جەزقازعان قالاسىندا اسا ءىرى مولشەردە پسيحوتروپتىق زاتتاردى زاڭسىز ساقتادى دەگەن ايىپپەن 22 جاستاعى قىز 10 جىلعا باس بوستاندىعىنان ايرىلدى, دەپ حابارلايدى Egemen.kz قر جوعارعى سوتىنا سىلتەمە جاساپ.
2023 جىلدىڭ تامىز ايىندا جەزقازعان قالاسىنىڭ 22 جاستاعى جۇمىسسىز تۇرعىنى ينتەرنەت ارقىلى بەلگىسىز اداممەن تانىسادى. ول بۇعان ەسىرتكى زاتتارىن ساقتاۋ ءۇشىن تاسىمالداۋشى بولۋدى ۇسىنادى. قىزعا اقشا كەرەك بولعاندىقتان «كۋراتور» ۇسىنعان شارتقا كەلىسەدى.
ونىڭ مىندەتتەرىنە ەسىرتكىنى قابىلداۋ, ولاردى وراۋ جانە ساقتاۋ, كەيىننەن ورىندالعان جۇمىستىڭ كولەمىنە قاراي اقى تولەۋ كىرگەن. بەلگىسىز تۇلعامەن الدىن الا ءسوز بايلاسۋ بويىنشا ادامدار توبىندا ارەكەت ەتە وتىرىپ (ماتەريالدار جەكە وندىرىسكە بولىنگەن), ول پاكەتتەردى گەولوكاتسيا بويىنشا الىپ, ولاردى بۋىپ-ءتۇيىپ, جەزقازعان قالاسىندا 60 پاكەتتى ساتىپ, ونىڭ تۇرعان جەرىن سۋرەتكە تۇسىرگەن.
جەدەل ىزدەستىرۋ ءىس-شارالارى بارىسىندا ەسىرتكى تاسىمالداۋشى ۇستالىپ, اتالعان پاكەتتەر مەن تەلەفون تاركىلەنگەن.
تەرگەۋ بارىسىندا «كەتپەۋ تۋرالى قولحاتپەن» جۇرگەنىنە قاراماستان, ەسىرتكى تاسىمالداۋشى شاحتينسك قالاسىنا قاشىپ كەتىپ, قىلمىستىق ارەكەتىن ۇقساس سحەمامەن سول جەردە جالعاستىرعان. الايدا ول ۇستالىپ, ونىڭ تۇرعىلىقتى جەرىنەن ەسىرتكى زاتتارى, بۋىپ-تۇيۋگە جانە بۋما جاساۋعا ارنالعان قۇرىلعىلار تابىلدى.
قىزعا ەلەكتروندىق اقپاراتتىق رەسۋرستاردى پايدالانا وتىرىپ, ءبىر توپ ادامدارمەن الدىن الا ءسوز بايلاسۋ ارقىلى اسا ءىرى مولشەردە پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز ساقتادى دەگەن ايىپ تاعىلدى (قك-ءنىڭ 297-بابىنىڭ 3-بولىگىنىڭ 1), 2), 3 ), 5) تارماقتارى).
ونىڭ كىناسى كۋالاردىڭ ايعاقتارىمەن, ساراپشىلاردىڭ قورىتىندىلارىمەن, بەتبەلگىلەردىڭ فوتوسۋرەتتەرى تابىلعان تەلەفونداردى قاراۋمەن, كۋراتورمەن حات الماسۋمەن جانە باسقا دا ءىس ماتەريالدارىمەن دالەلدەندى.
سوتتالۋشى 10 جىلعا باس بوستاندىعىنان ايىرىلدى. اپەللياتسيا ءىستىڭ بارلىق ءمان-جايىن زەردەلەي كەلە, ۇكىم زاڭدى جانە جاسالعان قىلمىسقا سايكەس دەپ تانىدى.
ۇكىم زاڭدى كۇشىنە ەندى.