پەتروپاۆل. سولتۇستىك قازاقستاندا سايلاۋعا بەلسەنە قاتىسقانداردىڭ ءبىرى شارۋا قوجالىقتارىنىڭ يەلەرى بولدى. بۇل تۋرالى egemen.kz ءتىلشىسى حابارلادى.
تاۋەلسىزدىكتىڭ اق تاڭى ارايلاپ اتقان جىلدان بەرى شارۋالارىن دوڭگەلەتىپ, قازىر وڭىردە بەلگىلى كاسىپكەر بولىپ جۇرگەن ازاماتتىڭ ءبىرى “تايىنشا-استىق” جشس-ءنىڭ ديرەكتورى اناتولي رافالسكي سايلاۋدا ءوز داۋىسىن ەلىمىزدىڭ بولاشاعىن الىستان ويلايتىن ازاماتقا, ياعني ەلباسى نۇرسۇلتان نازارباەۆقا بەرگەنىن ايتادى.
«مەن – قازاقستاندا تۋىپ-ءوستىم. وسىندا ءبىلىم الدىم. بۇگىندە وڭىردەگى ءىرى اگروقۇرىلىمداردىڭ ءبىرى “تايىنشا-استىق” جاۋاپكەرشىلىگى شەكتەۋلى سەرىكتەستىگىنە باسشىلىق ەتەمىن. قاراماعىمداعى جۇزدەگەن اۋىل ەڭبەككەرلەرىمەن بىرگە اۋىل شارۋاشىلىعىمەن اينالىسىپ كەلەمىن», - دەيدى ول.
ول قىزمەت بابىمەن جاقىن جانە الىس شەتەلدەرگە شىعىپ, اۋىل شارۋاشىلىعى كاسىپورىندارىنىڭ جەتەكشىلەرىمەن ءجيى كەزدەسەتىنىن, مۇنداي باسقوسۋلاردا وزارا پىكىر الماسىپ, تاجىريبە بولىسەتىنىن ايتتى. «قازاقستاندىق اگرارشىلاردىڭ تابىستارى شەتەلدىك ارىپتەستەرىنىڭ الدىندا جوعارى باعاعا يە بولىپ جۇرگەنى ەلگە جانە ونداعى يگىلىكتەرگە دەگەن ماقتانىش سەزىمىن ۇيالاتادى. بۇل, شىنىندا دا, ۇلكەن جەتىستىك. ءدال ءبىزدىڭ ەلدەگىدەي اۋىل شارۋاشىلىعى كاسىپورىندارىنا مەملەكەت تاراپىنان زور قولداۋ تمد-داعى ەشبىر ەلدە جوق ەكەندىگىن سەنىممەن ايتا الامىن. جوعارى ساپالى اۋىل شارۋاشىلىعى ونىمدەرىن وندىرۋگە قاۋقارىمىز جەتەدى. القاپتاردا زاماناۋي تەحنيكالار جۇمىس اتقارادى. اسىلتۇقىمدى مال باسىن كوبەيتىپ, ەكولوگيالىق ساپالى ونىمدەر شىعارۋدامىز», - دەيدى ول.
كاسىپكەر وسىدان بىرنەشە جىل بۇرىن شارۋاشىلىقتا مەملەكەت باسشىسىن قارسى الۋ قۇرمەتىنە يە بولدى. «سول كەزدە ەگىس تاناپتارىن ارالاپ, ءسۇت كەشەنىندە بولىپ, جۇرتشىلىقپەن جولىققان ەلباسى وبلىستا جانە اۋداندا اتقارىلىپ جاتقان ىستەرگە وڭ باعاسىن بەرگەنى سونى سەرپىنمەن جۇمىس ىستەپ, جاڭا بەلەستەردى باعىندىرۋعا ىنتالاندىرا ءتۇستى», - دەيدى اناتولي رافالسكي.
سوندىقتان ونىڭ ايتۋىنشا, ءبىزدىڭ بارلىق جەتىستىكتەرىمىز سايلاۋدا ايقىن جەڭىسكە جەتكەن ەلباسىمەن تىكەلەي بايلانىستى. بۇل سايلاۋ تاعدىرىنىڭ تاڭداۋىن تاني العان, ەرىك-جىگەرى مىقتى ەل-جۇرتتىڭ كەمەل كەلبەتىن كورسەتتى. «نۇرسۇلتان نازارباەۆ مەرەيىنىڭ ۇستەم بولۋى قازاقستاندىقتار دانالىعىنىڭ جەڭىسى دەپ بىلەمىن. بۇكىل قازاقستاندىقتار, ونىڭ ىشىندە, سولتۇستىك ءوڭىر بۇكىل الەمگە بىرلىكتىڭ, ءوزارا تۇسىنىستىكتىڭ, بەيبىتشىلىك پەن كەلىسىمنىڭ, ءوز وتانىن قالاي ءسۇيۋدىڭ جارقىن ۇلگىسىن پاش ەتتى. بۇگىندە قازاقستاندى الەم تانيدى.مۇنىڭ ءبارى پرەزيدەنتىمىزدىڭ كورەگەن ساياساتىنىڭ, تۇعىرلى تاۋەلسىزدىگىمىزدىڭ, ەڭسەلى ەگەمەندىگىمىزدىڭ ارقاسى», - دەيدى ول.
سونىمەن بىرگە ول قىزىلجار ءوڭىرى جۇرتشىلىعىنىڭ 97,71 پايىزى تاڭداۋلارىن جاساپ, 98,33 پايىزى ن. نازارباەۆتى جاقتاپ داۋىس بەرگەنىن, بۇرىنعىسىنشا جوعارى ازاماتتىق تانىتقانىن, ەلباسىمىزدىڭ جاقتاۋشىلارى ەكەنىن دالەلدەگەنىن ايتتى. ءسوزىنىڭ سوڭىندا كاسىپ يەسى الداعى ۋاقىتتا دا ەلىمىز ەلباسى نۇرسۇلتان نازارباەۆتىڭ سارابدال باسشىلىعىمەن كوركەيىپ, گۇلدەنە بەرەتىنىنە سەنىمدى ەكەنىن جاسىرمادى.
ءومىر ەسقالي.
دەرەك, سۋرەت: egemen.kz