بالالاردىڭ ەمىنە اقشا جيناۋ ارقىلى ادامداردى الداعان

«اقپاراتتىق تەحنولوگيالار مەن ونلاين-قىزمەتتەردىڭ دامۋىمەن ينتەرنەتتە اقپارات قولجەتىمدى. بۇل ينتەرنەتتەگى الاياقتىقتىڭ ءورشىپ كەتۋىنە سەبەپ بولدى. سوڭعى جىلدارى بۇل ءجيى جاسالاتىن قىلمىس تۇرىنە اينالدى», دەدى ءىىم كريمينالدىق پوليتسيا دەپارتامەنتىنىڭ باستىعى قانات نۇرماعامبەتوۆ.

مىسالى, قوستاناي تۇرعىنى DarkNet پەن Telegram ارقىلى ينتەرنەت-الاياقتىق جاساعان. قاسكوي 1,5 ملن تەڭگەدەن استام اقشا جىمقىرعانى انىقتالدى. ەر ادام «كاردينگپەن», ياعني بانك كارتالارىنىڭ دەرەكتەمەلەرىن ۇرلاپ جانە ولاردى قايتا ساتۋمەن, سونداي-اق اقشاعا كومپيۋتەرلىك ۆيرۋستاردى تاراتۋدى ۇيرەتۋمەن اينالىسقان. قازىر فيگۋرانت ۇستالىپ, سوتتالدى.

«شىمكەنتتىك الاياق Instagram پاراقشانىڭ دۋبليكاتىن جاساپ, بالالاردىڭ ەمىنە اقشا جيناۋ ارقىلى ادامداردى الداعان. وسىلايشا ول 32 ملن تەڭگە جيناعان. الاياق ۇستالدى. قاماۋدا وتىر», دەدى قانات نۇرماعامبەتوۆ.

ۆەدومستۆو كيبەرقىلمىستارعا قارسى كۇرەستى جۇيەلى تۇردە جۇرگىزەدى.

ءساۋىر ايىندا ۋكراينانىڭ ودەسسا جانە زاپوروجە قالالارىندا وتكەن حالىقارالىق ارنايى وپەراتسيا بارىسىندا بەس الاياقتىق call-ورتالىق جويىلدى. قاسكۇنەمدەر قازاقستان ازاماتتارىنا قاتىستى قىلمىس جاساعان. 30-دان استام كۇدىكتى ۇستالدى, قاجەتتى ءىس-شارالار جۇرگىزىلىپ جاتىر.

قىركۇيەك ايىندا جەدەل ءىس-شارالاردى وتكىزۋ كەزىندە الماتى قالاسىندا ءتورت call-ورتالىق جويىلىپ, 47 شەتەلدىك ۇستالدى. ولار شەت مەملەكەتتەردىڭ ازاماتتارىنا قاتىستى الاياقتىقپەن اينالىسقان. تەرگەۋ شارالارى جۇرگىزىلىپ, تاركىلەنگەن تەحنيكا تەكسەرىلىپ جاتىر.