بۇقارا حالىقتىڭ پاراساتى
ءابساتتار دەربىسالى, ر.سۇلەيمەنوۆ اتىنداعى شىعىستانۋ ينستيتۋتىنىڭ ديرەكتورى, فيلولوگيا عىلىمدارىنىڭ دوكتورى, پروفەسسور. كەشەگى وتكەن سايلاۋدا قازاقستاندىقتار ءوز تاڭداۋىن جاساپ, داۋىس بەردى. حالقىمىزدىڭ تاڭداۋى – ۇلت تاعدىرى, ەلىمىزدىڭ بۇگىنى مەن ەرتەڭى, ءبىزدىڭ بولاشاعىمىز. ءاربىر سانالى ازامات ەلىمىزدىڭ تۇراقتىلىعى مەن وركەندەۋى ءۇشىن, حالقىمىزدىڭ ءال-اۋقاتىنىڭ ءوسۋى ءۇشىن جانە ءوزىنىڭ دە بولاشاعى ءۇشىن, وسى كەزگە دەيىن جۇرگىزىلىپ كەلگەن ەلباسىنىڭ ساياساتىن قولداپ, دۇرىس تاڭداۋ جاسادى. قازىرگى جەتكەن جەتىستىكتەرىمىزدىڭ, العان اسۋلارىمىزدىڭ بارلىعى ەلباسىنىڭ كورەگەن دە سىندارلى ساياساتىنىڭ ارقاسى دەپ بىلەمىن. ونىڭ باسشىلىعىمەن ەلىمىز ەجەلدەن اتا-بابامىز ارمانداعان تاۋەلسىزدىككە قول جەتكىزدى, الەمدىك قاۋىمداستىققا ءوزىن مويىنداتىپ, تۇعىرى بەرىك مەملەكەتكە اينالدى. الدا كوپتەگەن ماقساتتار, اتقارىلاتىن ىستەر بار. وسى ماقساتتارعا ءبىز تەك ەلباسىمەن بىرگە جەتەتىنىمىزگە مەن سەنىمدىمىن. ويتكەنى, ەلباسىنىڭ ستراتەگيالىق جوسپارلارى مەن باعدارلامالارى بولاشاققا اپاراتىن ماڭىزدى جوبالار. قازاقستان كەلەشەكتە باي, قۋاتتى, ءبىلىمدى جانە جاسامپاز قوعامى بار مەملەكەتكە اينالاتىنى ءسوزسىز. قازىرگى ساياسي تۇراقسىزدىق كەزەڭىندە, الەمدى عالامدىق داعدارىس جايلاعان جاعدايدا ەلىمىزدەگى تىنىشتىق پەن تۇراقتىلىقتىڭ قادىرىن تۇسىنە ءبىلىپ, دۇرىس تاڭداۋ جاساعانىمىز داۋسىز. قازاقستان وسى جىلدار ىشىندە تەك قانا جەڭىستەرمەن كەلە جاتىر ەدى. بۇل سايلاۋ دا اسقارالى بەلەستەن وتكىزگەن ايتۋلى جەڭىس بولدى, بۇقارا حالىق ءوزىنىڭ اقىلى مەن پاراساتىن تاعى ءبىر كورسەتتى.تاڭداۋدىڭ دانالىعى
سەرگەي ءازىموۆ, كينورەجيسسەر, قازاقستاننىڭ ەڭبەك سىڭىرگەن قايراتكەرى. مەن كەشەگى وتكەن پرەزيدەنت سايلاۋىندا كوپۇلتتى, ون جەتى ميلليوننان استام حالقى بار قازاقستان ءوز تاڭداۋىن دۇرىس جاسادى دەپ ويلايمىن. ەلىمىزدەگى تۇراقتىلىقتى, بەيبىت ءومىردى, جاسامپازدىقتى تىلەيتىن ەل-جۇرتىمىز ءوز قالاۋىن جاسادى. قازىرگى ساياسي جانە ەكونوميكالىق تۇراقسىزدىق جاعدايىندا, تالاي قيىن كەزەڭدەردى باسىنان كەشىرگەن, تالاي قاسىرەتتەن وتكەن تاجىريبەسى بار حالقىمىز بەيبىت ءومىر مەن تۇراقتىلىقتىڭ ماڭىزىن جاقسى تۇسىنە وتىرىپ, دۇرىس جانە دانا شەشىم قابىلدادى دەگەن سەنىمدەمىن. جۇرتشىلىق وسى ۇلتتار اراسىنداعى بىرلىگىمىز بەن ءوزارا كەلىسىمدى, سونداي-اق, جەتكەن قۇندىلىقتارىمىزدى ساقتاپ قالۋعا مىندەتتى ەكەنىمىزدى تۇسىنەدى. سوندىقتان دا, مەن سايلاۋ تولىعىمەن ءوز مارەسىنە جەتتى دەپ ويلايمىن. قازىرگى كەزەڭدە ءاربىر ادام ءوزى تاڭداۋ جاساۋعا قۇقىلى, وعان ەشقانداي شەك قويىلمايدى. ءبىزدىڭ دانا حالقىمىز ەلىمىزدىڭ بولاشاعى ءۇشىن لايىقتى تاڭداۋدى جاسادى. ۇلتىمىزدىڭ دانالىعى مەن پاراساتتىلىعى حالىقتىڭ ەڭ جوعارى مادەنيەتى بولىپ تابىلادى. وسى قازاقستاندىق دۇنيەتانىممەن جانە سەنىممەن قالىپتاسقان ساياسي تەحنولوگيا ادامي مادەنيەتپەن تىعىز بايلانىستى. قازاقستان حالقى, سونىڭ ىشىندە, ەلىمىزگە ەرىكسىز جەر اۋدارىلعان ۇلتتار مەن ەتنوستار حالىقتار اراسىنداعى بىرلىكتى, سىيلاستىق پەن ءوزارا تۇسىنىستىكتى قازاقستاندىق قوعامنىڭ ۇلى جەتىستىكتەرىنىڭ ءبىرى ەكەنىن ايقىن سەزىنىپ, باعالايدى. قازاقتا «جاقسىسىن اسىرىپ, جامانىن جاسىرادى» دەگەن ناقىل ءسوز بار. شەشىلمەگەن ماسەلەلەر كوپ, الايدا, ەلىمىزدەگى تۇراقتىلىق, ازاماتتىق تاتۋلىق پەن ۇلتارالىق كەلىسىم – ەندى عانا قالىپتاسىپ كەلە جاتقان قازاقستاندىق ازاماتتىق قوعامنىڭ باستى قۇندىلىقتارى. وسى قول جەتكىزگەن ءوزارا قاتىناستار جۇيەسىن, رۋحاني قۇندىلىقتار جۇيەسىن ساقتاپ قالۋ وتە ماڭىزدى, ونى ارتتىرىپ, كەلەسى ۇرپاققا جەتكىزۋ – ءبىزدىڭ باستى ماقساتىمىز. جەڭىسىمىز قۇتتى بولسىن, اعايىن, دەمەكپىن!بۇلتارتپايتىن جەڭىس
مارال ىسقاقباي, جازۋشى, قازاقستاننىڭ ەڭبەك سىڭىرگەن قايراتكەرى. قازاقستان حالقى كەشەگى سايلاۋ ارقىلى ەلباسىنا دەگەن جوعارى سەنىمىن تاعى دا قۋاتتادى. سايلاۋ ناۋقانى باستالعالى بەرى ءاربىر ادام, ءاربىر قازاقستاندىق سەنىمدى تۇردە ءوز تاڭداۋىن جاساپ قويدى دەپ ويلايمىن. ويتكەنى, ەلىمىزدىڭ بولاشاعى مەن دامۋى, حالقىمىزدىڭ, كەلەر ۇرپاعىمىزدىڭ كەلەشەگى وسى تاڭداۋىمىزبەن تىكەلەي بايلانىستى ەكەندىگى بارىمىزگە ايان. قازاقستان جۇرتشىلىعى ءوزىنىڭ ساياسي بەلسەندىلىگىن, بىرلىگىن, كەلەشەگىنە نەمقۇرايدى قارامايتىندىعىن كورسەتتى. بۇل ەلىمىزدىڭ تاعدىرىنا, مەملەكەتىمىزدىڭ بولاشاعىنا دەگەن اسقان جاۋاپكەرشىلىكتى بىلدىرەدى. وسى