قوستاناي. 28 ءساۋىر. قوستانايداعى سپورت سارايىندا جەڭىمپازدار فورۋمى ءوتتى. بۇل تۋرالى egemen.kz ءتىلشىسى حابارلادى.
سپورت سارايى قوستانايلىقتارعا لىق تولدى. كەنشىلەر, ماشينا جاساۋشىلار, ستۋدەنت جاستار «العا, قازاقستان» دەپ جار سالادى. سايلاۋ قوستانايدا دا سايلاۋشىلاردىڭ بەلسەندىلىگىمەن ءوتتى. «سىرتكوز-سىنشى» دەگەندەي, وعان شەتەلدەردەن كەلگەن بايقاۋشىلاردىڭ قايسىسى بولسا دا تاڭقالىپ كەتتى. ورتالىق سايلاۋ كوميسسياسىنىڭ مالىمەتى بويىنشا, 26 ءساۋىر كۇنى وتكەن قازاقستان پرەزيدەنتىنىڭ كەزەكتەن تىس سايلاۋىندا نۇرسۇلتان نازارباەۆقا سايلاۋشىلاردىڭ 97,7 پايىزى داۋىس بەردى.
ماڭگىلىك ەل» يدەياسى, «نۇرلى جول» ەكونوميكالىق ستراتەگياسى قازاقستاندى گۇلدەنتىپ, الەمنىڭ وزىق 30 ەلىنىڭ قاتارىنا قوسۋ ماقساتى جالعاسىن تاباتىن بولادى. فورۋمدا ن.نازارباەۆ كانديداتۋراسىن ۇسىنعان «نۇر وتان» پارتياسىنىڭ وبلىستىق فيليالى توراعاسىنىڭ ورىنباسارى ءا.ساپاروۆا سايلاۋ بىرلىك پەن ابىرويدىڭ كورىنىسى بولعانىن ايتتى. مۇنان كەيىن وبلىس اكىمى نۇرالى سادۋاقاسوۆ: «حالىقارالىق بايقاۋشىلار مەن ساياساتكەرلەر قازاقستان پرەزيدەنتى سايلاۋىنىڭ ءمولدىر جانە وتە جوعارى دارەجەدە وتكەنىن مويىنداپ وتىر. نۇرسۇلتان نازارباەۆقا قازاقستاندىقتاردىڭ 97,7 پايىزى سەنىم ءبىلدىردى. دۇنيەجۇزىندە سايلاۋشىلار داۋىسىنىڭ مۇنداي پايىزىن العان ەشكىم جوق. بۇل حالىقتىڭ سۇيىكتى پرەزيدەنتىنە دەگەن جوعارى سەنىمى بولىپ تابىلادى. قازاقستان حالقى ءوزىنىڭ ءتاستۇيىن بىرلىگىن تاعى دا دالەلدەدى. وسىنداي بىرلىكپەن قازاقستان العا باسا بەرسىن!» دەدى.
مۇنان كەيىن ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتى رەكتورىنىڭ كەڭەسشىسى ميحايل داۋەنوۆ, قازاقستان حالقى اسسامبلەياسىنىڭ مۇشەسى, وبلىستىق ارحيۆ ديرەكتورى ۆالەري ۆيشنيچەنكو, حالىق اقىنى ءاسيا بەركەنوۆا تاعى باسقالار ءسوز الدى. زالداعى جينالعان جۇرتشىلىق وكىلدەرى, جۇمىسشىلار, جاستار لەبىزدەردى «العا, قازاقستان!», «نۇرسۇلتان, قازاقستان!» دەپ قۋاتتاپ, قولداپ وتىردى. فورۋم پاتريوتتىق اندەرمەن كوركەمدەلدى.
ءنازيرا جارىمبەتوۆا.
دەرەك, سۋرەت: egemen.kz