جاڭاقورعان اۋدانى قوجاكەنت اۋىلدىق وكرۋگىندە 90 ورىندىق بالاباقشا اشىلدى. ەلباسىنىڭ «بالاپان» باعدارلاماسى نەگىزىندە بوي كوتەرگەن بوبەكجايدىڭ اشىلۋ سالتاناتىنا وبلىس اكىمى قىرىمبەك كوشەرباەۆ قاتىستى.
بالاباقشا بارلىق تالاپقا ساي جاساقتالعان. جاڭا نىساننىڭ بوي كوتەرۋىمەن اۋىلدا بالاباقشا ماسەلەسى تولىقتاي شەشىمىن تاپتى. اۋىل تۇرعىندارى بۇلدىرشىندەرىنىڭ تالاپقا ساي عيماراتتا تاربيەلەنەتىنىنە ءدان ريزا.
وبلىس اكىمى ءوز سوزىندە ەلباسىمىزدىڭ بۇلدىرشىندەردى بالاباقشامەن تولىق قامتۋ قاجەتتىگىن مەجەلى مىندەت رەتىندە تاپسىرعانىنا توقتالدى. بالاباقشالار تەك بيۋدجەتتەن بولىنگەن قارجىعا سالىنىپ جاتقان جوق. كاسىپورىندار, شاعىن جانە ورتا بيزنەس نىساندارى دا بالاباقشا اشۋعا ءوز ۇلەستەرىن قوسىپ وتىر. ياعني, مەملەكەتتىك-جەكەمەنشىك ارىپتەستىك تەتىگى ەنگىزىلگەن. سونىڭ ارقاسىندا بۇگىندە وبلىسىمىزدا جەكەمەنشىك بالاباقشانىڭ سانى ارتىپ كەلەدى.
جاڭاقورعان اۋدانىنىڭ ورتالىعىندا مۇمكىندىگى شەكتەۋلى بالالارعا ارنالعان «نۇرلى سەنىم» بالاباقشاسى جۇمىس جاسايدى. بۇل جەكە بالاباقشا. ارينە, ون ەكى ءمۇشەسى ساۋ ەمەس بالالارمەن جۇمىس جاساۋدىڭ وزىندىك قيىنشىلىقتارى بار. بالاباقشا اۋدان كولەمىندەگى مۇمكىندىگى شەكتەۋلى مەكتەپكە دەيىنگى بالالاردى ساۋىقتىرىپ جانە ءار بالانىڭ جاعدايىنا قاراي ءبىلىم بەرىپ, قوعامدا ءوز ورىندارىن الۋىنا ۇلەس قوسىپ كەلەدى. ەكولوگيالىق ايماقتىڭ زاردابىن شەككەن بالالار ءۇشىن بۇل دا ۇلكەن كومەك ەكەنى جاسىرىن ەمەس.
ەرجان بايتىلەس,
«ەگەمەن قازاقستان».
قىزىلوردا وبلىسى.