سايلاۋدا حالىقتىڭ سەنىمى اقتالىپ, نۇرسۇلتان نازارباەۆ بۇلتارتپايتىن جەڭىسكە جەتتى. ەلباسىنىڭ جەڭىسى – ەلىمىزدىڭ جەڭىسى! بۇل – حالقىمىزدىڭ تۇڭعىش پرەزيدەنتىنىڭ سىندارلى ساياساتىن, مەملەكەتىمىزدىڭ ەكونوميكالىق جانە الەۋمەتتىك قارقىندى دامۋىن, تاۋەلسىزدىك جىلدارىندا جەتكەن تابىستارىمىزدى قولداۋىنىڭ جارقىن كورىنىسى. ەلباسىنىڭ اسا زور ساياسي تاجىريبەسى, ومىرلىك دانالىعى, سىندارلى ساياساتى, پاراساتى مەن سارقىلماس كۇش-قۋاتى ءالى ۇزاق جىلدار بويى قازاقستان حالقىنىڭ مۇددەسىنە قىزمەت ەتەتىنىنە كۇمان جوق. ءبىز باقىتتىمىز, ءبىز باقىتتى ەلدە ءومىر ءسۇرىپ جاتىرمىز. سوندىقتان دا, ارقاشان زامانىمىز تىنىش, ەلىمىزدە تۇراقتىلىق بولسا دەپ تىلەيمىن. جەڭىسىمىز باياندى بولسىن, قازاقستاندىقتار!مەن دە سەنىمدىمىن
ءشومىشباي ساريەۆ, اقىن, قازاقستاننىڭ ەڭبەك سىڭىرگەن قايراتكەرى. پرەزيدەنتتىك سايلاۋ – ەل ومىرىندەگى ساياسي ماڭىزى اسا زور وقيعا بولدى. وعان قازاقستاندىقتاردىڭ بەلسەنە قاتىسقانىنا ءبارىمىز كۋامىز. حالقىمىز ءوز تاڭداۋىن جاسادى جانە باسىم كوپشىلىك داۋىسپەن پرەزيدەنتتىككە نۇرسۇلتان نازارباەۆتىڭ سايلانعانىنا ءبىز كەرەمەت قۋانىشتىمىز. نۇرسۇلتان نازارباەۆتىڭ جەڭىپ شىعاتىنىنا قازاقستان حالقى سەنىمدى بولدى. ونى ءبىراۋىزدان قولداپ, داۋىس بەردى. ول ەلباسىنىڭ حالىق الدىنداعى بەدەلىنىڭ, ونىڭ سارابدال ساياساتىنا دەگەن رياسىز سەنىمنىڭ ايعاعى. ويتكەنى, حالقىمىز قازىرگى الەمدىك داعدارىس جانە كوپتەگەن مەملەكەتتەردەگى شيەلەنىستەر جاعدايىندا ەلىمىزدەگى تۇراقتىلىق پەن تىنىشتىقتىڭ ساقتالۋىنا, ونى ىلگەرى جەتەلەيتىن دە, كەمەل بولاشاققا اپاراتىن دا بۇگىنگى ەلباسى نۇرسۇلتان نازارباەۆ ەكەندىگىنە كامىل سەنەدى. ەلىمىزدىڭ بىرلىگى مەن تىنىشتىعىن تىلەيتىن حالقىمىز قازاقستاننىڭ قارقىندى دامۋى ءۇشىن ەلباسىنىڭ ءوزى باستاعان ىستەرىن, ستراتەگيالىق باعدارلامالارى مەن جوبالارىن جۇزەگە اسىرىپ, اياعىنا دەيىن جەتكىزۋىن قالايدى. سوندىقتان دا, ەلباسىمىزدىڭ باسشىلىعىمەن تالاي قيىن كەزەڭدەردى باستان كەشىرگەن قازاقستاننىڭ بولاشاعى جارقىن دا باقىتتى بولاتىنىنا مەن دە سەنىمدىمىن. ەلىمىز وركەندەي بەرسىن, تاۋەلسىزدىگىمىز باياندى بولسىن, اعايىن! جازىپ العان قورعانبەك امانجول, «ەگەمەن قازاقستان». الماتى.