ورال قالاسىندا 6 قازان كۇنى پاترۋلدىك پوليتسيا ەسىرتكى قابىلداعان Toyota Crown Majesta اۆتوكولىگىنىڭ جۇرگىزۋشىسىن توقتاتقان, دەپ حابارلايدى Egemen.kz.
كولىك يەسىنىڭ 5 قازان كۇنى جول اپاتىنا سەبەپكەر بولىپ, وقيعا ورنىنان قاشىپ كەتكەنى بەلگىلى بولدى.
«قۇجاتتاردى تەكسەرۋ بارىسىندا 22 جاستاعى جۇرگىزۋشى مەن 16 جاستاعى جولاۋشى قارسىلىق كورسەتتى. جۇرگىزۋشى قاشىپ كەتۋگە تىرىسقان, ال ۇستاۋ كەزىندە ولار پوليتسيا قىزمەتكەرلەرىنە شابۋىل جاساعان. مەديتسينالىق تەكسەرىس ناتيجەسى بويىنشا جۇرگىزۋشىنىڭ ەسىرتكىلىك ماساڭ كۇيدە بولعانى انىقتالدى. ەكى قۇقىق بۇزۋشى دا ۋاقىتشا ۇستاۋ يزولياتورىنا قامالدى», دەلىنگەن حابارلامادا.
اتالعان وقيعا بويىنشا سوتقا دەيىنگى تەرگەۋ امالدارى باستالىپ, اكىمشىلىك ءىس قوزعالعان.