*دۇنيەجۇزىلىك بانك ەلىمىزگە 6 ملرد. اقش دوللارىن بولەتىن بولدى. ۇلتتىق ەكونوميكا ۆيتسە-ءمينيسترى ءمادينا ابىلقاسىموۆانىڭ ايتۋىنشا, بۇل قارجى كولىك-لوگيستيكالىق جوبالاردى ىسكە اسىرۋعا, شوب-تى قارجىلاندىرۋعا, بيزنەستىڭ باسەكەلەستىگىن ارتتىرۋعا, ينۆەستيتسيالاردى تارتۋ ءۇشىن ينستيتۋتتىق كومەك كورسەتۋگە جانە قورشاعان ورتانى قورعاۋعا جۇمسالادى.
* «قازاگرو» حولدينگى شوتلانديانىڭ كورولدىك بانكىسىنەن العان قارىزىن وتەدى. ەلىمىزدىڭ اگروونەركاسىپتىك كەشەنىن قارجىلاندىرۋدى جۇزەگە اسىرۋ جانە قۇرىلىمنىڭ اينالىم كاپيتالىن تولىقتىرۋ ماقساتىندا بانكتەن تارتىلعان 100 ملن. اقش دوللارى كولەمىندەگى قارجىنىڭ دەر كەزىندە قايتارىلۋى حولدينگتىڭ حالىقارالىق ينۆەستورلارمەن جاقسى قاتىناستا ەكەنىنە كورنەكى مىسال بولا الادى.
* «سىباعا» باعدارلاماسى باستالعالى 147 مىڭنان اسا ءىرى قارا مال ساتىپ الىندى. اگرارلىق نەسيە كورپوراتسياسىنىڭ ءباسپاسوز قىزمەتى ءمالىم ەتكەندەي, بۇگىنگە دەيىن 27,8 ملرد. تەڭگەلىك 1972 جوبا قارجىلاندىرىلعان. ايتا كەتەيىك, باعدارلاما ەلىمىزدە جوعارى دەڭگەيدە جۇزەگە اسىپ كەلەدى.
* الماتى وبلىسىندا قامىستان قاعاز جانە ۆيسكوزا شىعاراتىن زاۋىت سالىنادى. «ەركە-نۇر» وندىرىستىك كومپانياسىنىڭ باسشىسى فاريدا مەرحاميتقىزى جوباعا ينۆەستورلار قىزىعۋشىلىق تانىتىپ وتىرعانىن جەتكىزدى. كاسىپورىن قىزىلاعاش اۋىلىنىڭ جانىنا ورنالاسادى. مۇندا قامىس قوپاسىنىڭ اۋماعى 30 مىڭ گەكتاردى قۇرايتىن كورىنەدى.
*شىمكەنتتە ازاماتتاردىڭ تولقۇجاتتارى مەن جەكە كۋالىكتەرى دايىندالادى. ءىىم-ءنىڭ دەرەگىنشە, قالادا اقپاراتتىق-تىركەۋ ورتالىعىنىڭ فيليالى اشىلدى. وندا ءوڭتۇستىك قازاقستان, قىزىلوردا جانە جامبىل وبلىستارىنىڭ تۇرعىندارى ءۇشىن تولقۇجاتتار مەن جەكە كۋالىكتەر جاسالادى. كۇنىنە 1,5 مىڭ جەكە كۋالىك پەن 800 تولقۇجات دايىنداۋعا مۇمكىندىگى بار ورتالىقتى ىسكە قوسۋ ءۇشىن رەسپۋبليكالىق بيۋدجەتتەن 756 ملن. تەڭگە جۇمسالعان.
* تارازدا قازاق حاندىعى تۋرالى تۇڭعىش مونوگرافيا جارىق كوردى. «قازاق حاندىعىنىڭ قۇرىلۋ تاريحى» دەپ اتالاتىن بۇل ەڭبەكتىڭ اۆتورى – پروفەسسور, تاريح عىلىمدارىنىڭ دوكتورى بەرەكەت كارىباەۆ. مەرەيتوي قارساڭىندا شىققان عىلىمي ەڭبەك شىعىس دەرەكتەرىنە سۇيەنە وتىرىپ جازىلعان.
*اقتوبەدە تۇرعىن ءۇي قۇرىلىسى جالعاسا بەرەدى. قالا اكىمى ەرحان وماروۆ اتاپ كورسەتكەندەي, بيىل شاھارداعى «نۇر-اقتوبە» شاعىن اۋدانىندا جالپى الاڭى 59,3 مىڭ شارشى مەتردى قۇرايتىن 981 پاتەرلىك 18 بلوك-سەكتسيانى پايدالانۋعا بەرۋ جوسپاردا تۇر.
*شىعىس قازاقستاندا قۇس ەتىنەن ءونىم وندىرەتىن زاۋىت 70-تەن اسا تاعام ءتۇرىن دايارلايدى. ءۇيد باعدارلاماسى بويىنشا كاسىپورىنعا 1,5 ملرد. تەڭگە قارالىپ وتىر. مۇندا 200-گە جۋىق ادام ەڭبەك ەتەدى. جۇمىسشىلاردىڭ ورتاشا جالاقىسى 200 مىڭ تەڭگەدەن جوعارى.
*باتىس قازاقستاندا 5 443,8 ملن. تەڭگە كولەمىندە 2 849 شاعىن نەسيە بەرىلدى. وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى اسلان جاقىپوۆتىڭ سوزىنە قاراعاندا, شاعىن نەسيەلەردىڭ نەگىزگى بولىگى اگروونەركاسىپ كەشەنىن دامىتۋعا باعىتتالعان.
حابارلار ۇكىمەت, وبلىستىق اكىمدىكتەر سايتتارى, «قازاقپارات» اگەنتتىگى جانە «حابار», «24» تەلەارنالارىنىڭ دەرەكتەرى بويىنشا دايىندالدى.