الەۋمەتتىك جەلىدە كوكشەتاۋداعى دۇڭگىرشەكتىڭ بىرىندە تىشقانداردىڭ سامسا جەپ جۇرگەنى بەينەلەنگەن ۆيدەو تارادى, دەپ حابارلايدى Egemen.kz «استانا» تەلەارناسىنا سىلتەمە جاساپ.
كادردان تىشقاننىڭ سامسانى ارالاپ, ەمىن-ەركىن جۇگىرىپ جۇرگەنىن كورۋگە بولادى. قالانىڭ اۆتوۆوكزال اۋدانىندا ورنالاسقان دۇڭگىرشەكتەن ەندى ادامدار تاماق المايمىز دەپ شۋلاپ جاتىر.
«تەكسەرۋ كەزىندە دۇڭگىرشەك جۇمىس ىستەمەدى. نىسان باسشىسىنىڭ ايتۋىنشا, ونىڭ قىزمەتى 26 قىركۇيەكتەن باستاپ توقتاتىلىپ, جاقىن ارادا دۇڭگىرشەكتى بولشەكتەۋ جوسپارلانعان. بۇدان باسقا, وبەكتىنىڭ باسشىسىمەن حالىقتىڭ دەنساۋلىعىن ساقتاۋ سالاسىنداعى نورماتيۆتىك-قۇقىقتىق اكتىلەردە كوزدەلگەن سانيتاريالىق-ەپيدەميولوگيالىق نورمالار مەن تالاپتاردى ساقتاۋ ماسەلەلەرى بويىنشا ءتۇسىندىرۋ جۇمىستارى جۇرگىزىلدى», دەپ مالىمدەدى اقمولا وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتى.