ەلباسى نۇرسۇلتان نازارباەۆ جوعارعى سوت توراعاسى قايرات ءماميدى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
ق.ءمامي مەملەكەت باسشىسىنا سوتتاردىڭ 2014 جىلعى قىزمەتىنىڭ قورىتىندىلارى تۋرالى باياندادى.
قازاقستان پرەزيدەنتى بۇگىندە سوت جۇيەسى الدىندا سۋديالاردىڭ VI سەزىندە بەلگىلەنگەن جاڭا ءمىندەتتەر تۇرعانىنا نازار اۋداردى.
نۇرسۇلتان نازارباەۆ رەسپۋبليكا سوتتارى 2015 جىلدان باستاپ ازاماتتاردىڭ قۇقىقتارى مەن بوستاندىقتارىن قورعاۋ كەپىلدىگىن نىعايتۋعا باعىتتالعان جاڭا قىلمىستىق زاڭناما اياسىندا جۇمىس ىستەپ جاتقانىنا توقتالدى.
سونىمەن قاتار, مەملەكەت باسشىسى سوت تورەلىگىن اتقارۋدى ودان ءارى جاقسارتۋ, وعان حالىقتىڭ قولجەتىمدىلىگىن قامتاماسىز ەتۋ, قازاقستاننىڭ سۋديالار كورپۋسىنىڭ كاسىبيلىگىن ارتتىرۋ قاجەتتىگىن دە ايتتى.
ق.ءمامي سوتتارعا 1,2 ميلليوننان استام ارىز جانە ءىس كەلىپ تۇسكەنىن مالىمدەدى. ول ازاماتتىق ىستەردىڭ سانى شامامەن 450 مىڭ بولۋى قازاقستان ازاماتتارىنىڭ سوت جۇيەسىنە دەگەن سەنىمى ارتقاندىعىنىڭ ايعاعى ەكەنىن ايتتى.
جوعارعى سوت توراعاسى ەلەكتروندى سوت ءوندىرىسىن ەنگىزۋ جۇمىستارى جونىندە دە باياندادى. سونىمەن قاتار, سوت جۇيەسىندەگى سىبايلاس جەمقورلىققا قارسى كۇرەستى سەگىز باعىت بويىنشا كۇشەيتۋ جونىندە كەشەندى شارالار قابىلداندى. سولاردىڭ قاتارىندا سوتتار قىزمەتىنىڭ اشىقتىعىن ارتتىرۋ, يننوۆاتسيالىق تەحنولوگيالاردى ەنگىزۋ, سۋديالاردى ىرىكتەۋ جۇمىستارىن كۇشەيتۋ, تۇراقتى الەۋمەتتىك زەرتتەۋلەرمەن قامتۋ جانە باسقا شارالار بار.
كەزدەسۋ قورىتىندىسى بويىنشا مەملەكەت باسشىسى بىرقاتار ناقتى تاپسىرمالار بەردى.