مەن – قاراپايىم ەڭبەك ادامىمىن. بىراق جاس كەزىمدە ەلدىڭ ساياسي ومىرىنە ارالاستىم. سوندىقتان قازىر جاس كەلسە دە ەلدىڭ ساياسي, ەكونوميكالىق, الەۋمەتتىك جاعدايىنىڭ بارلىعىن قاداعالاپ وتىرامىن. ءبىزدىڭ ەلدەگى سىندارلى ساياساتتىڭ ارقاسىندا قازاقستان بۇگىنگىدەي زور دارەجەگە جەتتى. اينالامىزداعى مەملەكەتتەردەگى بەيبەرەكەتتىكتى ەستىپ, كورىپ وتىرىپ, ءوز ەلىمدەگى باۋىرمال تىنىشتىق ءۇشىن تاۋبە ەتىپ وتىرامىن. حالىقارالىق جاعدايدىڭ قىلپىلداپ, ەكونوميكالىق داعدارىس بۇكىل دۇنيەنى بۋىپ تۇرۋىنا بايلانىستى ءبىزدىڭ ەلدە دە تىندىرىلاتىن كوپ ءىستىڭ بارلىعىن ەلباسى ايتقان بولاتىن. حالقىمىز «باسشى دۇرىس بولماي, قوس تۇزەلمەيدى» دەيدى. حالىق بەكەر ايتپايدى. اينالامىزدا مەملەكەت تىزگىنىن ۇستاعانداردى قۋىپ شىققانداردى دا كوردىك. كورەگەن, دانا باسشى عانا حالقىن قيىن-قىستاۋدان الىپ شىعادى. ونىڭ دا كۋاسىمىز. سوندىقتان قيىن كەزدە, الدىمەن مەملەكەت باسشىسىن تاڭداپ الۋ كەرەك بولدى. بىزدەگى كەزەكتەن تىس پرەزيدەنت سايلاۋى دەر ۋاقىتىنداعى شەشىم ەكەنىندە داۋ جوق.
مەن قوستاناي قالاسىنداعى ءوزىم داۋىس بەرەتىن №31 سايلاۋ ۋچاسكەسىنە تۇستەن كەيىن باردىم. سونىڭ وزىندە سايلاۋشىلار لەگى تولاستاماپتى, لەك-لەگىمەن كەلىپ جاتتى. اينالايىن, حالقىمنىڭ بىرلىگىنە, وتانىمىزدىڭ بولاشاعىن اركىم ءوز بالا-شاعاسىنىڭ بولاشاعى دەپ تۇسىنگەن جاۋاپكەرشىلىگىنە ريزا بولدىم. «بىرلىك بولماي, تىرلىك بولمايدى». اتالارىمىز اتتىڭ جالىندا, تۇيەنىڭ قومىندا ءجۇرىپ قورعاپ, تاستاپ كەتكەن جەردى تۇلەتۋ ءار ۇرپاقتىڭ قاسيەتتى پارىزى بولماق. سول ءۇشىن ەڭبەك ەتۋ كەرەك. ەڭبەك بولماسا ادام ازادى, جەر توزادى. مەن زەينەتكەرلىككە شىققانشا تراكتوردان تۇسكەن جوقپىن. بالالارىمدى دا ەڭبەككە باۋلىدىم. بۇگىنگى سايلاۋدا ۇل-قىزدارىم, كەلىندەرىم مەن كۇيەۋ بالالارىم, نەمەرەلەرىم – ءبىر اۋلەت بولىپ داۋىس بەرگەنىمىزدى ماقتان تۇتامىن.
سايلاۋدا مەن ەلدىڭ تىنىشتىعى مەن بىرلىگى ءۇشىن داۋىس بەردىم, تاڭداۋىمدى جاسادىم. ءبىزدىڭ ەلىمىزدە ەڭبەك ەتۋ ءۇشىن بارلىق جاعداي جاسالعان, ەڭ باستىسى, الاكوزدىك جوق, بىرلىك, ۇلت پەن ەتنوستار اراسىنداعى ادامي سىيلاستىق بار. تىنىشتىق باردا ەتكەن ەڭبەكتىڭ قايتارىمى ءاماندا بولادى. مەن داۋىس بەرىپ تۇرىپ سونى ويلادىم.
كامشات دونەنباەۆا,
سوتسياليستىك ەڭبەك ەرى.
قوستاناي.