شاراينا
رەسەي ۇكىمەتى داعدارىسقا قارسى جوسپارىن ۇسىندى. قۇجات كەشە رەسەي ۇكىمەتىنىڭ سايتىندا جاريالاندى. جوسپار, اتاپ ايتقاندا, شىعىنداردىڭ كوپشىلىگىن 10 پايىزعا قىسقارتۋدى كوزدەيدى.
قورعانىسقا, اۋىل شارۋاشىلىعىن قولداۋ مەن رەسەيدىڭ حالىقارالىق مىندەتتەمەلەرىن ورىنداۋىنا بايلانىستى جوسپارلانعان شىعىندار عانا وزگەرىسسىز قالادى. سونداي-اق, بارلىق الەۋمەتتىك مىندەتتەمەلەر ورىندالاتىن بولادى. جاڭا جوبالاردىڭ ءبىرشاماسىن جۇزەگە اسىرۋ كەيىنگە شەگەرىلىپ وتىر. مەملەكەتتىك بيلىك ورگاندارىن قامتاماسىز ەتۋگە ارنالعان شىعىندار دا قىسقارادى. تۇتاستاي العاندا, ءۇش جىل بەدەرىندە بيۋدجەت شىعىندارىن ءار جىل سايىن 5 پايىزعا كەسىپ وتىرۋ جوسپارلانعان.
ليۆيا قوناقۇيىندەگى قانتوگىس
ليۆيانىڭ استاناسى – تريپولي قالاسىنداعى بەس جۇلدىزدى Corinthia قوناقۇيىنە باسا-كوكتەپ كىرگەن قارۋلى بەس ادام ءۇش كۇزەتشىنى ءولتىرىپ, كەپىلدىككە ادامدار العان. كەپىلدىككە قانشا ادامنىڭ الىنعانى ناقتىلانبايدى.
بۇعان قوسا, مەيمانحانا ايالداماسىنا قويىلعان كولىك جارىپ جىبەرىلگەن. كولىك جارىلىسىنان, الدىن الا ەسەپ بويىنشا, 11 ادام قازا تاپقان. ولاردىڭ اراسىندا يتاليالىق, تۇركيالىق جانە بريتانيالىق ازاماتتار بار ەكەن. لاڭكەستەر 24-ءشى قاباتقا كوتەرىلگەننەن كەيىن قۇقىق قورعاۋ ورگاندارى قىزمەتكەرلەرىنىڭ قىسپاعىندا قالعان. ەندى قۇتىلا الماستارىن بىلگەن ولار ءوز-وزدەرىن جارىپ جىبەرۋگە شەشىم قابىلداعان. ال كەپىلدىككە الىنعانداردىڭ اراسىندا كوز جۇمعاندار بار-جوعى ازىرشە بەلگىسىز.
وتىز ادامدى ۇرلاپ كەتتى
تەرروريستىك «يسلام مەملەكەتى» دەلىنەتىننىڭ قارۋلى جاساعى يراكتىڭ موسۋل قالاسىنان 30 ادامدى ۇرلاپ كەتتى. ولار ادامداردى پەشمەرگەر كۇشتەرىمەن اۋىز جالاستىڭدار دەپ ايىپتاپ, بەلگىسىز جاققا الىپ قاشقان.
وقيعا لاڭكەستەر قالادا جۇرگىزەتىن رەيدتەردىڭ بىرىندە ورىن العان. ال موسۋل قالاسى «يسلام مەملەكەتىنىڭ» كوشباسشىسى, ءوزىن يبراگيم دەگەن اتپەن «حاليف» دەپ جاريالاعان ءابۋ باكىر ءال-باعداديدىڭ بۇيرىعىمەن «يم»-ءنىڭ استاناسى دەپ اتالعان بولاتىن. وسى جەردە ايتا كەتەتىن ءبىر جايت, 26 قاڭتاردا يراك اسكەريلەرى «يسلام مەملەكەتىنىڭ» جاساقتارىنان ديالاك پروۆينتسياسىن ازات ەتكەن بولاتىن. بۇعان دەيىن كۇرد كۇشتەرىنىڭ يسلامشىلاردان سيريانىڭ سولتۇستىگىندەگى كوباني قالاسىن تولىق بوساتقانى حابارلانعان ەدى.
