وركەنيەتكە باستار جولدىڭ باستاۋى مەكتەپ دەسەك, مەكتەپتىڭ باستى تۇلعاسى, جۇرەگى – مۇعالىم. ءارينە, ۇستاز جۇگى – اۋىر جۇك. ۇستازدار جايىندا حالقىمىزدىڭ ۇلى باتىرى باۋىرجان مومىش ۇلى: «ۇستازدىق – ۇلى قۇرمەت. سەبەبى, ۇرپاقتاردى ۇستاز تاربيەلەيدى. بولاشاقتىڭ باسشىسىن دا, داناسىن دا, عالىمىن دا, ەڭبەكقور ەگىنشىسىن دە, كەنشىسىن دە ۇستاز وسىرەدى», دەگەن بولاتىن.
ومىرگە ۇرپاق بەرگەن انالاردى قانداي ارداقتاساق, سول ۇرپاقتى تاربيەلەيتىن ۇستازداردى دا سونداي ارداقتاۋعا مىندەتتىمىز» دەگەن. بالا بويىنا اتا-انادان كەيىنگى اقىل-وي, ادامگەرشىلىك, ادەپتىلىك, ار-ۇيات, ۇلتتىق سانا-سەزىمدى ءسىڭىرۋشى ادام – تاعى دا ۇستاز. ەندەشە, ءوز ىسىنە بەرىلگەن, جاڭالىقتى جاتسىنباي قابىلدايتىن, شاكىرتىنىڭ جانىنا نۇر قۇيىپ, وزگەلەردى باقىتقا جەتكىزسەم دەپ جۇرەتىن ۇستازداردىڭ ءجونى دە, جولى دا بولەك. وسىنداي «وي ەڭبەگىنىڭ بەينەتىن زەينەت سانايتىن» اسىل ۇستازداردىڭ ءبىرى – استانا قالاسىنداعى №69 مەكتەپ-گيمنازيانىڭ جوعارى ساناتتى ماتەماتيكا ءپانى مۇعالىمى نۇربەك قاسىمحانوۆ. ءوزىنىڭ 36 جىلدىق ۇستازدىق جولىندا ول قانشاما شاكىرتتى ۇيادان قياعا ۇشىرىپ, وقۋشىلارى مەن ولاردىڭ اتا-انالارىنىڭ سانسىز العىسىنا بولەنگەن باقىتتى جان. استانا قالاسى ەسىل اۋدانى اكىمىنەن تىنىمسىز ەڭبەگى مەن وزىق تاجىريبەسى ءۇشىن ماداقتاما الدى.
وقۋشى ءبىلىمىن ساراپقا سالاتىن پاندىك وليمپيادالار – ءبىلىم مەن ەڭبەكتىڭ دوداسى. ءبىلىمنىڭ مايتالماندارى باس قوساتىن الامان بايگەدەن جۇلدەلى ورىندى ەنشىلەۋ ەكىنىڭ ءبىرىنىڭ قولىنان كەلە بەرمەسى انىق. ونىڭ شاكىرتتەرى حالىقارالىق ماتەماتيكالىق وليمپيادالاردان جۇلدەلى ورىندار الىپ ءجۇر. نۇربەك اعايدىڭ بۇل جەڭىسى – ونىڭ ەڭبەگىنىڭ جەمىسى. سەبەبى, ول تەك ءوز ءپانىنىڭ ۇلاعاتتى ۇستازى عانا ەمەس, سىنىبىنىڭ اكەسى ىسپەتتەس, ءار شاكىرتتىڭ جۇرەگىنە ءۇڭىلىپ, جەڭىسىنە بىرگە قۋانادى. ءوز سىنىبىنداعى وقۋشىلارمەن مەكتەپ, قالا كولەمىندە ۇيىمداستىرىلعان ءىس-شارالاردىڭ باسى-قاسىندا ءجۇرىپ, قوعامدىق ىستەردەن شەت قالعان ەمەس. ۇستىمىزدەگى جىلى مەكتەبىمىزگە «بيواقپاراتتاندىرۋ جانە سينەرگەتيكا» تەحنولوگياسى ەنگىزىلگەن بولاتىن. وسى تەحنولوگيانى پايدالانۋدا نۇربەك مامىرحان ۇلى ءوزىنىڭ وزىق تاجىريبەسىن كورسەتە ءبىلدى. سونىڭ ناتيجەسىندە «بجس» تەحنولوگياسى بويىنشا I دارەجەلى ديپلوممەن ماراپاتتالىپ, تەحنولوگيانى جاقسى مەڭگەرگەنى ءۇشىن «كلاسسيك-بيس» بىلىكتىگى بەرىلدى.
سونىمەن قاتار, ول بىرنەشە اۆتورلىق باعدارلامالار قۇراستىردى. 2009 جىلى «مودۋل تاڭباسى بار تەڭدەۋلەر مەن تەڭسىزدىكتەر» اتتى ادىستەمەلىك قۇرالى باسىلىپ شىقتى. عالامتورعا ماتەماتيكا ءپانى بويىنشا ساباقتارى جىبەرىلدى. 2012 جىلى 10-سىنىپقا ارناپ «كومەكشى شەڭبەر ءادىسى» تاقىرىبىندا ەلەكتيۆتىك كۋرسىن جازدى. «گەومەتريا استانى» كىتابىندا لوگيكالىق ەكى ەسەبى جاريالاندى. ۇستازدىڭ وسىنداي تابىستارعا قول جەتكىزۋى ونىڭ ىزدەنىمپازدىعى مەن ەڭبەكقورلىعىنىڭ, اسقان جاۋاپكەرشىلىگىنىڭ ارقاسى دەۋگە بولادى. ونىڭ جاساعان ەڭبەكتەرى ءىزىن باسىپ كەلە جاتقان ۇستازدارعا ۇلگى بولارلىقتاي.
جازيرا دوسپانوۆا,
№ 69 مەكتەپ-گيمنازيانىڭ
باستاۋىش سىنىپ مۇعالىمى.
استانا.