«اڭقاۋ ەلگە ارامزا مولدا» بولعان ينتەرنەت الاياقتارى قيتۇرقى ارەكەتتەرىمەن قاراپايىم حالىقتى قۇرىعىنا ىلىكتىرىپ, 30 مىڭ ادامنىڭ جەكە بانك كارتالارىن قىلمىستىق سحەماعا پايدالانعان, دەپ حابارلايدى Egemen.kz.
24.kz سايتىنىڭ جازۋىنشا قارجى مونيتورينگى اگەنتتىگى 30 مىڭ ادامنىڭ ەسەپشوتى ەسىرتكى ساۋداسىنا قاتىستى وپەراتسياعا قولدانىلعانىن مالىمدەگەن. الاياقتاردىڭ ارام ويىنا الدانعاندار نەگىزىنەن جۇمىسسىزدار, ستۋدەنتتەر جانە قوعامنىڭ وسال توپ وكىلدەرى كورىنەدى.
«استانا مەن قاراعاندى قالاسىنىڭ ستۋدەنتتەرى جانە تەمىرتاۋلىق 64 جاستاعى زەينەتكەردىڭ شوتتارى ارقىلى 100 ملن تەڭگەدەن استام قارجى جىلىستاتىلعان. ولار «دروپ» رەتىندە Telegram-دۇكەنىندە ەسىرتكى ساتۋدان الىنعان اقشانى وتكىزۋگە قاتىسقان. الاياقتار وسىلايشا 2 ملرد تەڭگەدەن استام قارجىنى اينالدىرعان. سول سياقتى الماتىدا 20 جاستاعى ستۋدەنتتىڭ ەسەپشوتىنا 900-دەن استام ادامنان 22,5 ملن تەڭگە اۋدارىلعان», دەيدى قر قما رەسمي وكىلى الىبەك ءابدىلوۆ.
ماماندار مۇنداي زاڭسىز سحەمالارعا قاتىسۋ سالدارى اكىمشىلىك جانە قىلمىستىق جاۋاپكەرشىلىككە اپاراتىنىن ەسكەرتىپ, تۇرعىنداردان ساق بولۋدى سۇراپ وتىر.