گرەكيادا جاڭا ۇكىمەت جاساقتالدى
كەشە گرەكيانىڭ پرەزيدەنتتىك سارايىندا مەملەكەت باسشىسى كارولوس پاپۋلياستىڭ قاتىسۋىمەن ەلدىڭ جاڭا مينيسترلەر كابينەتى انت قابىلدادى. جەرگىلىكتى بۇقارالىق اقپارات قۇرالدارى حابارلاعانىنداي, سيريزا پارتياسىنان وكىلەتتىك ەتەتىن بارلىق دەرلىك مينيستر راسىمگە گالستۋكسىز كەلىپتى.
ولار جاقىندا گرەكيا كونستيتۋتسياسىن ساقتاۋعا انت بەرگەن پرەمەر-مينيستر الەكسيس تسيپراستىڭ قىلىعىن قايتالاسا كەرەك. بۇعان دەيىن تسيپراس ۇكىمەتتى بار-جوعى 10 مينيستردەن جاساقتاعان بولاتىن. شەشۋشى لاۋازىمداردىڭ ءبىرى – ۇكىمەت باسشىسىنىڭ ورىنباسارى ورىنتاعى دەپۋتات-ەكونوميست ياننيس دراگاساكيسكە تيگەن. ول ەۋروپاداعى قارجى ينستيتۋتتارىنا قاتىستى قاتاڭ ۇستانىم تانىتۋىمەن تانىمال. ەندى دراگاساكيس ەۋروكوميسسيا, ەۋروپا ورتالىق بانكى, حالىقارالىق ۆاليۋتا قورى سەكىلدى كرەديتورلاردىڭ «ۇشتىگىمەن» كەلىسسوز جۇرگىزەتىن بولادى.
قار اكەلگەن شىعىن – 500 ملن. دوللار
اقش-تىڭ سولتۇستىك-شىعىسىنداعى كەيبىر شتاتتار قالىڭ قاردىڭ استىندا قالدى. ماسەلەن, ەلدەگى اسا ءىرى مەگاپوليس – نيۋ-يورك بيزنەسى كولىك جۇمىسى شەكتەلۋى سالدارىنان 200 ميلليون دوللار زارداپ شەكتى.
قالىڭ تۇسكەن قاردان قوعامدىق كولىك ءجۇرىسى توقتاپ قالۋى سالدارىنان نيۋ-يوركتىڭ كوپتەگەن تۇرعىندارى دۇكەندەرگە, مەيرامحانالارعا, كينوتەاترلار مەن مۋزەيلەرگە بارۋدان باس تارتۋعا ءماجبۇر بولعان. وسىلايشا قالاداعى كاسىپكەرلەردىڭ قالتاسى بوس قالعان. ءوز كەزەگىندە, ساراپشىلار اقش-تىڭ قالىڭ قاردان زارداپ شەككەن سولتۇستىك-شىعىسىنداعى شتاتتارىنا كەلگەن جالپى شىعىن 500 ميلليون دوللار دەپ وتىر. اۋا رايىنىڭ قولايسىزدىعىنان مىڭداعان اۆيارەيستەر كەيىنگە شەگەرىلسە, جولدار مەن تۋننەلدەر, كوپىرلەر جابىلعان.
