اتىراۋعا شەتەل ازاماتتارى كوپ كەلەدى. ارينە, ۆاحتالىق ادىسپەن جۇمىس ىستەپ, كول-كوسىر پايدا تابۋدى كوزدەيدى. بىراق, ولاردىڭ ءبارى بىردەي ەل زاڭدىلىعىن ساقتاي بەرمەيدى. ءتىپتى, كەيبىرەۋلەرىنىڭ قۇقىق قورعاۋ قىزمەتكەرلەرىنەن جاسىرىنىپ جۇرەتىنى دە بار. سونداي ءبىر توپ قىتايلىق ازاماتتى اتىراۋ قالالىق ىشكى ىستەر باسقارماسىنىڭ ۋچاسكەلىك پوليتسيا ينسپەكتورلارى پروكۋراتۋرا قىزمەتكەرلەرىمەن بىرلەسىپ جۇرگىزگەن شارا بارىسىندا انىقتاپ, ۇستاپ الدى.
ناقتىلاي ايتقاندا, قىتاي حالىق رەسپۋبليكاسىنىڭ 38 ازاماتى قالاداعى جاتاقحانالاردىڭ بىرىندە جاسىرىنىپ جۇرگەن بولىپ شىقتى. ولار ەلىمىزدىڭ اۋماعىنا ەنگەن سوڭ ىشكى ىستەر ورگاندارىندا تىركەلۋدەن ءوتۋى ءتيىس ەكەن. الايدا, وبلىستىق ىشكى ىستەر دەپارتامەنتىنىڭ ءباسپاسوز حاتشىسى گۇلنازيرا مۇحتاروۆانىڭ حابارلاعانىنداي, قىتاي ازاماتتارى ءتيىستى زاڭدىلىقتىڭ بۇل تالابىن بۇزعان. سول سەبەپتەن, 38 قىتايلىققا قاتىستى اكىمشىلىك حاتتامالار تولتىرىلدى. قازىرگى ۋاقىتتا اتالعان شەتەلدىكتەردىڭ ەل زاڭدىلىعىن بۇزۋىمەن بايلانىستى تولتىرىلعان اكىمشىلىك حاتتاما اكىمشىلىك سوتقا جولداندى.
جولداسبەك شوپەعۇل,
«ەگەمەن قازاقستان».
اتىراۋ وبلىسى.