استانا. 29 قاڭتار. استانالىق «بارىس» ءوز ايدىنىندا رەسەيلىك «سەۆەرستالدى» قابىلداپ, قوسىمشا كەزەڭدە 3:2 ەسەبىمەن جەڭىسكە جەتتى. بۇل تۋرالى egemen.kz حابارلادى.
ويىن قوس تاراپتىڭ الما-كەزەك شابۋىلىمەن باستالدى. «بارىس» ساپىنان ءبىرىنشى بەستىك بەلسەندىلىك تانىتتى. كەزدەسۋدىڭ 11-مينۋتىندا نادجەل دوۋس پەن داستين بويد ۇيىمداستىرعان شابۋىلدان ناتيجە شىعارعان مايك لاندين ەسەپ اشتى. ارادا ەكى مينۋت ۋاقىت وتكەندە ايدىن يەلەرى ويىنشى باسىمدىعىنا يە بولدى. دەگەنمەن, بۇل مۇمكىندىكتى اندرەي نازاروۆ شاكىرتتەرى پايدالانا المادى. ەسەسىنە ويىننىڭ 16-مينۋتىندا قوناقتار ەسەپتى تەڭەستىرىپ كەتتى. مەرگەندىگىمەن كوزگە تۇسكەن – پاۆەل چەرنوۆ.
ەكىنشى كەزەڭدە ءبىزدىڭ كوماندا ەكى مارتە ايدىندا 4 ويىنشىمەن قالدى. ابىروي بولعاندا ەكەۋىندە دە رەسەيلىكتەر قورعانىسىمىزدى بۇزا المادى. ۇزىلىسكە 5 مينۋت قالعان كەزدە قوناقتار قارقىنىن كۇشەيتىپ, ءبىزدىڭ قاقپاعا لاپ قويدى. سونداي شابۋىلداردىڭ بىرىندە «سەۆەرستال» ويىنشىسى ماكسيم ترۋنەۆ كوك جولاقتان ەنىپ بارىپ, جويقىن سوققى جاسادى. قاقپاشىمىز پاۆەل پولۋەكتوۆ شايبانىڭ جاقىن بۇرىشقا كەلە جاتقانىن ءدال باعامداعانىمەن, سوققىعا توسقاۋىل بولا المادى. ناتيجەسىندە ەسەپ 1:2 بولىپ, قارسىلاستىڭ پايداسىنا وزگەردى.
شەشۋشى كەزەڭدە ەلوردالىق ۇجىم ەسەپتى تەڭەستىرۋ ءۇشىن شابۋىلدارىن كۇشەيتتى. قوناقتار وزدەرىنە قاجەتتى ناتيجەگە قول جەتكىزگەندىكتەن نەگىزىنەن قورعانىسقا كوڭىل ءبولىپ, قارىمتا شابۋىلعا عانا يەك ارتتى. دەسەك تە, ويىننىڭ اياقتالۋىنا 28 سەكۋند قالعان كەزدە «بارىستىڭ» ءبىرىنشى بەستىگى تاماشا شابۋىل ۇيىمداستىرىپ, رومان ستارچەنكو كومانداسىنىڭ ەكىنشى شايباسىن سوقتى. ناتيجەلى شابۋىلعا ۇيىتقى بولعان تاعى دا ن.دوۋس پەن د.بويد ەكەنىن ايتا كەتكەن ءجون.
نەگىزگى ۋاقىتتا جەڭىمپازدى انىقتاي الماعان قارسىلاستار 5 مينۋتتىق قوسىمشا كەزەڭگە جۇگىندى. اتالمىش كەزەڭ «سەۆەرستالدىڭ» شابۋىلىمەن باستالعان بولاتىن. الايدا, دەر كەزىندە ەس جيا بىلگەن «بارىس» ويىنشىلارى 2-مينۋتتا ءۇشىنشى شايبانى سوعىپ, قارسىلاستارىنان جەڭىستى ج ۇلىپ الدى. جەڭىس شايباسىنىڭ اۆتورى ن.دوۋس بولسا, وعان ناتيجەلى پاس شىعارعان دميتري ۋپپەر.
بۇل «بارىستىڭ» قاتارىنان ءۇشىنشى جەڭىسى. ازىرگە شىعىس كونفەرەنتسياسىندا 74 ۇپايمەن 6-ورىنعا نىق تابان تىرەپ تۇر. ال سوڭعى بەس ويىننىڭ تورتەۋىندە جەڭىلگەن «سەۆەرستال» 63 ۇپايمەن باتىس كونفەرەنتسياسىنىڭ سوڭىندا, ياعني, 14 كوماندانىڭ ىشىندە 13-ءشى كەلەدى. «بارىستىڭ» كەلەسى قارسىلاسى قحل-دىڭ قازىرگى كوشباسشىسى ماسكەۋلىك تسسكا. اتالعان تارتىس 30 قاڭتار كۇنى استانا قالاسىنداعى «قازاقستان» سپورت كەشەنىندە وتەدى.
ەلامان قوڭىر.
دەرەك: egemen.kz.
سۋرەت: hcbarys.kz.