2024 جىلعى 25-30 قازان ارالىعىندا اقش-تىڭ سان-فرانتسيسكو قالاسىندا ورتالىق ەۋرازيا مەن كرەمني القابىنىڭ تەحنولوگيالىق يندۋسترياسىن بىرىكتىرەتىن العاشقى تەحنولوگيالىق كونفەرەنتسيا ءوتىپ جاتىر, دەپ حابارلايدى Egemen.kz.
بۇل ءىس-شاراعا ورتالىق ەۋرازيادان جانە الەمنىڭ وزگە ايماقتارىنان IT-يندۋستريا كوشباسشىلارى, جەتەكشى تەحنولوگيالىق كومپانيالار, ۋنيۆەرسيتەتتەر, ۆەنچۋرلىق قورلار, ينۆەستورلار جانە ستارتاپشىلار قاتىسىپ جاتىر. قازاقستان اتىنان وسى ءىس-شاراعا پارلامەنت ءماجىلىسىنىڭ دەپۋتاتى ەربولات ساۋرىقوۆ باردى.
كونفەرەنتسيا TechCrunch Disrupt فورۋمى اياسىندا ۇيىمداستىرىلدى. بۇل فورۋم – ستارتاپتاردىڭ نەگىزىن قالاۋشىلار, ينۆەستورلار, كيبەرقاۋىپسىزدىك ماماندارى, Web3 تەحنولوگياسىنىڭ جانە جاساندى ينتەللەكتتىڭ ساراپشىلارى جينالاتىن الەمدەگى ەڭ ماڭىزدى ءىس-شارانىڭ ءبىرى.
فورۋمدا ەربولات ساۋرىقوۆ قازاقستاننىڭ تسيفرلىق ەكونوميكانى دامىتۋداعى جەتىستىكتەرىن ايتىپ, مۇنداي جيىنداردىڭ ەلگە قاجەتتىلىگىن جانە ولاردىڭ پايداسىن ەرەكشە اتاپ ءوتتى. دەپۋتاتتىڭ ايتۋىنشا, ءبىزدىڭ ەلىمىزدە دە وسىنداي فورۋمداردى ءجيى وتكىزۋ قاجەت.
دەپۋتات اتاپ وتكەندەي, بۇل پلاتفورما جاھاندىق ينۆەستورلار قاۋىمداستىعى مەن وزىق تەحنولوگيالىق شەشىمدەردى تانىستىرۋعا جانە قارجىلىق قولداۋ كورسەتۋگە ارنالعان ماڭىزدى الاڭ بولىپ سانالادى.
«بيىلعى جولداۋىندا مەملەكەت باسشىسى قازاقستان جاساندى ينتەللەكتىنى كەڭىنەن قولداناتىن جانە تسيفرلىق تەحنولوگيالاردى دامىتىپ جاتقان ەلگە اينالۋعا ءتيىس دەگەن ەدى. وسى ورايدا Krot Innovation حابىنىڭ TechCrunch-پەن سەرىكتەستىگى قازاقستاننىڭ IT-سەكتورىن دامىتۋ ءۇشىن جاڭا پەرسپەكتيۆالار اشادى. بۇل ءىس-شاراعا قاتىسۋ قازاقستاندىق ستارتاپتارعا اۋىلدىق ايماقتاردى تسيفرلاندىرۋ, دەرەكتەردى قورعاۋ سەكىلدى جەرگىلىكتى قاجەتتىلىكتەرگە باعىتتالعان تەحنولوگيالارمەن تانىسۋعا, ءوزارا تاجىريبە الماسۋعا جانە حالىقارالىق كومپانيالارمەن بايلانىس ورناتۋعا مۇمكىندىك بەرەدى. مۇنداي سەرىكتەستىك قازاقستاندىق IT-كومپانيالاردىڭ الەمدىك دەڭگەيدە دامۋىنا جانە ەلگە جاڭا تەحنولوگيالاردى ەنگىزۋ ۇدەرىسىن جەدەلدەتۋگە سەپتىگىن تيگىزەدى», دەدى ەربولات ساۋرىقوۆ.
قازىر ءماجىلىس دەپۋتاتتارى جاڭا تسيفرلىق كودەكس بويىنشا جۇمىستى باستاپ كەتتى. ەربولات ساۋرىقوۆتىڭ ايتۋىنشا, الەمدىك تاجىريبەنى زەردەلەۋدە وسىنداي جاھاندىق الاڭدار مول مۇمكىندىك بەرەدى.
كونفەرەنتسياعا Google, Coinbase, Honeycomb, NASA سياقتى الەمگە ايگىلى كوشباسشى كومپانيالاردىڭ ساراپشىلارى اتسالىسىپ, پىكىر ءبولىستى.
سونىمەن قاتار ءماجىلىس دەپۋتاتى TechCrunch Disrupt يننوۆاتسيالىق فورۋمىنا دا قاتىستى. ستارتاپ كوشباسشىلار, ينۆەستورلار, كيبەرقاۋىپسىزدىك ساراپشىلارى, Web3 تەحنولوگياسىن جانە جاساندى ينتەللەكت جاساۋشىلار باس قوسقان جيىندا جاڭا ستراتاپ جوبالاردىڭ تاستىرىلىمى ءوتتى.