جەرگىلىكتى ولكەتانۋشىلارىمىز مايدانگەرلەردىڭ ەرلىكتەرى مەن ەسىمدەرىن ۇتىتىلماستاي ەستە قالدىرۋ ءۇشىن ءبىراز جىلدان بەرى ىزدەۋ-زەرتتەۋ جۇمىستارىن جۇرگىزىپ كەلەدى. بۇل شارانىڭ ارقاسىندا اۋدانىمىزدا ەكىنشى دۇنيەجۇزىلىك سوعىسقا باستان-اياق, ياعني 1939 جىلدان 1946 جىلعا دەيىن قاتىسقان جاۋىنگەر انىقتالعان بولاتىن. ونىڭ, سونداي-اق, قيىر شىعىستان باستاپ باتىس مايداندارىندا دا وق پەن وتتىڭ ورتاسىنان وتكەنى بۇگىندە كوپشىلىككە ءمالىم بولىپ وتىر. تۋعان جەرگە امان-ەسەن ورالىپ, بەيبىت ەڭبەكتە دە كوزگە تۇسكەن مارقۇم سماعۇل شالقاربەكوۆتىڭ اتىنا قارااعاش اۋىلىندا كوشە بەرىلۋىنە تۇرعىندار تىلەگى بار.
سمەكەڭنىڭ اكەسى شالقاربەك تە جۇرتقا سىيلى بولعان كىسى ەدى. اشارشىلىق جىلدارىندا ورماننىڭ قۇسى مەن دالانىڭ كيىگىن اتىپ, اۋىلداستارىن اسىراپ شىققانى ەل اۋزىنان كەتپەيتىن اڭگىمە. ارعى باباسى نۇرباي باتىردىڭ قازاق جەرىن قورعاۋداعى ەرلىكتەرى ۇرپاقتان-ۇرپاققا جەتىپ وتىر.
ونىڭ 7 جىلعا ۇلاسقان مايدان جولدارى موڭعولياداعى اتاقتى حاسان كولى شايقاسىنان باستالادى. سول كەزدە 20 جاسار جىگىت ىسىلعان, تاجىريبەلى جاۋىنگەر رەتىندە ماسكەۋدى قورعاۋعا جەتكىزىلگەن قارۋلاستارى قاتارىندا جاۋدى كەيىن شەگىندىرۋگە قاتىسىپ, ودان ۋكراينانى, رۋمىنيانى, ۆەنگريانى, اۆستريانى ازات ەتۋگە اتسالىسادى. ەكى رەت «ەرلىگى ءۇشىن» , «بەلگرادتى ازات ەتكەنى ءۇشىن», «گەرمانيانى جەڭگەنى ءۇشىن» مەدالدارىمەن جانە ءى, ءىى دارەجەلى « ۇلى وتان سوعىسى» وردەنىمەن ماراپاتتالۋى ەر جاۋىنگەر بولۋىنىڭ ايعاعى ەكەنى داۋسىز.
سوعىس تۋرالى كوپ ايتا قويمايتىن, ونى ەسكە الۋعا جانى اۋىرسىناتىن مايدانگەردىڭ ءومىر مەن ءولىم بەلدەسكەن جىلدارداعى ەرلىكتەرى جايىندا جيناقتالعان جاڭا مالىمەتتەر اۋداندىق مۇراجايعا قويىلدى. ودان كەسكىلەسكەن قاندى شايقاستاردا نەبىر قيىندىقتار مەن تاۋقىمەتتەرگە توزە ءبىلىپ, جاۋىنگەرلىك پارىزعا بولاتتاي بەرىك بولعان كىسى بەينەسى كوز الدىمىزعا كەلەدى. ءوز اۋىلىنداعى مەكتەپ وقۋشىلارىنىڭ باتىر اتالارىنا ارنالعان ەسكەرتكىش ءمۇيىس اشۋدى ويلاستىرۋى ريزالىق تۋعىزادى. مۇنداي شارالارعا اۋداندىق ارداگەرلەر كەڭەسى مۇرىندىق بولىپ وتىر. اعا ۇرپاق ەرلىكتەرى ەشقاشان ۇمىتىلماۋعا ءتيىس.
قامبار سەيىتقامالوۆ,
جاڭاارقا اۋداندىق ارداگەرلەر كەڭەسىنىڭ توراعاسى.
قاراعاندى وبلىسى.