سەنات دەپۋتاتتارى ارمان وتەعۇلوۆ پەن ءلاززات رىسبەكوۆا الداعى رەفەرەندۋمعا جانە اتوم ەلەكتر ستانتسياسىن سالۋ جوباسىنا بايلانىستى ماسەلەلەردى تالقىلاۋ ءۇشىن ورال قالاسىنىڭ جاستارىمەن جانە تەرەكتى اۋدانىنىڭ تۇرعىندارىمەن كەزدەستى, دەپ حابارلايدى Egemen.kz.
سەناتورلار اەس قۇرىلىسىنىڭ بولاشاعى جانە ونىڭ ەل ومىرىندەگى ماڭىزى تۋرالى ەگجەي-تەگجەيلى ايتىپ بەردى. ءلاززات رىسبەكوۆا جاھاندىق ەنەرگەتيكالىق داعدارىس جاعدايىندا قازاقستاننىڭ ەكولوگياسى مەن بولاشاعى ماسەلەسىنە ەرەكشە نازار اۋداردى. ونىڭ ايتۋىنشا, اتوم ەلەكتر ستانتسياسى ەلىمىزدىڭ ەنەرگەتيكا سالاسىنىڭ ۇزاق مەرزىمدى تۇراقتىلىعىن قامتاماسىز ەتۋدەگى باستى جوبا بولادى.
«تازا ەنەرگيامەن قامتاماسىز ەتۋ – بۇل قازىرگى جاي عانا ماسەلە ەمەس, بۇل بولاشاق ۇرپاقتىڭ ءال-اۋقاتىنا قوسىلاتىن ۇلەس. ءبىز اەس قازاقستانعا ەنەرگيا تاپشىلىعى ماسەلەسىن شەشىپ قانا قويماي, بۋلانۋ گازدارى شىعارىندىسىن بارىنشا ازايتاتىن ەلدىڭ ۇلگىسى بولۋعا مۇمكىندىك بەرەتىنى تۋرالى ايتىپ وتىرمىز. كليماتتىڭ وزگەرۋى جاھاندىق قاۋىپكە اينالعان جاعدايدا بۇل قادام ەكونوميكالىق قاجەتتىلىك قانا ەمەس, سونىمەن قاتار قورشاعان ورتا مەن بولاشاق ۇرپاق الدىنداعى جاۋاپكەرشىلىگىمىز», دەپ اتاپ ءوتتى ءلاززات رىسبەكوۆا.
باتىس قازاقستاندىقتار بولاشاق اتوم ەلەكتر ستانتسياسىنىڭ قاۋىپسىزدىگى تۋرالى سۇراقتار قويدى. ارمان وتەعۇلوۆ وعان جاۋاپ رەتىندە ستانتسيانىڭ سەنىمدىلىگىن قامتاماسىز ەتۋ ءۇشىن قابىلداناتىن شارالاردى ءتۇسىندىردى.
«اەس قۇرىلىسى مەن پايدالانۋدىڭ بارلىق كەزەڭدەرىندە قاۋىپسىزدىككە باسىمدىق بەرىلەدى. مەملەكەتتىك رەتتەۋشى ورگان ليتسەنزيا بەرۋ مەن تۇراقتى ينسپەكتسيا جۇرگىزۋدەن باستاپ حالىقارالىق قاۋىپسىزدىك قاعيدالارى مەن ەرەجەلەرىن ساقتاۋعا دەيىنگى ستانتسيا وپەراتورىنىڭ قىزمەتىن باقىلاۋعا تولىق جاۋاپتى بولادى. يادرولىق تەحنولوگيانى جەتكىزۋشى اتوم ەلەكتر ستانتسياسىنىڭ بارلىق جابدىقتارىنىڭ جارامدى كۇيىنە تولىق كەپىلدىك بەرەدى. ەگەر قۇرىلىمدا قانداي دا ءبىر اقاۋ نەمەسە پروبلەما انىقتالسا, جەتكىزۋشى اقاۋلى جۇمىستىڭ كەز كەلگەن سالدارىن جويۋعا تولىق جاۋاپتى بولادى», دەدى ول.