ماقتاارال اۋدانىنا الماتىدان ارنايى كەلگەن كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ بىلىكتى ماماندارى جەرگىلىكتى دارىگەرلەردىڭ قاتىسۋىمەن تۇرعىندارعا جوعارى دەڭگەيدەگى مامانداندىرىلعان كومەك كورسەتتى.
«اتاكەنت» اۋرۋحاناسى بازاسىندا «دەنى ساۋ ۇلت – ءاربىر ازامات ءۇشىن ساپالى جانە قولجەتىمدى دەنساۋلىق ساقتاۋ» ۇلتتىق جوباسى اياسىندا كارديوحيرۋرگيا, كارديورەۆماتولوگيا, اريتمولوگيا, نەفرولوگيا, گاستروەنتەرولوگيا, فۋنكتسيونالدىق دياگنوستيكا بويىنشا اۋداننىڭ 284 تۇرعىنى مەديتسينالىق تەكسەرۋدەن ءوتتى. بۇل جوسپارلانعان 180 پاتسيەنتتەن 104-كە كوپ, ياعني الماتىلىق دارىگەرلەرگە قارالۋشىلاردىڭ قاتارى كوبەيگەن. قارالۋشىلاردىڭ 260-ىنا دارىگەرلىك كەڭەس, 27-ىنە الماتىعا جولداما بەرىلدى.
كارديوحيرۋرگيا ءبولىمىنىڭ مەڭگەرۋشىسى رۇستەم تولەۋتاەۆتىڭ, جۇرەكتىڭ ىرعاعى مەن وتكىزگىشتىگىنىڭ بۇزىلۋى ءبولىمىنىڭ مەڭگەرۋشىسى باعدات احىتتىڭ قابىلداۋىنا كەلگەن 64 ادامنىڭ 58-ىنە دارىگەرلىك كەڭەس بەرىلسە, 6-ى عىلىمي-زەرتتەۋ ينستيتۋتىنا قارالۋعا جولداندى. سونىمەن قاتار «اتاكەنت» اۋداندىق اۋرۋحاناسىندا مۋلتيديستسيپلينارلىق شەبەرلىك سىنىپتارى ۇيىمداستىرىلدى. ەكى كۇن بويى اۋدان تۇرعىندارىنا قىزمەت كورسەتكەن الماتىلىق بىلىكتى ماماندارعا اتاكەنت كەنتىنىڭ اكىمى س.ءازىموۆ ريزاشىلىعىن ءبىلدىردى. «كارديولوگيا جانە ىشكى اۋرۋلار عىلىمي-زەرتتەۋ ينستيتۋتى» اق-نىڭ باسقارما توراعاسى مارات ءپاشيموۆتىڭ ايتۋىنشا, مۇنداي جوعارعى دەڭگەيدەگى مامانداندىرىلعان كومەك تۇرلەرى وبلىس تۇرعىندارىنا الداعى ۋاقىتتا دا كورسەتىلەتىن بولادى.
تۇركىستان وبلىسى