استانادا بالاسىن ارباعا سالىپ, سەرۋەندەپ جۇرگەن ايەلدىڭ ارەكەتى پوليتسەيلەردىڭ كۇدىگىن تۋعىزعان. تەكسەرە كەلگەندە اربا ىشىنەن ەسىرتكى كۋرەرلەرى مەن دروپپەرلەردىڭ زاڭسىز جۇمىسىن جارنامالايتىن QR كودتارى بار قاعازدار تابىلدى, دەپ حابارلايدى Egemen.kz.
استانادا پوليتسەيلەر بالا ارباسىن سۇيرەگەن 27 جاستاعى كەلىنشەكتى ۇستادى. سىرتتاي قاراعاندا بالاسىن تازا اۋاعا الىپ شىققانداي كورىنەتىن بۇل جاعدايدىڭ ارتىندا زاڭسىز سحەما جاسىرۋلى بولىپ شىقتى.
- ول ەسىرتكى كۋرەرلەرى مەن دروپپەرلەردىڭ زاڭسىز جۇمىسىن جارنامالايتىن QR كودتارى بار جەلىمى بار قاعازدى جاپسىرۋمەن اينالىسقان. ءىز كەسۋشىلەر سىرتقى قاۋىپسىزدىك كامەرالارى جازبالارىنان كۇدىكتى ارەكەتتەردى بايقادى: ايەل عيماراتتارعا, پودەزدەرگە, شلاگباۋمدارعا, ءتىپتى كونديتسيونەرلەرگە دە قاعاز جاپسىرىپ جۇرگەن. جەدەل-ىزدەستىرۋ شارالارىنان كەيىن قاسكۇنەم ۇستالدى, - دەلىنگەن پوليتسيا حابارلاماسىندا.
پوليتسيا بولجامىنشا, ول Telegram-داعى ارنالاردىڭ بىرىنە تىركەلىپ, كۋراتوردان تاپسىرما الىپ وتىرعان, قالا بويىنشا 500-گە جۋىق قاعازدى جاپسىرىپ شىققان. ول ءۇشىن وعان اقى تولەۋگە ۋادە بەرىلگەن, قالاي دەگەنمەن دە ايەل ادام "يكەمدى كەستەنىڭ" ارتىندا قىلمىستىق ارەكەتتەر تۇرعانىن جاقسى بىلگەن.
قازىر كۇدىكتىگە قاتىستى ەسىرتكىنى ناسيحاتتاۋ جانە ونىڭ زاڭسىز جارناما فاكتىسى بويىنشا قىلمىستىق ءىس قوزعالدى. جەدەل تەرگەۋ شارالارى جۇرگىزىلىپ جاتىر, پوليتسيا كۇمان تۋعىزا قويمايتىن جاپسىرما قاعازدار ارتىندا ۇلكەن قىلمىستار جاسىرۋلى بولۋى مۇمكىن ەكەنىن ەسكەرتەدى.