ۇلى جەڭىستىڭ 70 جىلدىعىنا ورايلاستىرىلا وتكىزىلىپ جاتقان ۇلكەندى-كىشىلى قانداي دا شارانىڭ ءمان-مازمۇنى ەرەكشە. جۋىردا جانباي اۋىلىنداعى حاميدوللا ناۋبەتوۆ اتىنداعى ورتا مەكتەپتە «ۇستاز ۇلاعاتى – ءومىر مۇراتى» تاقىرىبىندا ءوتىپ, بار سانالى عۇمىرىن حالىق اعارتۋ سالاسىنا ارناعان ۇلاعاتتى ۇستاز, سوعىس جانە ەڭبەك ارداگەرى بەرجانوۆ بەردەش اتىنداعى انا ءتىلى كابينەتىنىڭ اشىلۋ سالتاناتى دا وسىناۋ مەرەيلى مەرەكەگە ارنالدى. بۇل بۇعان دەيىن دە ءبىرى – ۇلى وتان سوعىسى جىلدارىندا قانقۇيلى جاۋمەن الىسىپ, ءبىرى تىلدا تەر توككەن, اتالعان ءبىلىم ورداسىندا ۇزاق جىلدار بويعى ۇلاعاتتى قىزمەتىمەن جاس ۇرپاققا ءبىلىم ءنارىن بەرىپ, ۇلكەن ومىرگە قانات قاققىزعان ناسىر نۇرماشەۆ, اياپبەرگەن پانابەرديەۆ, شاپاعات ءابىلوۆ سىندى بۇگىندە بۇل ومىردە جوق ۇستازدارعا گەوگرافيا, ورىس ءتىلى, تاريح كابينەتتەرىنە ەسىمدەرىن بەرۋ ارقىلى ەل جادىندا ەڭبەكتەرىن جاڭعىرتىپ, ونەگەلى ومىرلەرىن جاس ۇرپاققا تاعىلىم قىلۋدى ماقسات تۇتۋدان تۋىنداعان يگىلىكتى باستامانىڭ جاراسىمدى جالعاسى دەسەك بولادى. اۋىلداعى ساز مەكتەبىنىڭ ۇلت اسپاپتار وركەسترىنىڭ ورىنداۋىنداعى جانە سۇيەمەلدەۋىندەگى ءان-كۇيلەرمەن تىڭداۋشىلارىن ءتانتى ەتىپ, كەشتىڭ ءون بويىنا كەيىپكەردىڭ ءومىر جولىنان ورىلگەن بەينەبايانمەن ورنەكتەلىپ وتىرعان ءمانى زور, مازمۇنى تەرەڭ باسقوسۋدا وزگە دە ءبىلىم وشاقتارىنا ۇلگى بولارلىق وسىناۋ ءىستىڭ ۇيىتقىسى بولىپ جۇرگەن مەكتەپ ديرەكتورى عيمادي جيەنعازيەۆ ارداگەر ۇستازدىڭ ءومىرى, ەڭبەك جولدارى تۋرالى تارتىمدى بايانداما جاسادى.
1916 جىلى دۇنيەگە كەلىپ, قىرىق جىلداي مەكتەپتەردە مۇعالىمدىك, باسشىلىق جۇمىستار اتقارعان, ونىڭ سوڭعى ون التى جىلىندا ول كەزدە كۋيبىشەۆ اتىنداعى ورتا مەكتەپ اتالعان اتالمىش ءبىلىم ۇياسىندا تەر توككەن بەردەش بەرجان ۇلىنىڭ ءتورت جىلعا جۋىق ءومىرى مايدانداعى جورىق جولدارىندا ءوتتى. 1942 جىلدىڭ قاڭتارىندا اسكەرگە الىنىپ, ستالينگراد, ۆورونەج مايداندارىندا نەمىس-فاشيست باسقىنشىلارىنا قارسى سوعىسقان ول الدىڭعى شەپتە پۋلەمەتشى بولدى. ەكى مارتە جاۋ وعىنان جارالانعان جاۋىنگەر ەمدەلىپ شىعىسىمەن قايتا ساپقا تۇرىپ, زاپاستاعى اتقىشتار پولكىنە, كەيىن شەپتەگى قۇراماعا الىنىپ, 1945 جىلدىڭ قازانىنا دەيىن ليتۆا, لاتۆيا, ەستونيا ەلدەرىن جاۋدان تازارتۋعا اتسالىسىپ, جەڭىستى لاتۆيادا قارسى الىپ, ەلگە ورالعان. مايدانگەر ۇستاز جارى قانزيلا سىدىققىزى ەكەۋى جارتى عاسىردان استام جۇپتاسقان ومىرلەرىندە دۇنيەگە كەلگەن ون پەرزەنتكە ءتالىمدى تاربيە بەرگەن ونەگەلى وتباسى يەلەرى اتاندى.
سالتاناتتى شارادا ب.بەرجان ۇلىنىڭ ۇستازدىق تۇلعاسى, ادامي بولمىسى تۋرالى اۋدان اكىمىنىڭ ورىنباسارى ءمادي وتەعاليەۆ, اۋداندىق ءبىلىم ءبولىمىنىڭ باسشىسى باقبەرگەن قاراباەۆ, اۋىلدىق وكرۋگ اكىمشىلىگىنىڭ باس مامانى ادايبەك ەسەكەش, بىرگە جۇمىس جاساعان ارىپتەسى زاكاريا جۇماعازيەۆ, شاكىرتتەرى اتىنان ءشاربانۋ ناسىرقىزى تولعانىستى لەبىزدەرىن توعىستىردى. ال اۋلەت اتىنان ءسوز العان بەكەڭنىڭ ءىنىسى امانگەلدى بەرجانوۆ پەن ونىڭ زايىبى, بەلگىلى ايتىس اقىنى ءجانيبا قاراساەۆا, ۇلى جايناربەك يگى ىسكە ۇيىتقى بولعان مەكتەپ ۇجىمى مەن اكىمشىلىگىنە ريزاشىلىق سەزىمدەرىن ءبىلدىردى, مەكتەپتىڭ ەڭ ۇزدىك ءۇش وقۋشىسىنا وقۋ جىلى قورىتىندىسىمەن ءداستۇرلى ستيپەنديا تاعايىنداۋ جونىندەگى نيەتتەرىن جەتكىزدى. ەكى بولىمنەن تۇراتىن شارانىڭ سوڭعىسى «بەرجانوۆ بەردەش اتىنداعى انا ءتىلى كابينەتىنىڭ» اشىلۋىنا ارنالىپ, لەنتاسى قيىلدى, مايدانگەر ۇرپاقتارىنىڭ دەمەۋشىلىگىمەن جابدىقتالىپ, كورنەكىلىكتەرمەن اسەم بەزەندىرىلگەن سىنىپتا شاكىرتتەردىڭ الاڭسىز ءبىلىم نارىمەن سۋسىنداۋىنا مۇمكىندىك مول.
جولامان داۋلەتيار.
اتىراۋ وبلىسى,
يساتاي اۋدانى.