بۇگىن قازاقستان رەسپۋبليكاسىنىڭ پرەزيدەنتى ءىس باسقارماسىنا قاراستى پرەزيدەنتتىك ورتالىقتا قازاقتىڭ ۇلى اقىنى اباي قۇنانباي ۇلىنىڭ شىعارماشىلىعىنا ارنالعان ء«VىىI اباي وقۋلارى» جىل سايىنعى ادەبي بايقاۋىنىڭ جەڭىمپازدارىن ماراپاتتاۋ ءراسىمى ءوتتى, دەپ حابارلايدى Egemen.kz.
ءىس-شاراعا ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى «اباي اكادەمياسى» عزي گۋمانيتارلىق عىلىمداردى زەرتتەۋ ءبولىمىنىڭ باسشىسى التىناي اسقاروۆا, «قارا شاڭىراق» رەسپۋبليكالىق قوعامدىق بىرلەستىگىنىڭ ديرەكتورى تۇرار شاكەن, قر پرەزيدەنتتىك ورتالىقتىڭ قىزمەتكەرلەرى, بايقاۋدا باق سىناعان قاتىسۋشىلار, مەكتەپ مۇعالىمدەرى مەن وقۋشىلارى جانە باق وكىلدەرى قاتىستى.
قازاقستان رەسپۋبليكاسى پرەزيدەنتتىك ورتالىعى ديرەكتورىنىڭ ورىنباسارى سەرىك سىدىقوۆ قازاق كلاسسيكالىق جازبا ادەبيەتىنىڭ نەگىزىن قالاۋشى اباي قۇنانباي ۇلىنىڭ اسىل مۇراسىنا توقتالىپ, بايقاۋعا قاتىسۋشىلارعا ساتتىلىك تىلەدى.
«ابايدىڭ شىعارمالارىندا ادام, بولمىس جانە عالام تاقىرىبى, سونداي-اق, ابسوليۋتتىك اقيقات سىرى تۇراقتى ورىن الادى. جالپى ادامزات بالاسىنا ورتاق اسىل سوزگە اينالعان ابايدىڭ قارا سوزدەرىندەگى گۋمانيستىك, اعارتۋشىلىق, الەۋمەتتىك ويلارى تۇتاس ءبىر قازاق حالقىنىڭ فيلوسوفيالىق كونتسەپتسياسىن قۇرايدى. مىنە سوندىقتان دا مەملەكەت باسشىسى قاسىم-جومارت توقاەۆ: «ابايدى تانۋ – ادامنىڭ ءوزىن-ءوزى تانۋى. ادامنىڭ ءوزىن-ءوزى تانۋى جانە ۇنەمى دامىپ وتىرۋى, عىلىمعا, بىلىمگە باسىمدىق بەرۋى – كەمەلدىكتىڭ كورىنىسى. ينتەللەكتۋالدى ۇلت دەگەنىمىز دە – وسى. وسىعان وراي, اباي ءسوزى ۇرپاقتىڭ باعىت الاتىن تەمىرقازىعىنا اينالۋى قاجەت», – دەپ ۇلىلاردىڭ ارتىندا قالدىرعان مۇراسىن قادىرلەپ, قاستەرلەۋگە شاقىرىپ وتىر», دەدى س.سىدىقوۆ.
ابايدىڭ ادەبي مۇراسىن ناسيحاتتاۋ, قازاقستان جاستارىنىڭ وقۋ مادەنيەتىن, ادەبي تالعامىن قالىپتاستىرۋدى كوزدەيتىن بايقاۋعا بيىل ەلىمىزدىڭ تۇكپىر-تۇكپىرىنەن 300-گە جۋىق قاتىسۋشى ءوز جۇمىسىن جولداعان. سولاردىڭ ىشىنەن جۇزدەن جۇيرىك, مىڭنان تۇلپار شىققان ۇزدىكتەر ىرىكتەلدى.
بايقاۋ قورىتىندىسى بويىنشا تومەندەگىدەي نوميناتسيا يەگەرلەرى انىقتالدى: «ەڭ كىشكەنتاي قاتىسۋشى» – جانىبەك توقاەۆ, «كورەرمەن كوزايىمى» – ابدۋراحمان يمانعالي, «ۇزدىك ارناۋ» – نۇردوس يگامباەۆ, «قارا ءسوزدى قادىرلەگەن» – توعجان قۋانىش, «اباي ءانى الەمدە» – ساعىنىش نازار, «ۇستاز ونەگەسى» – قانات سادۋاقاسوۆا.
ءداستۇرلى سايىستا اينالاسىنان ات وزدىرعان جەڭىمپازدار:
ءىىى ورىن – ديانا بيجانوۆا
ءىىى ورىن – الينا ابزالوۆا
ءىى ورىن – الفينۋر ەرمۋراتوۆا
ءىى ورىن – سىمبات ساتىبالدى
ءى ورىن – ايعانىم ءومىرجان
جۇلدەگەرلەرگە ارنايى ديپلومدار مەن ەستەلىك سىيلىقتار تابىستالدى.