وڭتۇستىك قازاقستانداعى ورتا مەكتەپكە بەرىلدى
بۇرناعى كۇنى قازاقستان رەسپۋبليكاسى ۇكىمەتىنىڭ قاۋلىسىمەن ەلىمىزدەگى بىرقاتار مەكتەپتەرگە كەڭەس وداعىنىڭ باتىرلارى مەن ۇلى وتان سوعىسى ارداگەرلەرىنىڭ ەسىمدەرى بەرىلدى.
«قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى» زاڭىنا سايكەس قابىلدانعان قاۋلى قوستاناي, قىزىلوردا, پاۆلودار, ءوڭتۇستىك قازاقستان جانە شىعىس قازاقستان وبلىستارىنداعى ءبىرشاما ءبىلىم مەكەمەلەرىن قامتىدى. سولاردىڭ قاتارىنداعى وڭتۇستىك قازاقستان وبلىسى ورداباسى اۋداندىق ءبىلىم ءبولىمىنىڭ «شۇبارسۋ جالپى ورتا مەكتەبى» كوممۋنالدىق مەملەكەتتىك مەكەمەسى بۇدان بىلاي «مۇحامەتقۇل يسلامقۇلوۆ اتىنداعى جالپى ورتا مەكتەپ» كوممۋنالدىق مەملەكەتتىك مەكەمەسى دەپ اتالاتىن بولدى.
ۇلى وتان سوعىسىندا اتاقتى №8 گۆارديالىق-پانفيلوۆشىلار ديۆيزياسى قۇرامىندا باتالون كومانديرى رەتىندە شايقاسقان مۇحامەتقۇل يسلامقۇلوۆ مايدان دالاسىنا رەسپۋبليكالىق «سوتسياليستىك قازاقستان» گازەتىنىڭ قىزمەتكەرى بولىپ جۇرگەن كەزىندە, 1941 جىلدىڭ تامىز ايىندا اتتانعان ەدى. سول جىلعى كۇز بەن كەلەسى جىلدىڭ قىسى ارالىعىندا ماسكەۋدى باسقىنشى جاۋدان قورعاۋ ءۇشىن بولعان قاندى قىرعىنعا باستان-اياق قاتىسقان جۋرناليست-جاۋىنگەر 1942 جىلدىڭ اقپان ايىندا كەزەكتى شايقاس بارىسىندا ەرلىكپەن قازا تاپتى. وسى ايلاردا كورسەتكەن ەرەن ەرلىكتەرى ءۇشىن ول بىرنەشە رەت كەڭەس وداعىنىڭ باتىرى اتاعىنا دا ۇسىنىلعان ەكەن. بىراق, شىققان تەگى ەل بيلەگەن باي-بولىس بولعاندىقتان, وعان بۇل قۇرمەتتى اتاق بەرىلمەي قالعان.
گازەتىمىزدىڭ ۇستىمىزدەگى جىلعى 21 ناۋرىزداعى نومىرىندە بايىرعى قالامگەر تۋرالى «سوعىسقا «سوتسياليستىك قازاقستاننان» اتتانعان» دەگەن وچەرك جاريالاندى. وندا ەسىل ەردىڭ ەكى جارىم ايعا سوزىلعان جورىق جولدارىندا كورسەتكەن كوزسىز ەرلىكتەرى ءبىرشاما ءسوز بولدى.
ەندى, مىنە, حالقىنىڭ كوڭىلى مەن جادىندا جاۋجۇرەك باتىر رەتىندە ماڭگى قالعان ابزال اعانىڭ ەسىمىمەن ونىڭ تۋىپ-وسكەن ولكەسىندە وسكەلەڭ ۇرپاقتى وتانشىلدىققا تاربيەلەيتىن ءبىلىم مەكەنى اتالىپ وتىر. بۇل بارشا جۋرناليستەر قاۋىمى ءۇشىن قۋانىشتى وقيعا دەپ بىلەمىز.
رۋسلان يگىلىك.