ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتى ەڭ ىقپالدى الەمدىك ۋنيۆەرسيتەت رەيتينگتەرىنىڭ ءبىرى – QS World University Rankings 2024 كورسەتكىشى بويىنشا 816-ورىنعا يە بولدى. سونداي-اق ءبىلىم مەن عىلىمعا قاتىستى ءتۇرلى كريتەريلەر ارقىلى باعالاناتىن Asia University Rankings قورىتىندىسىمەن ازيا قۇرلىعىندا – 203, ورتالىق ازيا قۇرلىعىندا 7-ءشى ورىنعا تابان تىرەدى.
وتكەن وقۋ جىلىندا اتقارىلعان ءىس-شارالار تۋرالى ۇجىم جانە قوعام الدىندا ەسەپ بەرگەن ۋنيۆەرسيتەت رەكتورى جانار تەمىربەكوۆا وسىنداي دەرەكتەر كەلتىردى.
تۇركىستان وبلىسىنىڭ قۇرمەتتى ازاماتتارى, وبلىس جانە قالا اكىمدىگىنىڭ وكىلدەرى, قوعام بەلسەندىلەرى, وبلىستىق ءماسليحات دەپۋتاتتارى, وبلىستىق اقساقالدار كەڭەسىنىڭ مۇشەلەرى, باق وكىلدەرى, ۋنيۆەرسيتەت ۇجىمى مەن ستۋدەنتتەر قاتىسقان جيىندا جانار تەمىربەكوۆا وقۋ ورنىنىڭ قايتا قارالعان ميسسياسى جانە ستاراتەگيالىق مۇراتىمەن تانىستىردى. سونىمەن قاتار وتكەن وقۋ جىلىندا اكادەميالىق, عىلىم, مەديتسينا, الەۋمەتتىك, شارۋاشىلىق جانە وزگە دە باعىتتاردا اتقارىلعان اۋقىمدى شارالار تۋرالى اقپارات بەردى.
ۋنيۆەرسيتەت 2023-2024 وقۋ جىلىندا 993 ءبىلىم گرانتىن جەڭىپ العان. ياعني 2022-2023 وقۋ جىلىمەن سالىستىرعاندا گرانت سانى 34% ارتقان. ۋنيۆەرسيتەت قابىرعاسىندا «جەمىس جيدەكتەردى وڭدەۋ وندىرىستىك تسەحى», «Turkistan EdTech Lab» سoursera ورتالىعى, «نانوتەحنولوگيالار جانە ەنەرگەتيكاعا ارنالعان جاڭا ماتەريالدار», ميكروبيولوگيا جانە بيوتەحنولوگيا, مەكتەپتەگى بيولوگيانى وقىتۋدىڭ يننوۆاتسيالىق ادىستەرى, ميكروبيولوگيا جانە ۆيرۋسولوگيا زەرتحانالارى, جاڭا ورتالىقتار ىسكە قوسىلدى. جىل كولەمىندە 150-گە جۋىق عىلىمي ءىس-شارالار ۇيىمداستىرىلدى. 18-گە جۋىق حالىقارالىق دەڭگەيدەگى كونفەرەنتسيالار مەن كونگرەستەر ءوتتى.
عالىمداردىڭ ماقۇلدانعان گرانتتىق جوبالار سانى دا كوبەيدى. ۋنيۆەرسيتەت عالىمدارىنىڭ گرانتتىق جوبالارى اياسىندا «STEM جانە كرەاتيۆتىلىك» وقۋ-زەرتحاناسىندا عالىمدار 3D-پرينتەرلەر مەن باسقا دا جابدىقتاردىڭ كومەگىمەن تەلەسكوپ جاساپ شىعاردى.
سونداي-اق ۋنيۆەرسيتەت رەكتورى وتكەن وقۋ جىلىندا 15 068 518 تەڭگە كولەمىندە وقۋلىقتار مەن ەلەكتروندى كىتاپ ساتىپ الىنعانىن, جالپى كىتاپ قورى – 517 138 بولعانىن اتاپ ءوتتى. وتكەن وقۋ جىلىندا 7 وقىتۋشى قازاقستان رەسپۋبليكاسىنىڭ «ۇزدىك وقىتۋشىسى», 10 وقىتۋشى – «بولاشاق» حالىقارالىق ستيپەندياسىنىڭ يەگەرى اتاندى. ۋنيۆەرسيتەت عالىمدارىنىڭ 9 عىلىمي جوباسى گرانتتىق قارجىلاندىرۋعا يە بولدى.
«وقۋ ورنىنىڭ كلينيكا-دياگنوستيكالىق ورتالىعى – تۇركىستان قالاسى بويىنشا وتكەن جىلى تاۋلىك بويى العاشقى ءۇشىنشى دەڭگەيدەگى ينسۋلت ناۋقاستارىن قابىلداي باستادى. نەۆرولوگيا جانە ينتەرۆەنتسيالىق نەيروحيرۋرگيا سالالارىنداعى وبلىستىق ماڭىزدى كلينيكاعا اينالدى. وتكەن وقۋ جىلىندا ۋنيۆەرسيتەت وقۋ عيماراتتارى مەن جاتاقحانالاردى جوندەۋ, وزگە دە قاجەتتى شارۋاشىلىق جۇمىستارى جۇرگىزىلدى. ماسەلەن, ۋنيۆەرسيتەتتىڭ جانە دەمەۋشىلەردىڭ قولداۋىمەن, وقۋ ورنىمىزدىڭ بۇرىنعى رەكتورلارى جانە بەلگىلى پروفەسسورلار لەسبەك تاشيموۆ پەن سەرىك پراليەۆ اتىنداعى وقۋ زالدارى اشىلدى. فيلولوگيا فاكۋلتەتىنىڭ اكت زالى, قر حالىق ءارتيستى, پروفەسسور رايىمبەك سەيتمەتوۆ اتىنداعى ساحنا زالى جاڭا كەيىپكە ەندى. سونداي-اق, وسىنداي قارقىندى جۇمىستار اياسىندا قر حالىق ءارتيستى, پروفەسسور قاجىبەك بەكبوسىنوۆ پەن قر حالىق ءارتيستى, پروفەسسور راحيما جۇباتۋروۆا اتىنداعى قوس اۋديتوريا دا اشىلدى. №6 عيماراتىنىڭ سپورت زالى دا زاماناۋي قالىپقا كەلتىرىلىپ, اعىمداعى جوندەۋدەن ءوتتى. شارۋاشىلىق جۇمىستارى مۇنىمەن شەكتەلمەيدى», دەدى جانار تەمىربەكوۆا.
جيىن سوڭىندا وبلىستىق اقساقالدار القاسىنىڭ توراعاسى جارىلقاسىن ازىرەتبەرگەنوۆ باستاعان قازىنالى قاريالار ۋنيۆەرسيتەتتىڭ كوركەيە بەرۋىن تىلەپ, اق باتاسىن بەردى.