قازاقستاندا ەكونوميكالىق-الەۋمەتتىك دامۋدىڭ, دەموكراتيالىق ىلگەرىلەۋدىڭ ايقىن باعدارى بار. مەنىڭ اقتوبەگە كەلمەگەنىمە 15 جىلداي بولعان ەدى. ەندى, مىنە, رەسەيدىڭ ورىنبور وبلىسىنان 19 بايقاۋشى قاتارىندا جولىم ءتۇستى.
ءبىزدى وزدەرىمىز بەكىتىلگەن سايلاۋ ۋچاسكەلەرىندە جىلى شىرايمەن قارسى الىپ, سايلاۋ ناۋقانىنىڭ ءوتۋ بارىسىن بايقاۋىمىزعا جاعداي جاسالدى, تولىق اقپارات الدىق. الدىمەن مەتاللۋرگتەر مادەنيەت ۇيىندە ورنالاسقان №38 سايلاۋ ۋچاسكەسىنە كەلگەنىمىزدە, ادامداردىڭ قاراسى كوپتىگى ءتانتى ەتتى. سايلاۋ ۋچاسكەلەرى ۋاقتىلى اشىلدى. سايلاۋ جاشىكتەرىن رەتكە كەلتىرۋ, بيۋللەتەندەردى تاراتۋ زاڭعا سايكەس جۇرگىزىلدى. حالىق مەرەكەگە كەلگەندەي ەرتەلەتىپ جينالدى. ءبىرىنشى داۋىس بەرگەن سايلاۋشىعا, ەڭ جاس جانە قارت سايلاۋشىعا قۇرمەت كورسەتۋ دە ۇمىتىلمادى, سىي-سياپات جاسالدى. ەڭ باستىسى, سايلاۋدى ۇيىمداستىرۋدا كەمشىلىككە جول بەرىلمەدى. مۇنىڭ ءوزى حالىقتىڭ پرەزيدەنتتىك سايلاۋعا قانشالىقتى ءمان بەرەتىنىن, ەلدىڭ ەرتەڭىنە بەيجاي قاراي المايتىنىن كورسەتەدى.
جالپى وبلىستا دا, قالادا دا وڭ وزگەرىستەر كوپ ەكەن. وسىنىڭ ءوزى ەلدەگى تۇراقتىلىق پەن تاتۋلىقتىڭ ارقاسى ەكەنى انىق. اقتوبە قازاقستاننىڭ ادەمى قالالارىنىڭ بىرىنە اينالعان. بۇل دا ن.نازارباەۆتىڭ سارابدال ساياساتىنىڭ ناتيجەسى ەكەنى ءسوزسىز. تۇرعىنداردىڭ كوڭىل-كۇيى كوتەرىڭكى. سايلاۋ باستالعاندا وسى ۋچاسكەدە ءبىر قىز بالا ۆيولەنچەل ويناپ, ادەمى اسەرگە بولەدى. حالىقتىڭ سايلاۋعا ۇيىمشىلدىقپەن قاتىسقانىن كوردىك. ەكىنشى ۋچاسكەدە دە وسىنداي ۇيىمشىلدىقتى اڭعاردىق. سايلاۋشىلاردىڭ دەموكراتيالىق مادەنيەتكە داعدىلانىپ قالعانى ايقىن كورىندى. ءبىر سوزبەن ايتقاندا, ناعىز دەموكراتيالىق سايلاۋ بولدى.
الدىن الا ەسەپتەۋلەردىڭ وزىندە ن.نازارباەۆتىڭ وزگە ۇمىتكەرلەرگە قاراعاندا قارا ءۇزىپ شىققانى بەلگىلى بولدى. پرەزيدەنتتەرىڭىزدىڭ كەزەكتەن تىس سايلاۋداعى جەڭىسىمەن قۇتتىقتايمىن. نۇرسۇلتان نازارباەۆتىڭ جەڭىسى تەك سىزدەر ءۇشىن عانا ەمەس, كورشىلەس رەسەي ءۇشىن دە ماڭىزدى. ەكى ەلدىڭ اراسىندا كورشىلىك تاتۋلىق پەن ىنتىماقتاستىق ودان ءارى دە نىعايا تۇسەتىنىنە سەنىم مول. سەبەبى, ن.نازارباەۆتىڭ ەۋرازيالىق ەكونوميكالىق وداقتىڭ باستاماشىسى رەتىندە رەسەيدە دە بەدەلى جوعارى. جالپى, قازاقستاندىقتار ءوز تاڭداۋلارىن جاسادى. مۇنىڭ ءوزى ەلدىڭ ەرتەڭى ءۇشىن سەنىمدىلىككە بەرىك نەگىز قالاعان شارا بولدى دەپ ايتۋعا نەگىز بەرەدى.
ولەگ ديموۆ,
تمد ميسسياسىنىڭ بايقاۋشىسى.
اقتوبە وبلىسى.