قىركۇيەكتە ەڭبەك نارىعىندا جۇمىس ىزدەۋشىلەردىڭ ازايعانىنا بايلانىستى بوس جۇمىس ورىندارى كوبەيگەن. جۇمىس ديناميكاسى مەن تۇيىندەمەدەگى ايىرماشىلىقتار ەلدەگى ەكونوميكالىق بەلسەندىلىكتىڭ بارلىق ايماقتا بىركەلكى ەمەستىگىن كورسەتەدى. سوعان قاراماستان, سۇرانىس پەن ۇسىنىستىڭ بىلىكتىلىك قۇرىلىمىندا تەپە-تەڭدىك بايقالادى.
وتكەن ايدا Enbek.kz ەلەكتروندىق ەڭبەك بيرجاسىندا ۇزىن-سانى 136,6 مىڭ بوس جۇمىس ورنى ورنالاستىرىلعان. بۇل تامىز ايىنداعى دەرەكپەن سالىستىرعاندا 4%-عا (4,9 مىڭ) ارتىق. وسى رەتتە جۇمىس ىزدەۋشىلەردىڭ بەلسەندىلىگى تومەندەگەنى بايقالادى. قىركۇيەكتە ەڭبەك بيرجاسىنا 122,5 مىڭ تۇيىندەمە جاريالانسا, بۇل تامىزداعى كورسەتكىشكە قاراعاندا 5%-عا (6,4 مىڭ) از. كادرلارعا سۇرانىستىڭ ايتارلىقتاي وسكەنى كۇزگى-قىسقى جىلىتۋ ماۋسىمى مەن ونەركاسىپ, قۇرىلىس, كولىك جۇمىسشىلارىنا سۇرانىستىڭ ارتقانىنان قالىپتاسىپ وتىر. مۇنداي جۇمىستارعا 1,1 مىڭ بوس ورىن ۇسىنىلىپتى.
ەڭبەك نارىعىنداعى ءتۇرلى وزگەرىستەرگە قاراماستان, ءبىلىم بەرۋ سالاسى ەڭ سۇرانىسقا يە سالا بولىپ قالا بەرەدى. ويتكەنى ەڭبەك بيرجاسىندا ورنالاستىرىلعان بوس جۇمىس ورىندارىنىڭ ۇشتەن بىرىنەن استامىن وسى سالا قۇراعان (53,2 مىڭ). وزگە دە قىزمەت كورسەتۋ تۇرلەرى سالاسىنا تاعى 15,8 مىڭ قىزمەتكەر قاجەت بولىپتى. سول سەكىلدى 9,5 مىڭ بوس جۇمىس ورنىن دەنساۋلىق ساقتاۋ, حالىققا الەۋمەتتىك قىزمەت كورسەتۋ سالاسىنىڭ ۇيىمدارى ورنالاستىرعان. تارقاتىپ ايتار بولساق, ءبىلىم بەرۋ سالاسىندا تاربيەشىلەرگە 2,7 مىڭ بوس جۇمىس ورنى ۇسىنىلعان. ماتەماتيكا مۇعالىمدەرىنە 2,1 مىڭ, باستاۋىش سىنىپ مۇعالىمدەرىنە 2,1 مىڭ بوس جۇمىس ورنى سۇرانىسقا يە بولىپتى. وسىعان قوسا دەنساۋلىق ساقتاۋ سالاسىندا سانيتارلارعا 1,3 مىڭ بوس جۇمىس ورنى, مەدبيكەلەرگە 1,3 مىڭ, جالپى پراكتيكا دارىگەرلەرىنە 604 بوس جۇمىس ورنى ۇسىنىلىپتى.
بوس جۇمىس ورىندارىنىڭ كوبەيۋىنە قاراماستان, قىركۇيەكتە اۋماقتارعا قاتىستى ديناميكا ايتارلىقتاي وزگەرگەن. بوس جۇمىس ورىندارىنىڭ ءوسۋى جامبىل (40%-عا), تۇركىستان (39%-عا) وبلىستارىندا, سونداي-اق شىمكەنت قالاسىندا (34%-عا) تىركەلگەن. بۇل اتالعان وڭىرلەردە ەكونوميكالىق بەلسەندىلىكتىڭ ارتقانىن كورسەتەدى. كەرىسىنشە بوس ورىندار سانىنىڭ ايتارلىقتاي تومەندەۋى اتىراۋ (28%-عا), شىعىس قازاقستان وڭىرلەرىندە (23%-عا), اباي وبلىسىندا (17%-عا) بايقالعان. بۇل ماۋسىمدىق جۇمىستاردىڭ اياقتالۋىنا نەمەسە باسقا جەرگىلىكتى فاكتورلارعا بايلانىستى بولۋى مۇمكىن دەيدى ماماندار.
تۇيىندەمە سانى اتىراۋ وبلىسىندا, الماتى قالاسىندا, اباي وبلىسىندا ەداۋىر تومەندەگەن. قىزىلوردا, الماتى, شىعىس قازاقستان, ماڭعىستاۋ, اقتوبە وبلىستارىنداعى كورسەتكىش 10%-دان اسا ازايعان. استانا قالاسىندا تۇيىندەمە سانى 9%-دى قۇراعان. ءبىر قىزىعى, كەيبىر ايماقتاردا كەرىسىنشە, تۇيىندەمەلەردىڭ كوبەيگەنى بايقالعان. مىسالى, جامبىل وبلىسىندا 18%-عا, قوستاناي وبلىسىندا 16%-عا, اقمولا وبلىسىندا 14%-عا, تۇركىستان وبلىسىندا 11%-عا كوبەيگەن.
تاعى ءبىر ستاتيستيكانى كەلتىرسەك, قىركۇيەكتە جۇمىس بەرۋشىلەر باس قۇرىلىسشىلارعا (ايىنا 716 مىڭ تەڭگە), اۆياتسيا سالاسىنداعى ينجەنەرلەرگە (565 مىڭ تەڭگە), تاۋ-كەن ونەركاسىبىندەگى قىزمەت باسشىلارىنا (502 مىڭ تەڭگە) جوعارى جالاقى ۇسىنعان. ال جۇمىس ىزدەۋشىلەر بولسا ءوندىرۋشى ونەركاسىپتىڭ قۇرىلىمدىق بولىمشەلەرىنىڭ باسشىلىعىنا (1,2 ملن تەڭگە), اقپارات, بايلانىس سالاسىنداعى باسشىلاردىڭ ورىنباسارلىعىنا (858 مىڭ تەڭگە), كوممەرتسيالىق سەكتورداعى ماركەتينگ قىزمەتىنىڭ باسشىلىعىنا (847 مىڭ تەڭگە) جوعارى جالاقى سۇراعان.