دۇرىلدەگەن 2015 جىلعى پرەزيدەنتتىك سايلاۋ دا ءوتىپ, تاريح تورىنە شىعىپ, ورنالاستى. ونىڭ قورىتىندىلارى مەن ساباقتارى ءالى ۇزاق مەرزىم بويىنا ساراپتالىپ, بۇگىنگى تىرشىلىگىمىزبەن قاتار جۇرەرى دە حاق.
سايلاۋ ناتيجەسى اۋەلدەن بەلگىلى بولعانىن وسى ناۋقاندا حالىق ايتتى. سايلاۋشىلار نۇرسۇلتان ءابىش ۇلىنىڭ قازاقستان دامۋىنىڭ ستراتەگيالىق باعدارلامالارىن ءبىراۋىزدان قولدايتىندارىن ايتىپ ءجۇردى دە, سايلاۋدا ءوز ۇستانىمدارىن داۋىس بەرۋ ارقىلى جاريا ەتتى. بۇل – وسى سايلاۋدىڭ ەڭ ۇلكەن, ەڭ باستى مازمۇندىق ساياسي ەرەكشەلىگى دەۋگە بولار ەدى.
سولاي بولا تۇرسا دا, سايلاۋ ناتيجەلەرىنىڭ ەڭ العاشقى اسەرلەرى مەن ەرەكشەلىكتەرىن ايشىقتاۋدىڭ دا ماڭىزى قاجەت-اق.
بىرىنشىدەن, سايلاۋ ءتىپتى بالاما ۇمىتكەرلەر بولعانىنا قاراماستان, ءبىرتۇتاس قازاقستان حالقىنىڭ ايرىقشا ىنتىماق, بىرلىگىن ايعاقتادى. بۇل سايلاۋ ءارتۇرلى كوزقاراستاعى ادامداردىڭ ءبىر ورتاق تۇلعانىڭ توڭىرەگىنە توپتاسىپ, ورتاق مۇددەگە جۇمىلۋى مەملەكەت ءۇشىن دە, قوعام ءۇشىن دە, ەرتەڭگى بولاشاق جەتىستىكتەرىمىز ءۇشىن دە وڭ ىقپال ەتەرى انىق.
ەكىنشىدەن, قازاقستان ازاماتتارىنىڭ قوعامدىق, مەملەكەتتىك بەلسەندىلىگىنىڭ بۇرىن-سوڭدى بولماعان بيىككە كوتەرىلۋى – ءبىزدىڭ ەلىمىزدەگى قۇقىقتىق كەڭىستىكتىڭ تولىعىپ, تۇراقتانۋىنىڭ, ونىڭ جاي ءسوز ەمەس, شىنايى ءومىر تىنىسىمەن استاسىپ, ءتىرشىلىگىمىزگە قالىپتاسۋىنىڭ كورىنىسى. قازاقستان ازاماتتارى ءوز تاعدىرلارىنا, ءوز مەملەكەتىنە, ونىڭ مەملەكەتتىك باسقارۋ ينستيتۋتتارىنا بەيجاي قاراي المايتىندىعىن كورسەتتى.
وسىنداي ساپالى كورسەتكىشتەردىڭ ناتيجەسىندە قازاقستاندا تىركەلگەن 9 ميلليوننان استام سايلاۋشىنىڭ 95 پايىزىنىڭ سايلاۋعا كەلىپ, ءوز داۋىستارىن بەرۋى – مەملەكەتىمىزدىڭ, ءبىزدىڭ ازاماتتىق قوعامنىڭ جاڭا ساپاعا كوتەرىلۋىنىڭ كۋاسى. ءسوز جوق, بۇل – ءوركەنيەت جولىنداعى وتە ساپالى جەتىستىك.
سايلاۋشىلاردىڭ بەلسەندىلىگى جالپى, ەلىمىزدە سايلاۋلار تاريحىندا بولماعان دەڭگەيگە كوتەرىلگەنىن ايتۋىمىز ورىندى. ەلدىڭ ەرەكشە كوڭىل-كۇيى, ىقىلاسى, سايلاۋعا مۇددەلىلىگى قوعامنىڭ اۋانىنا جاڭا سيپات, جاڭا سەزىم بەردى. بۇل – ەل ساپاسىنىڭ وسكەندىگى.
ۇشىنشىدەن, سايلاۋالدى ۇگىت-ناسيحات جۇمىستارى وتە جوعارى ۇيىمشىلدىقپەن, ەشقانداي ويدان شىعارىلاتىنداي ساياسي قايشىلىقسىز, ايقاي-شۋسىز, قاقتىعىسسىز, داۋ-دامايسىز, كوبىنە ساليقالى, ورتاق ءمۇددەلىلىك تۇرعىسىندا ءوتتى. بۇل – ءبىر جاعىنان حالىقتىڭ ءوز تاڭداۋلارىنا سەنىمدىلىگىن بىلدىرسە, ەكىنشى جاعىنان ءبىزدىڭ قوعامنىڭ ساياسي مادەنيەتىنىڭ, تاعى دا قۇقىقتىق, جالپى قوعامدىق مادەنيەتىنىڭ وسكەندىگىن, جوعارى دارەجەسىن كورسەتەدى. بارلىق شارالار زاڭ اياسىندا جۇرگىزىلدى. زاڭنان اۋىتقۋشىلىققا ورىن بەرىلمەدى. سوندىقتان دا سايلاۋ ەلىمىزدە زاڭدىق, قۇقىقتىق كەڭىستىكتىڭ تۇراقتالۋىنا وڭ ىقپالىن تيگىزگەنى دە قۋانارلىق جاعداي.