ساتۋرننىڭ الىپ سىڭارى تابىلدى
نيدەرلاند پەن اقش-تىڭ استرونومدارى جاس تا الىپ J1407 ەكزوپلانەتاسىن تاپتى. ءبىر اتاپ كورسەتەرلىگى سول, ونىڭ ساقيناسى ساتۋرن ساقيناسىنان شامامەن 200 ەسە ۇلكەن ەكەن. ناقتىلاي تۇسسەك, J1407 ساقيناسىنىڭ ديامەترى 120 ميلليون شاقىرىمعا جەتەتىن كورىنەدى.
جاڭا تابىلعان پلانەتا ساقيناسىنىڭ ماڭايىندا كوپتەگەن سەرىكتەر شوعىرلانعانى بايقالعان. ولاردىڭ اراسىندا كولەمى جاعىنان جەر نەمەسە مارسقا تەڭ كەلەتىندەرى دە كوپ كورىنەدى. ال ساقينانىڭ قۇرامى تاستار مەن شاڭ-توزاڭداردان جانە استەرويدتاردان تۇراتىنى انىقتالىپتى. J1407-ءنىڭ جەردەن قاشىقتىعى شامامەن 417 جارىق جىلىنا تەڭ دەلىنىپ وتىر. عالىمداردىڭ باعامداۋىنشا, سالماعى 40 يۋپيتەردىڭ سالماعىنان اساتىن كورىنەدى.
قىسقا قايىرىپ ايتقاندا:
*بۇعان دەيىن حابارلانعانىنداي, بۇرناعى كۇنى يسپانيانىڭ اۋماعىنداعى ناتو-نىڭ اسكەري اۆيابازاسىندا گرەكيا اسكەري-اۋە كۇشتەرىنىڭ جويعىش ۇشاعى اپاتقا ۇشىراعان بولاتىن. ازىرشە اپات سەبەبىن تەكسەرۋ مۇمكىن بولماي وتىر. ويتكەنى, الدىمەن ۇشاقتان قالعان ۋلى وتىندى تازالاپ الۋ قاجەت كورىنەدى. ال اپات سالدارىنان 2 گرەكيالىق ۇشقىش پەن 11 (بىرەۋى كەيىن) فرانتسيالىق ۇشقىش قازا تاپقان ەدى.
27 قاڭتاردا حولوكوست قۇرباندىقتارىن ەسكە الۋ كۇنى اتاپ ءوتىلدى. وسىدان 70 جىل بۇرىن كەڭەس اسكەرلەرى ناتسيستەردىڭ ەڭ ۇرەيلى لاگەرلەرىنىڭ ءبىرى – وسۆەنتسيمدى ازات ەتكەن بولاتىن. اتالعان لاگەردە 4 جىل ىشىندە 1,4 ميلليون ادام ءولىم قۇشتىرىلسا, ولاردىڭ اراسىندا ەۆرەيلەر, ورىستار, پولياكتار, فرانتسۋزدار جانە باسقا دا حالىقتاردىڭ وكىلدەرى بار. بۇرناعى كۇنى وسۆەنتسيمگە ءتىرى قالعان 7,5 مىڭ ادامنىڭ بۇگىنگە دەيىن جەتكەن 300-ءى كەلىپ, تاعزىم ەتتى.
* رەسەي مەملەكەتتىك دۋماسىنىڭ دەپۋتاتتارى تومەنگى پالاتا اسحاناسىنداعى باعانىڭ ءوسىپ كەتكەنىنە الاڭداۋشىلىقتارىن ءبىلدىردى. اتاپ ايتقاندا, رلدپ فراكتسياسىنىڭ مۇشەسى سەرگەي يۆانوۆ ارىپتەستەرىن تاڭەرتەڭگىلىك اس پەن تۇسكى اس باعاسىن ساراپتامادان وتكىزۋگە شاقىردى. ءبىر توستاعان بوتقانىڭ باعاسى 2 ەسە قىمباتتاپ كەتكەنى پارلامەنتاريدىڭ اشۋىن كەلتىرسە كەرەك.
ينتەرنەت ماتەريالدارى نەگىزىندە ازىرلەندى.