حالىقتىڭ ىقىلاسى ەرەكشە

قاراڭىزشى, سايلاۋ ءوتىپ جاتقان مەزگىلدىڭ ءوزى عاجاپ. تابيعات-انا جاڭارىپ, جاسارىپ كەتكەن. كۇن دە ەرەكشە نۇرلى. اينالامىزدى قورشاعان جاسىل-جەلەك ءبۇر جارىپ, كوكتەۋى – وسى ۇلكەن شارانى سيمۆوليكالىق جاعىنان قۋاتتاعان سەكىلدى. مۇمكىن ول كەزدەيسوق نارسە شىعار. دەيتۇرعانمەن, جاقسىلىققا بالادىق. بايقايمىن, حالىق تا ۇلكەن مەرەكەدەگى سياقتى ءوزى ءبىر-بىرىمەن قۇشاقتاسىپ, قاۋىشىپ جاتتى. زادى, ءوز باسىم بۇل سايلاۋدىڭ ەرەكشە ەكەنىن بىلاي تۇسىنەمىن. ءدال بۇگىنگى قازاقستاننىڭ دامۋ قارقىنى شاپشاڭ. سوعان سايكەس كەزەكتەن تىس سايلاۋعا كەلۋشىلەر دە وتە بەلسەندى. بۇرىندارى قالاي ەدى, جۇرت سايلاۋعا ۇيقىلارى قانعان سوڭ باراتىن. مەنىڭ بالالارىمنىڭ ءوزى تۇسكە جاقىن قوزعالاتىن. بۇل جولى كەلىن بالامىز, نەمەرەمىز كەشكە كەلىپ قونىپ, تاڭەرتەڭ ەرتە №381 ۋچاسكەگە داۋىس بەرۋگە بىرگە باردىق. بارساق – قاراقۇرىم حالىق. بۇل كوڭىلگە سونداي جىلى اسەر ەتتى. سايلاۋشىلاردىڭ ءبارى قاراپ جۇرگەن ادامدار ەمەس, سايلاۋدىڭ سونشالىقتى ماڭىزدى ەكەنىن, ەل يەسى پرەزيدەنتىمىزدىڭ جاساعان ەڭبەگىنىڭ سونشالىقتى قاسيەتىن سەزىنۋى – بۇل حالىق ساناسىنىڭ وسكەندىگى دەپ ويلايمىن. قاراڭىزشى, حالىققا ۇسىنعان قان­شاما باعدارلامالار تەك ءسوز جۇزىندە ەمەس, ىسكە اسىپ جاتىر. قانشاما زاۋىتتار, جولدار, تاريحتا بولماعان الپاۋىت قۇرىلىستار سالىنۋدا. ەگەر بۇرىندارى مۇنداي جاعدايلاردى قۇلاعىمىزبەن ەستىسەك, ەندى كوزىمىزبەن كورىپ وتىرمىز. ءبىزدىڭ بولاشاعىمىز – جاستار جونىندەگى باعدارلامالار قانداي! قازىر حالىقارالىق «بولاشاق» باعدارلاماسىمەن وقۋ ءبىتىرىپ كەلگەن جاستار وتانىنا قىزمەت ەتىپ جاتىر. ولاردىڭ دارىندىلىعى, توپتان وزىپ كەلە جاتقاندىعى, بىلىمدارلىعى سەزىلىپ تۇر. مۇنداي جوبا باسقا ءبىر ەلدە بولماعان. مادەنيەت, سپورت سالاسىنداعى قامقورلىقتارى ءوز الدىنا ءبىر الەم. ءيا, بۇل بۇرىن-سوڭدى قازاقتىڭ ماڭدايىنا بىتپەگەن باقىت دەپ ويلايمىن. جاراتقاننىڭ بىزگە بەرگەن باعى عوي. ويتكەنى, قازاقتى دۇنيەجۇزىنە تانىتقان – پرەزيدەنتىمىز. ول وڭاي شارۋا ەمەس. ەلىڭدى تورتكۇل دۇنيەگە مويىنداتۋ ءۇشىن مەملەكەت باسشىسىنىڭ بويىندا ۇلى قاسيەتتەر بولۋى كەرەك. ول نۇرەكەڭدە بار. دۇنيەجۇزىنىڭ ەل بيلەگەن پرەزيدەنتتەرى بۇرىندارى قازاقستاندى باسقارىپ وتىرعان باسشىسىن اتاماق تۇگىلى, ونىڭ ەلى قايدا ورنالاسقانىن بىلمەيتىن. قازىر نۇرەكەڭە تىلەك ايتىپ, كەرەك جەرىندە ول كىسىنىڭ پىكىرىمەن دە ساناسۋدا. ءتىپتى, نازارباەۆتىڭ جۇرگىزىپ وتىرعان جۇيەسىن ءوز ەلىندە قولدانامىز دەپ وتىرعان مەملەكەتتەر دە بار. بۇعان ءوزىم اسا قۋانىشتىمىن. باياعىدا بىرەۋ ايتقان ەكەن, «مىلتىقتى ناگان كۇنىنەن بىلەمىن» دەپ. سول ايتپاقشى, نۇرسۇلتاندى جاس كەزىنەن بىلەمىن. «جايناتىپ نۇرلى جولدىڭ التىن تاڭىن, كوش باستاپ بارا جاتىر نۇرسۇلتانىڭ. حالقىنا جان اياماي قىزمەت ەتتى, جاس ۇرپاق ەلباسىنان السىن ءتالىم», – دەگەن ءبىر اقساقالدىڭ پرەزيدەنتىمىزگە بەرگەن باتاسىن گازەتتەن وقىعانىم بار ەدى, سول كوشتى باستاعان نۇرسۇلتاننىڭ نۇرلى جولى اشىق بولسىن, داڭعىل بولسىن. ءسابيت ورازباەۆ, اكتەر, مەملەكەتتىك سىيلىقتىڭ لاۋرەاتى. الماتى. سۋرەتتى تۇسىرگەن ايتجان مۇرزانوۆ.