تورتىنشىدەن, ايرىقشا ەكپىن بەرىپ ايتىلۋعا ءتيىستى كورىنىس – سايلاۋعا, اسىرەسە, جاستاردىڭ قىزىعۋشىلىعى, قۇلشىنىسى. بۇل – جاستار بۇرىن سەلقوس ەدى دەگەندىكتەن ەمەس. جاس بۋىن ارۋاقىتتا دا ءوزىنىڭ بەلسەندىلىگىمەن, ومىرگە دەگەن جارقىن ىقىلاسىمەن ەرەكشەلەنەتىنى بەلگىلى. وسى سايلاۋعا ءبىزدىڭ مەملەكەتتىك تاۋەلسىزدىگىمىزدىڭ قۇرداستارى – جاس بۋىن ۇلكەن ساياسي كۇش بولىپ كەلگەنىن دە ايتقانىمىز ءجون. ولاردىڭ كوپشىلىگى سايلاۋ قۇقىقتارىن ومىرىندە ءبىرىنشى رەت جۇزەگە اسىردى. جانە سول قۇقىقتارىن ءبىلىپ, سانالى تۇردە زور جاۋاپكەرشىلىكپەن اتقارعاندارى قۋانتادى. وعان دالەل – سايلاۋالدى كەزدەسۋلەردەگى جاستاردىڭ اڭگىمەلەرى, قويعان سۇراقتارى, سويلەگەن سوزدەرى, بىلىمدەرى, دۇنيەتانىمدارى.
جاستار ەلباسىنىڭ «قازاقستان-2050», «نۇرلى جول» ستراتەگيالىق باعدارلامالارىنىڭ قازاقستان بولاشاعىنا ماڭىزدىلىعىن وتە جاقسى تۇسىنەدى, ءارى جاۋاپكەرشىلىگىن ايقىن سەزىنەدى. قۋانتاتىن تاعى ءبىر جاعداي – بۇرىن سايلاۋ ۋچاسكەلەرى تاڭنان اشىلعاندا ەڭ العاشقى داۋىس بەرۋشىلەر ادەتتە ەڭبەگى سىڭگەن ارداگەرلەر, ومىردە كورگەنى كوپ اعا بۋىن وكىلدەرى بولسا, بۇل سايلاۋدا تاڭ اتا العاشقى داۋىس بەرۋشىلەردىڭ قاتارىندا جاستار وتە كوپ بولدى. كوپتەگەن سايلاۋ ۋچاسكەلەرىندە, ءتىپتى, اشىلاتىن ۋاقىتىنان بۇرىن, كەزەككە تۇرىپ, شوعىرلانعان سايلاۋشىلاردى كورگەندە ەرەكشە اسەر سەزىنگەنىمىز دە شىندىق. ال شەتەلدىك بايقاۋشىلار بولسا, مۇنداي كورىنىسكە تاڭعالعاننان باسقا امالدارى قالمادى.
مىنە, ۇلتىمىزدىڭ, حالقىمىزدىڭ وسكەنى. بولاشاققا زور سەنىم.
بەسىنشىدەن, ارينە, بۇل سايلاۋ – ەل, مەملەكەت بولاشاعىنىڭ سايلاۋى. سايلاۋشىلار وتە سانالى تۇردە نۇرسۇلتان ءابىش ۇلىنىڭ مەملەكەتىمىزدىڭ الەۋەتىنىڭ كوتەرىلۋىنە جوعارى باعا بەرە وتىرىپ, ونىڭ بولاشاعىمىزعا بەت العان «قازاقستان-2050», «ماڭگىلىك ەل», «نۇرلى جول – بولاشاققا باستار جول» مەملەكەتىمىزدە ءدال بۇگىن, تاياۋ مەرزىمدە اتقارىلىپ, جۇزەگە اسۋىنا ءتيىستى 5 ينستيتۋتتىق رەفورمانى تۇتاستاي قولدادى. وسى وراسان باعدارلامالاردىڭ ەل تۇرمىسىنا ەنۋىنە بۇكىل حالىق ۇلكەن جاۋاپكەرشىلىكپەن ءارى ءوز وتانىنىڭ بولاشاعىنا دەگەن پاتريوتتىق سەزىممەن بىلەك سىبانا ارالاساتىنى دا ايدان انىق.
تۇيىندەي ايتساق, جالپى سايلاۋ ەلىمىزدەگى ساياسي قوعامدىق اۋاندى تازارتتى, جاقسارتتى, حالىقتىڭ كوڭىل-كۇيىن, رۋحىن, وجدانىن, ساناسىن جاڭا دەڭگەيگە كوتەردى.
سايلاۋ ۇلتىمىزدىڭ ىنتىماعىن كۇشەيتتى. بۇكىل قازاقستان حالقىنىڭ تۇتاستىعىن تۇراقتاندىردى. بيلىككە, مەملەكەتكە سەنىم كۇشەيدى. نۇرسۇلتان ءابىش ۇلىنىڭ ماڭگىلىك ەل بيىكتەرىنە باستاعان بۇكىلحالىقتىق جورىعىنىڭ جاسامپازدىق جەڭىسى بولدى.
قۋانىش سۇلتانوۆ,
ءماجىلىس دەپۋتاتى, «نۇر وتان» پارتياسى ساياسي كەڭەسىنىڭ بيۋرو مۇشەسى.