قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا عىلىمدى دامىتۋ ماسەلەلەرىنە ارنالعان كەڭەس وتكىزدى, دەپ حابارلادى پرەزيدەنتتىڭ ءباسپاسوز قىزمەتى.
كەڭەستە قازاقستاندا جۇمىس ىستەۋ ءۇشىن شەتەلدەردەن قازاقستاندىق تانىمال عالىمداردى تارتۋ جانە ولاردىڭ جۇمىس تيىمدىلىگىن ارتتىرۋ, رەسپۋبليكادان تىسقارى كەتۋ ىقتيمالدىعىن ازايتۋ ماقساتىندا وتاندىق عالىمدارعا جاعدايلار جاساۋ ماسەلەلەرى قارالدى.
كەڭەسكە پرەزيدەنت اكىمشىلىگى باسشىسىنىڭ ورىنباسارى ب.مايلىباەۆ, ءبىلىم جانە عىلىم ءمينيسترى ا.ءسارىنجىپوۆ, پرەزيدەنت اكىمشىلىگىنىڭ قۇرىلىمدىق ءبولىمدەرىنىڭ باسشىلارى, ءبىلىم جانە عىلىم, ينۆەستيتسيالار جانە دامۋ, دەنساۋلىق ساقتاۋ جانە الەۋمەتتىك دامۋ مينيسترلىكتەرىنىڭ, ورتالىق كوممۋنيكاتسيالار قىزمەتىنىڭ, نازارباەۆ ۋنيۆەرسيتەت پەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وكىلدەرى قاتىستى.
گ.ابدىقالىقوۆا مەملەكەت باسشىسىنىڭ «نۇرلى جول – بولاشاققا باستار جول» اتتى جولداۋى اياسىنداعى نەگىزگى باعىتتار بويىنشا قازاقستاندىق عىلىمي كادرلار الەۋەتىن ساقتاۋ جانە ارتتىرۋدىڭ, عىلىمي زەرتتەۋلەر مەن ازىرلەمەلەردى ىنتالاندىرۋدىڭ ماڭىزدىلىعىنا توقتالدى. اتاپ ايتقاندا, قازاقستان رەسپۋبليكاسى پرەزيدەنتى جانىنداعى ەكى كوميسسيانىڭ – شەتەلدەردە كادرلار دايارلاۋ جونىندەگى رەسپۋبليكالىق كوميسسيا مەن عىلىم جانە تەحنيكا سالاسىنداعى ءال-فارابي اتىنداعى مەملەكەتتىك سىيلىقتاردى بەرۋ جونىندەگى كوميسسيانىڭ قىزمەتى وسى جانە باسقا دا مىندەتتەردى شەشۋگە باعىتتالعان.
قازىرگى ۋاقىتتا قازاقستاندا عىلىمي زەرتتەۋلەرمەن 23,7 مىڭ ادام اينالىسادى. عىلىمي ورتاداعى عىلىم دوكتورلارىنىڭ سانى 1688, (9,8%), عىلىم كانديداتتارى – 4915 (28,6%), PhD دوكتورلارى – 218 (1,2%), كاسىپتىك باعىتتار بويىنشا دوكتورلار – 605 (3,5%), عىلىمي اتاعى جوق ىزدەنۋشىلەر – 9774 (56,8%) ادام. بۇل رەتتە 35 جاسقا دەيىنگى عالىمداردىڭ ۇلەسى 38% بولسا, 45 جاسقا دەيىنگىلەردىڭ ۇلەسى 56%.
2014 جىلى قازاقستاندا جۇمىس جۇرگىزۋ ءۇشىن ءارتۇرلى عىلىمي باعىتتار بويىنشا 600-دەن استام شەتەلدىك عالىم تارتىلدى, سونىڭ 75-ءى قازاقستاندىق.
«نازارباەۆ ۋنيۆەرسيتەت» ااق-قا اقش-تان, ۇلىبريتانيادان, كانادادان, فرانتسيادان, يتاليادان, نيدەرلاندتان 350-دەن استام (ونىڭ 26-سى قازاقستاندىق) شەتەلدىك عالىمدار شاقىرىلدى.
بۇگىندە شەتەلدەردەگى بەلگىلى عىلىمي ورتالىقتاردا, اتاپ ايتقاندا, نانوتەحنولوگيا, روبوتتى تەحنيكا, مۇناي-گاز كەن ورىندارىن زەرتتەۋ, گيدروديناميكا, گەندىك ينجەنەريا, وبىر اۋرۋىن تۋعىزاتىن كلەتكالار بيولوگياسى, دنك رەپاراتسياسى مەن مۋتاگەنەز سالالارى سياقتى كەلەشەگى زور عىلىمي باعىتتاردا 53 قازاقستاندىق عالىم تابىستى جۇمىس ىستەۋدە.
كەڭەس قورىتىندىسى بويىنشا مەملەكەتتىك حاتشى مەملەكەتتىك ورگاندارعا شەتەلدەردە كادرلار دايارلاۋ جونىندەگى رەسپۋبليكالىق كوميسسيا مەن عىلىم جانە تەحنيكا سالاسىنداعى ءال-فارابي اتىنداعى مەملەكەتتىك سىيلىقتاردى بەرۋ جونىندەگى كوميسسيانىڭ جۇمىستارىنا قاتىستى بىرقاتار ناقتى تاپسىرمالار بەردى.