ءىرى داڭعىل «الماتى-ەكاتەرينبۋرگ» تاس جولىنىڭ بويىنداعى قارابالىق كەنتىنەن شىعا بەرىستە, قايراق كەدەنىنە, ياعني شەكاراعا جاقىن تۇستان كەمپينگ اشىلدى. ونى قارابالىق اۋدانىنداعى كاسىپكەر مارات ايتقازين جىل تاۋلىگىنە تولماس ۋاقىتتا ەل يگىلىگىنە تاپسىردى. مارات نۇرعالي ۇلى بۇل جوباعا قازىردىڭ وزىندە 100 ميلليون تەڭگە ينۆەستيتسيا سالدى, ونى تاعى كەڭەيتۋدى جوسپارلاپ وتىر.
كاسىپكەر مارات ايتقازين: «بۇرىن قازاقستان جولدارىنىڭ بويىندا كەمپينگ بولدى ما, جوق الدە ءبىز ءبىرىنشى سالىپ وتىرمىز با, ول جاعى ماعان بەيمالىمدەۋ. بىلەتىنىم, «الماتى-ەكاتەرينبۋرگ» تاس جولى بويىنداعى ەڭ ءىرى كەمپينگ وسى ەكەنىنە سەندىرگىم كەلەدى» دەدى.
كەمپينگتىڭ ىشىندە «ءبورى ازىعى جولدا, ەر ازىعى جولدا» دەيتىن جولاۋشى ءۇشىن بارلىعى دا قاراستىرىلعان. وندا جولاۋشىلار مەن جۇرگىزۋشىلەرگە ارنالعان وتىز ورىندىق وتە قولايلى قوناق ءۇي, اسحانا, بەس جۋىناتىن بولمە بار. كەمپينگتە جولاۋشى تەك جۋىنىپ عانا قويماي, كىرىن جۋىپ, ۇتىكتەپ الۋىنا دا جاعداي قاراستىرىلعان. ءتىپتى, تەمەكى شەگەتىن بولمەگە دەيىن بار. كاسىپكەر كەمپينگتە الداعى جازدا ءۇش ءتۇرلى مونشا, جىلى ماشينا قوياتىن, جوندەيتىن ورىندار بولاتىنىن دا ايتىپ وتىر.
كەمپينگ جاقىندا عانا تاپسىرىلدى, سونىڭ وزىندە قازىر كۇن سايىن ونشاقتى جۇك تاسيتىن اۆتوپويىزدار توقتايدى. جول سوعىپ كەلە جاتقان جولاۋشىلار مەن جۇرگىزۋشىلەر ىستىق تاماق ءىشىپ, جۋىنىپ-شايىنىپ, ۇيىقتاپ, دەمالىپ اتتانىپ جاتىر.
كاسىپكەر مارات ايتقازين: «جيىرما جىل بويى بوس تۇرعان ءسۇت زاۋىتىنىڭ عيماراتى توزىپ بارا جاتقان سوڭ, وبالسىنىپ ساتىپ العانمىن. بىراق الۋىن الدىم دا, ودان نە ىستەرىمدى بىلمەي ويلانىپ ءجۇرىپ, قوناق ءۇي جاسايىن دەپ شەتىنەن جۇمىستى باستاعان ەدىم. ەلباسى ەلباسى نۇرسۇلتان نازارباەۆتىڭ وتكەن جىلى قازاقستان حالقىنا جولداعان ەكى جولداۋىندا دا كولىك-لوگيستيكالىق ماسەلەلەر تاماشا ايتىلدى. بۇل ءبىزدىڭ جۇمىسىمىزعا تۇرتكى بولىپ, ىنتالاندىرا ءتۇستى, تەز بىتىرۋگە اسىقتىق», دەدى.
كەمپينگتىڭ سالتاناتتى اشىلۋىندا قارابالىق اۋدانىنىڭ اكىمى الماس ىسماعۇلوۆ بۇل كۇردەلى لوگيستيكالىق قۇرىلىس تەك اۋدان عانا ەمەس, رەسپۋبليكا ەكونوميكاسى ءۇشىن قوسارى كوپ جوبا ەكەنىن ايتتى.
ءنازيرا جارىمبەتوۆا.
دەرەك: egemen.kz.
Cۋرەت: ainanews.kz.